ខេត្តព្រះសីហនុ ៖ ម្ចាស់តូបលក់ម្ហូបអាហារ នៅតាមបណ្តោយឆ្នេរអូរឈើទាល និងឆ្នេរព្រែកត្រែង សុំមិនបញ្ចេញឈ្មោះបានឲ្យដឹងដូចគ្នាថា នៅក្នុងឱកាសបុណ្យភ្ជុំបិណ្ឌប្រពៃណីជាតិឆ្នាំ២០១៨នេះ ចំនួនភ្ញៀវទេសចរជាតិ-អន្តរជាតិមានការធ្លាក់ចុះជាងឆ្នាំមុនៗស្ទើរមិនគួរឲ្យជឿ ខណៈដែលតាមវិថីនានានៅក្នុងក្រុងមានសភាពស្ងាត់ មិនមានការកកស្ទះចរាចរណ៍ឡើយ…
ខេត្តព្រះសីហនុ ៖ ម្ចាស់តូបលក់ម្ហូបអាហារ នៅតាមបណ្តោយឆ្នេរអូរឈើទាល និងឆ្នេរព្រែកត្រែង សុំមិនបញ្ចេញឈ្មោះបានឲ្យដឹងដូចគ្នាថា នៅក្នុងឱកាសបុណ្យភ្ជុំបិណ្ឌប្រពៃណីជាតិឆ្នាំ២០១៨នេះ ចំនួនភ្ញៀវទេសចរជាតិ-អន្តរជាតិមានការធ្លាក់ចុះជាងឆ្នាំមុនៗស្ទើរមិនគួរឲ្យជឿ ខណៈដែលតាមវិថីនានានៅក្នុងក្រុងមានសភាពស្ងាត់ មិនមានការកកស្ទះចរាចរណ៍ឡើយ ។
រីឯនៅតាមតំបន់ឆ្នេរដែលជាកន្លែងកម្សាន្តនៅក្នុងខេត្ត ក៏មានសភាព ស្ងប់ស្ងាត់ ខុសប្លែកពីថ្ងៃបុណ្យភ្ជុំបិណ្ឌឆ្នាំ២០១៧កន្លងមកដែរ ។ កាលពីឆ្នាំ២០១៧ ចំនួនភ្ញៀវទេសចរជាតិ-អន្តរជាតិ ដែលមកលេងកម្សាន្តនៅខេត្តព្រះសីហនុ ចាប់ពីថ្ងៃ១រោច ខែភទ្របទដែលជាថ្ងៃកាន់បិណ្ឌទី១ រហូតដល់ថ្ងៃចុងបញ្ចប់ចំនួនភ្ញៀវទេសចរមកលេងតាមតំបន់ឆ្នេរនិងរមណីយដ្ឋាននានាស្ទើរតែរកតុសម្រាប់ឲ្យភ្ញៀវអង្គុយមិនបានផង ។
ប្រភពខាងលើបន្តថា ពួកគាត់ជាអាជីវករលក់ដូរម្ហូបអាហារនៅតាមតំបន់ឆ្នេរសមុទ្រ ឲ្យតែដល់រដូវកាលបុណ្យទានប្រពៃណីជាតិយើងម្តងៗ កាលពីឆ្នាំមុនៗតែងតែរំពឹងទុកលើមុខរបរលក់ម្ហូបអាហារសម្រាប់ភ្ញៀវទេសចរជាតិនិងអន្តរជាតិ ប៉ុន្តែឆ្នាំនេះ ក្តីរំពឹងទុកត្រូវរលាយបាត់អស់ ។ មានបញ្ហាច្រើនយ៉ាងដែលជាដើមចមបណ្តាលឲ្យភ្ញៀវទេសចរមានការធ្លាក់ចុះដូចជា ៖
-ស្ថានភាពផ្លូវដែលរងការខូចខាតនៅក្នុងរដូវវស្សា មិនទាន់បានជួសជុលឡើងវិញ បង្កការលំបាកក្នុងការធ្វើដំណើររបស់ភ្ញៀវទេសចរ។
-ដោយលំហូរចូលការវិនិយោគរបស់ជនបរទេស(ចិន)យ៉ាងគំហុក ធ្វើឲ្យផ្ទះសំណាក់ សណ្ឋាគារ។ល។ ត្រូវបានជួលទៅឲ្យជនជាតិចិនស្ទើរតែអស់ បង្កការលំបាកសម្រាប់ភ្ញៀវទេសចរដែលមានបំណងមកសម្រាកលំហែកាយជាលក្ខណ:គ្រួសារ ។
-ហាងលក់អាហារ ភេសជ្ជៈន ៅក្នុងក្រុងមួយចំនួន ឬហាងលក់ម្ហូបអាហារនៅតាមបណ្តោយឆ្នេរអូរឈើ ទាល ត្រូវបានជួលទៅឲ្យជនជាតិចិនស្ទើរតែអស់ និងលក់មុខម្ហូបតម្រូវតាមបែបជនជាតិគេក្នុងតម្លៃខ្ពស់ ។
