ខេត្តត្បូងឃ្មុំ ៖ ប្រធានឆ្មាំការពារចម្ការកៅស៊ូមូលដ្ឋានច្រាប «ក្រុមហ៊ុនចម្ការកៅស៊ូជប់» ឈ្មោះ ប៊ិន ម៉េងស៊ា ភេទប្រុស អាយុ៣៥ឆ្នាំ បានត្រូវជនមិនស្គាល់មុខកាប់ស្លាប់នៅចំណុចឡូត៍កៅស៊ូលេខ៨.១៧Aក្នុងភូមិ៦.១៦…
ខេត្តត្បូងឃ្មុំ ៖ ប្រធានឆ្មាំការពារចម្ការកៅស៊ូមូលដ្ឋានច្រាប «ក្រុមហ៊ុនចម្ការកៅស៊ូជប់» ឈ្មោះ ប៊ិន ម៉េងស៊ា ភេទប្រុស អាយុ៣៥ឆ្នាំ បានត្រូវជនមិនស្គាល់មុខកាប់ស្លាប់នៅចំណុចឡូត៍កៅស៊ូលេខ៨.១៧Aក្នុងភូមិ៦.១៦ ឃុំគរស្រុកត្បូងឃ្មុំ ។ សពជនរងគ្រោះ ត្រូវបានពលរដ្ឋប្រទះឃើញកាលពីវេលាម៉ោង៦ព្រឹកថ្ងៃទី៧ ខែតុលាកន្លងមក ដោយមានស្នាមកាប់ចំនួន៤កន្លែង ក្នុងនោះ មានក្បាល ក ដងខ្លួន និងជើង ។ រហូតមក
ដល់ថ្ងៃទី១១ ខែតុលា សមត្ថកិច្ចនៅតែមិនទាន់ កំណត់បានជនសង្ស័យជាឃាតករនៅឡើយទេ ។
លោកវរសេនីយ៍ត្រី សេង មិ អធិការរងនគរបាលស្រុកត្បូងឃ្មុំ ថ្លែងថា ក្រោយពីមានពលរដ្ឋប្រទះឃើញសពខាងលើ នគរបាលប៉ុស្តិ៍ក៏បានរាយការណ៍មករូបលោក និងរាយការណ៍បន្តទៅលោកឧត្តមសេនីយ៍ទោ បែន រ័ត្ន ស្នងការនគរបាលខេត្ត ។ បន្ទាប់មក កម្លាំងសមត្ថកិច្ចជាច្រើននាក់បានទៅពិនិត្យសព ដោយរួមសហការជាមួយនឹងគ្រូពេទ្យមណ្ឌលសុខភាពឃុំគរ ។ ចំពោះវត្ថុតាងដែលបន្សល់ទុកនៅកន្លែងកើតហេតុមាន ម៉ូតូហុងដាឌ្រីមសេ១២៥ ពណ៌ខ្មៅមួយគ្រឿង និងទឹកផ្លែឈើ១កេស ដែលជារបស់ជនរងគ្រោះ ។
មានការកត់សម្គាល់ថា ប្រធានឆ្មាំការពារក្រុមហុ៊នចម្ការកៅស៊ូរូបនេះ កន្លងមកធ្លាប់បានចាប់ពលរដ្ឋដែលចូលមករើសជ័រកៅស៊ូស្ងួតនៅតាមឡូត៍កៅស៊ូ ដោយចាប់យកមកធ្វើការអប់រំជាញឹកញាប់ផងដែរ ។ តាម
ការសនិ្នដ្ឋានជុំវិញការកាប់សម្លាប់នេះ អាចឃាតករប្រើប្រាស់អាវុធរឹងចុងស្រួចវែង កាប់ប្រហារជនរងគ្រោះក្នុងរវាងចន្លោះម៉ោង៦ល្ងាចទៅម៉ោង១២យប់ថ្ងៃទី៦ តុលា ឆ្នាំ២០១៨ ។ ទីកន្លែងដែលជនមិនស្គាល់មុខកាប់សម្លាប់នេះ ក៏នៅមិនឆ្ងាយប៉ុន្មានពីផ្ទះជនរងគ្រោះដែរ ។
លោកឧត្តមសេនីយ៍ត្រី ប្រាក់ ប៊ុនណុន ស្នងការរងនគរបាលខេត្តទទួលផែនព្រហ្មទណ្ឌថ្លែងថា ក្រោយពីមានហេតុការណ៍នេះកើតឡើងលោកស្នងការបានចាត់ឲ្យកម្លាំងនគរបាលព្រហ្មទណ្ឌខេត្ត ចុះស្រាវជ្រាវជាមួយនឹងនគរបាលស្រុកត្បូងឃ្មុំ ។ បន្ទាប់ពីបានចុះទៅអង្កេតស្ទើរពេញ១ថ្ងៃ សមត្ថកិច្ចសន្និដ្ឋានថា អាចមកពីរឿងគំនុំ ហើយកំពុងដុតដៃដុតជើងក្នុងការតាមប្រមាញ់រកឃាតករ ៕
ចែករំលែកព័តមាននេះ