ខេត្តកំពង់ឆ្នាំង ៖ អាជ្ញាធរខេត្តអះអាងថា ការធ្វើបំលាស់ទីផ្ទះបណ្តែតទឹកនៅក្នុងខេត្តចំនួន៤គោលដៅ បានសម្រេច១០០ភាគរយហើយ និង២គោលដៅទៀត គឺក្រុងកំពង់ឆ្នាំង និងស្រុកបរិបូណ៌ សម្រេចបាន៥០ភាគ រយ ។
លោក ស៊ុន សុវណ្ណារិទ្ធ អភិបាលរងខេត្ត និងជាប្រធានគណៈកម្មការបំលាស់ទីផ្ទះទឹកក្រុងកំពង់ឆ្នាំង បានឱ្យដឹងថា ការធ្វើបំលាស់ទីផ្ទះបណ្តែតទឹករបស់ប្រជាពលរដ្ឋមកលើគោក គិតត្រឹមថ្ងៃទី៤ ខែតុលា ក្នុងចំណោម៦គោលដៅមានចំនួន៦ស្រុក-ក្រុង ដែលមានប្រជាពលរដ្ឋសរុបចំនួន២.៣៩៦គ្រួសារ ស្មើនឹង១០.០៨៧នាក់ ដែលភាគច្រើនជាជនជាតិវៀតណាម មាន៤គោលដៅគឺ ១-ស្រុកជលគិរី ២-ស្រុកកំពង់លែង ៣-ស្រុកកំពង់ត្រឡាច និង៤-ស្រុករលាប្អៀរ សម្រេចបាន១០០ភាគរយហើយ ចំណែកនៅក្រុងកំពង់ឆ្នាំងនិងស្រុកបរិបូណ៌ សម្រេចបាន៥០ភាគរយ ។
លោកបន្តថា ក្នុងការអនុវត្តផែនការបំលាស់ទីនេះ ទោះជួបបញ្ហាប្រឈមខ្លះ ក៏ក្រុមការងារបានសុំយោបល់លោកអភិបាលខេត្ត ព្យាយាមសម្របសម្រួលធ្វើឱ្យក្រុមជនជាតិវៀតណាមទាំងនោះចូលរួមជាមួយផែនការរបស់រដ្ឋបាលខេត្ត សម្រេចបានលទ្ធផលល្អតាមផែនការ ដោយអនុញ្ញាតឱ្យអូសផ្ទះទឹក បោះទីតាំងបណ្តោះអាសន្ន ចម្ងាយពីច្រាំងទន្លេប្រមាណ១០០ម៉ែត្រ នៅពេលទឹកស្រក ។
លោក ស៊ុន សុវណ្ណារិទ្ធ បញ្ជាក់ថា ក្រោយពីបំលាស់ទីឡើងគោកមកទីតាំងបណ្តោះអាសន្ន រួចហើយ ក្រុមការងារនឹងចាប់ផ្តើមតទឹក ភ្លើងជូនពួកគាត់ និងដោះស្រាយបញ្ហាផ្សេងៗ ដោយអាជ្ញាធរខេត្តបានដាក់ស្នាក់ការមួយសម្រាប់ទទួលការដោះស្រាយបញ្ហាផ្សេងៗ ។ ឯការចំណាយលើការធ្វើបំលាស់ទី ជាបន្ទុករបស់អ្នករស់នៅលើទឹកដោយផ្ទាល់ ។
ចំណែកអាជ្ញាធរខេត្ត នឹងរៀបចំគោលដៅមួយនៅពេលទឹកស្រកវិញ ដោយមានការរៀបចំផ្លូវថ្នល់ ទឹកស្អាត និងភ្លើងអគ្គិសនីឱ្យរួចរាល់ផងដែរ ទើបឱ្យពួកគាត់ចូលទៅរស់នៅទីនោះ។ចំពោះអ្នកមានបែត្រី ក្រុមការងារចម្រុះនឹងពិនិត្យបន្ថែមទៀតជាបន្តបន្ទាប់ ចំណែកផ្ទះដែលមិនមានបែត្រីត្រូវឱ្យឡើងគោកឱ្យអស់ ។អាជ្ញាធរខេត្តបានចំណាយពេលប្រមាណ១០ថ្ងៃ ពោលគឺចាប់ពីថ្ងៃទី១ដល់ថ្ងៃទី១០ ខែតុលាក្នុងការធ្វើបំលាស់ទីផ្ទះបណ្ដែតទឹកពីបឹងទន្លេសាប ឡើងមករស់នៅលើគោក ។
បើតាមលោក ស៊ុន សុវណ្ណារិទ្ធ បានឱ្យដឹងថា សម្រាប់ក្រុងកំពង់ឆ្នាំង មានជនជាតិវៀតណាម៩៩៦ គ្រួសាររស់នៅលើផ្ទះបណ្ដែតទឹក ដែលត្រូវផ្លាស់ទៅរស់នៅលើដីគោកទំហំជាង៤០ហិកតា ក្នុងឃុំស្វាយជ្រំ ស្រុករលាប្អៀរ ដែលអាជ្ញាធរខេត្តបានសុំធ្វើអនុបយោគពីរាជរដ្ឋាភិបាល ដោយកាត់ចេញពីតំបន់ដីលិចទឹក ។ ក្នុងនោះជនជាតិវៀតណាមមួយចំនួន សុំស្នាក់នៅបណ្ដោះអាសន្ននៅលើទឹកសិន ទម្រាំអាជ្ញាធររៀបចំរចនាសម្ព័ន្ធនៅលើគោករួចរាល់ ។
សូមបញ្ជាក់ថា ការផ្លាស់ទីជនជាតិវៀតណាមឡើងមកនៅលើគោកនេះ ស្ថិតនៅក្នុងផែនការការងារ៥ឆ្នាំរបស់ខេត្តកំពង់ឆ្នាំង ចាប់ពីឆ្នាំ២០១៥ ដល់ឆ្នាំ២០១៩ ។ ក្រោយពីបំលាស់ទីបិទបញ្ចប់ទាំងស្រុង អាជ្ញាធរនឹងចាប់ផ្ដើមសម្អាតបរិស្ថានតំបន់បឹងទន្លេសាប មុននឹងកែច្នៃឲ្យក្លាយទៅជាតំបន់ទេសចរណ៍ដ៏ទាក់ទាញតាមរយៈការចិញ្ចឹមត្រី ។ជាការកត់សម្គាល់ វត្តមានរបស់ជនជាតិវៀតណាមរាប់ពាន់គ្រួសារនៅលើបឹងទន្លេសាប ដែលជាជង្រុកត្រីរបស់ខ្មែររាប់សតវត្សរ៍មកហើយនោះ តែងត្រូវបានអង្គការសង្គមស៊ីវិលរិះគន់ថា បានធ្វើឲ្យខូចខាតដល់ធនធានធម្មជាតិរបស់ខ្មែរ តាមរយៈការបោះកាកសំណល់ចោលទៅក្នុងទឹក ការបង្ហូរប្រេងម៉ាស៊ីនកាណូត និងការបំពុលបរិស្ថានផ្សេងៗទៀត ក្នុងនោះការបន្ទោបង់លាមកផងដែរ ៕
ចែករំលែកព័តមាននេះ