ប្រភពខាងលើបានញ្ជាក់ថា អ្វីដែលគាត់បានរៀបរាប់ខាងលើនេះ ជាកត្តាខ្លះៗដែលធ្វើឲ្យភ្ញៀវទេសចរជាតិ-អន្តរជាតិមានការធ្លាក់ចុះ ។តាមរបាយការណ៍របស់មន្ទីរទេសចរណ៍ខេត្តព្រះសីហនុបានឲ្យដឹងថា ចំនួនភ្ញៀវទេសចរដែលបានមកសម្រាកកម្សាន្តនៅខេត្តព្រះសីហនុរយៈពេល៣ថ្ងៃក្នុងឱកាសបុណ្យភ្ជុំបិណ្ឌ ចាប់ពីថ្ងៃទី៨ដល់ថ្ងៃទី១០ ខែតុលា ឆ្នាំ២០១៨ មានចំនួនសរុប៧៩.៥៨៧នាក់ បើប្រៀបធៀបទៅនឹងពិធីបុណ្យភ្ជុំបិណ្ឌឆ្នាំ២០១៧កន្លងមក មានការថយចុះ១៣,៤៩% ។ ក្នុងចំនួនភ្ញៀវខាងលើ ភ្ញៀវជាតិមានចំនួន៧៣.១៧៧នាក់ បើប្រៀបធៀបទៅនឹងឆ្នាំ២០១៧មានការថយចុះ១៦,២៧% ភ្ញៀវអន្តរជាតិមានចំនួន៦.៤១០នាក់ បើប្រៀបធៀបទៅនឹងឆ្នាំ២០១៧មានការកើនឡើង៣៩,៣៤% ។
នៅក្នុងរបាយការណ៍បានឲ្យដឹងទៀតថា ចំនួនភ្ញៀវទេសចរដែលធ្វើដំណើរចូលមកកម្សាន្តតាមរមណីយ ដ្ឋាននានានៅក្នុងខេត្តមាន ៖ ១-រមណីយដ្ឋានក្បាលឆាយ ចំនួនភ្ញៀវចូលទៅលេងមានចំនួន៥.៣១៩នាក់ ក្នុងនោះភ្ញៀវជនជាតិបរទេសមានចំនួន១៥០នាក់ ។២-រមណីយដ្ឋានថ្មរូង ចំនួនភ្ញៀវទេសចរចូលទៅលេងមានចំនួន១.២៤០នាក់ ក្នុងនោះភ្ញៀវជនជាតិបរទេសមានចំនួន៤៨នាក់ ។៣-រមណីយដ្ឋានពិកនិក ចំនួនភ្ញៀវទេសចរចូលទៅលេងមានចំនួន១.៣៨០នាក់ ក្នុងនោះភ្ញៀវជាជនជាតិបរទេសមានចំនួន៣៩៤នាក់
ដោយឡែក ភ្ញៀវដែលធ្វើដំណើរតាមនាវាទៅកម្សាន្តនៅតាមដែនកោះនានាក្នុងរយ:ពេល៣ថ្ងៃនេះដែរ សរុបមាន២.៦៩៥នាក់ ។ នៅក្នុងចំនួនភ្ញៀវខាងលើ ភ្ញៀវជាតិមានចំនួន៦០៥នាក់(ស្រី្ត២៨៦នាក់) និងភ្ញៀវអន្តរជាតិមានចំនួន២.០៩០នាក់(ស្រី៩២៤នាក់) ។
ផ្ទុយទៅវិញ ប្រជាពលរដ្ឋអ្នកលក់ដូរម្ហូបអាហារនៅតាមបណ្តោយឆ្នេរសមុទ្រ និងនៅតាមរមណីយដ្ឋាននានា និងអ្នកបើកបរនាវាដឹកជញ្ជូនភ្ញៀវទៅកម្សាន្តតាមកោះ បានឲ្យដឹងថា នៅក្នុងពិធីបុណ្យភ្ជុំបិណ្ឌប្រពៃ ណីជាតិឆ្នាំនេះ ចំនួនភ្ញៀវទេសចរជាតិនិងអន្តរជាតិមានការធ្លាក់ចុះយ៉ាងខ្លាំងគួរឲ្យកត់សម្គាល់ ដែលមិនធ្លាប់មានពីមុនមក មិនដូចជាការលើកឡើងនៅក្នុងរបាយការណ៍របស់មន្ទីរទេសចរណ៍នោះទេ ។
ប្រភពដដែលបន្តថា បើមិននិយាយពីការពិតដើម្បីដោះស្រាយទេ តើទុកឱ្យស្ថានភាពនេះវិវត្តកាន់តែអាក្រក់ទៅៗឬបែបណា ? ពេលនេះបានបង្ហាញថា តំបន់ឆ្នេរដែលជាទីពេញនិយមកំពុងឃ្លាតកាន់តែឆ្ងាយហើយ ៕
ចែករំលែកព័តមាននេះ