កាលបើបុគ្គលប្រាសចាកសេចក្តីអត់ធន់ហើយ ទោះបីប្រឹងតាក់តែងកាយដោយគ្រឿងអលង្ការទាំងឡាយដ៏មានតម្លៃមានមាសពេជ្រជាដើម រមែងលម្អបានតែក្នុងកាលដែលគេនៅមិនទាន់ប៉ះអារម្មណ៍ទាស់ចិត្ត អារម្មណ៍មិនគួរជាទីប្រាថ្នាទេ តែបើពើបប្រទះនឹងពាក្យប្រមាថមើលងាយ ពាក្យអសុរោះណាមួយហើយ ប្រាកដជាគេសម្តែងអាការៈធ្វើមុខក្រញឹងខឹងក្រញូវគួរឱ្យស្អប់ គួរឱ្យខ្លាចភ្លាមមួយរំពេច ។ កាលបើដូចនេះនរណាឡើយនឹងលើកតម្កើងគេថាជាមនុស្សល្អទៅកើត ព្រោះមុខបៀមកំហឹងយ៉ាងនេះ។
ឯបណ្ឌិតអ្នកប្រាជ្ញសូម្បីគ្មានគ្រឿងប្រដាប់ទាំងនោះមកតាក់តែងកាយ តែលោកប្រកបដោយសេចក្តីអត់ធន់ សូម្បីជួបប្រទះនឹងពាក្យមើលងាយ ជេរ ប្រទេច ទ្រគោះបោះបោកមកលើយ៉ាងណាក៏មិនបានកើតអារម្មណ៍ខឹងតប ឬសម្តែងអាការៈគួរស្អប់ឱ្យប្រាកដឡើយ ត្រឡប់ជាមានមុខញញឹមប្រិមប្រិយយ៉ាងនេះ តើនរណាឡើយនឹងមិនសរសើរថា លោកជាអ្នកល្អ ជាអ្នកគួរឱ្យស្រឡាញ់នោះ ។
អ្នកដែលចេះអត់ធន់នឹងអាចនាំមកនូវប្រយោជន៍ និងសេចក្តីសុខគ្រប់យ៉ាង គឺអាចទាញមនុស្សជាសត្រូវឱ្យទៅជាមិត្តសម្លាញ់ អាចញុំាងចិត្តដែលក្តៅឱ្យទៅជាត្រជាក់ អ្នកប្រាថ្នាប្រយោជន៍បច្ចុប្បន្ន ឬអនាគត បើចេះអត់ធន់អាចធ្វើប្រយោជន៍នោះឱ្យជាប្រយោជន៍ ដ៏ធំបំផុតសម្រាប់ជីវិត ។
ចែករំលែកព័តមាននេះ