រាជធានីភ្នំពេញ ៖ ក្រុមបាល់ទាត់ជម្រើសជាតិកម្ពុជា ដែលត្រូវបើកទ្វារពហុកីឡដ្ឋានជាតិរបស់ខ្លួនស្វាគមន៍ក្រុមភ្ញៀវទីម័រខាងកើតក្នុងជំនួបមិត្តភាពកម្ដៅសាច់ដុំនាល្ងាចថ្ងៃទី១២ តុលា នេះ នឹងមិនមានវត្តមានអ្នកចាត់ការ Honda ដឹកនាំឡើយដោយសារតែលោកជាប់ភារកិច្ចនៅក្លិបអូស្ត្រាលី។
ទោះបីយ៉ាងណាតាមព័ត៌មានលោក Honda នឹងណែនាំក្រុមជម្រើសជាតិកម្ពុជាតាមរយៈវីដេអូខន់ហ្វឺរិន ហើយតួនាទីដឹកនាំក្រុមគឺធ្លាក់ទៅលើគ្រូបង្វឹក Felix Agustin Gonzalez Dalmas ។ ការប៉ះទីម័រខាងកើតនៅល្ងាចនេះ គឺជាការប្រកួតលើកទី២របស់ក្រុមជម្រើសជាតិកម្ពុជា ក្រោមការដឹកនាំរបស់លោក Honda ក្នុងនាមជាអ្នកចាត់ការផងដែរ ។ តាមប្រភពព័ត៌មានដដែល លោកអាចនឹងអវត្តមានរហូតដល់ក្រុមកម្ពុជាប៉ះក្រុមសិង្ហបុរីក្នុងជំនួបមិត្តភាពដូចគ្នានាពេលខាងមុខនេះដែរ។
ពាក់ព័ន្ធនឹងអវត្តមានរបស់លោកHonda លោក Norio Tsukitate គ្រូបង្វឹកជនជាតិជប៉ុនរបស់ក្រុមជម្រើសជាតិទីម័រខាងកើត កាលពីព្រឹកថ្ងៃទី១១ តុលា បាននិយាយបែបកំប្លែងលេងសើចថា ក្រុមកីឡាកររបស់ខ្លួនកំពុងមិនសប្បាយចិត្ត ព្រោះមិនបានថតរូបជាមួយ Idol (Honda) ដែលជាអ្នកដឹកនាំក្រុមជម្រើសជាតិកម្ពុជាបន្ទាប់ពីទទួលដំណឹងថាគាត់មិនមកចូលរួមការប្រកួតមិត្តភាពនៅថ្ងៃស្អែកនេះ(១២ តុលា) ។
ចំពោះទស្សនៈរបស់លោក Norio Tsukitate យល់ឃើញថា ក្រុមកម្ពុជាបច្ចុប្បន្នកំពុងរីកចម្រើនខ្លាំងស្របពេលពួកគេមានអ្នកចាត់ការថ្មីល្បីឈ្មោះមកដឹកនាំថែមទៀតផងនោះ។
គួរបញ្ជាក់ថា យោងតាមប្រវត្តិ ក្រុមជម្រើសជាតិទាំងពីរធ្លាប់ជួបគ្នា៧លើកក្នុងនោះកម្ពុជាឈ្នះ៥ ទីម័រខាងកើតឈ្នះ១ និងស្មើ១៕
ចែករំលែកព័តមាននេះ