តាមប្រភព Shanghaiist បានឱ្យដឹងថា កូនប្រុសរបស់អតីតកីឡាករបាល់ទាត់ល្បីលំដាប់ពិភពលោក David Beckham បានក្លាយទៅជាមនុស្សល្បីខាងគេស្អប់នៅប្រទេសចិន ក្រោយពីបង្ហោះរូបថតពីរសន្លឹក ដែលភ្ជាប់ជាមួយនឹងសារខ្លីមួយ នៅលើបណ្តាញសង្គម Instagram ។
Brooklyn Beckham ដែលជាតារាបង្ហាញម៉ូដអាយុ១៩ឆ្នាំ ត្រូវបានជេរស្តី ដោយមហាជនចិនលើបណ្តាញសង្គម ដោយចោទប្រកាន់ថា រើសអើងពូជសាសន៍ ។ រូបគេបានបង្ហោះរូបថតពីរសន្លឹកទៅលើ Instagram ពេលទៅលេងនៅទីក្រុង Venice ប្រទេសអ៊ីតាលី ។
រូបទីមួយបង្ហាញពីក្រុមទេសចរអាស៊ីមួយក្រុម និងរូបទីពីរ គឺជាស្ត្រីអាស៊ីម្នាក់ដើរទិញទំនិញនៅផ្សារទំនើបក្នុងប្រទេសអ៊ីតាលី ។ រូបថតទាំងពីរនេះ ត្រូវបានភ្ជាប់ជាមួយនឹងសារខ្លីថា៖ «គ្មានទីណាដូចអ៊ីតាលីទេ ត្រូវអត់?” ។ គ្រាន់តែបង្ហោះភ្លាម មហាជនលើបណ្តាញសង្គមនៅប្រទេសចិនផ្ទុះកំហឹងភ្លាម ដោយបានទៅ Comment លើរូបថតនោះ ចោទប្រកាន់ថា វាជាការរើសអើងពូជសាសន៍ ។ ដោយសារតែឃើញដូចនេះ កូនប្រុសរបស់ Beckham បានលុបវាចេញភ្លាម ហើយប្តូរគណនីរបស់ខ្លួនទៅជា Private វិញ ។
បើទោះបីជាយ៉ាងនេះក៏ដោយ មហាជននៅតែយករឿងនេះ មកនិយាយនៅលើបណ្តាញសង្គម Weibo។ Comment ដែលល្បីជាងគេ គឺសរសេរថា៖ «បើគ្មានម៉ែឪរបស់ឯងទេ ឯងគឺមិនមែនជាស្អីទាំងអស់ ។ គ្រាន់តែជាក្មេងអាយុ១៩ឆ្នាំ ដែលរត់ចោលសាលាប៉ុណ្ណោះ» ។
អ្នកខ្លះទៀតបានទាមទារឲ្យ Beckham មកសុំទោសជាសាធារណៈ ខណៈដែលខ្លះទៀត ព្រមានថានឹងមិនឲ្យមកកើបលុយនៅចិនទៀតទេ ។ នេះក៏ដោយសារតែកាលពីឆ្នាំ២០១៦ David Beckham បានធ្វើជាអ្នកផ្សាយពាណិជ្ជកម្មឲ្យទូរស័ព្ទដៃ Huawei Honor 8 ដែលទទួលបានប្រាក់ច្រើនជាង១៣ម៉ឺនដុល្លារ ។
ចែករំលែកព័តមាននេះ