ខេត្តព្រះសីហនុ ៖ និយាយដោយពិតត្រង់ទៅ តារារះនាទិសនិរតី ពិតជាមានរឿងមិនល្អកើតមានបន្តបន្ទាប់និងមិនឈប់ឈរសោះ ក្រៅពីគំនរសំរាមដ៏មហាសាល ដែលបង្កដោយមនុស្ស ការបង្ហូរទឹកស្អុយចូលសមុទ្រ ការចាក់ដីលុបឆ្នេរ និងការហូរចូលជនជាតិចិនរាប់ម៉ឺននាក់…
ខេត្តព្រះសីហនុ ៖ និយាយដោយពិតត្រង់ទៅ តារារះនាទិសនិរតី ពិតជាមានរឿងមិនល្អកើតមានបន្តបន្ទាប់និងមិនឈប់ឈរសោះ ក្រៅពីគំនរសំរាមដ៏មហាសាល ដែលបង្កដោយមនុស្ស ការបង្ហូរទឹកស្អុយចូលសមុទ្រ ការចាក់ដីលុបឆ្នេរ និងការហូរចូលជនជាតិចិនរាប់ម៉ឺននាក់ ធ្វើឱ្យបរិយាកាសកាន់តែឃ្លាតឆ្ងាយសម្រាប់អ្នកទេសចរអឺរ៉ុប និងជនជាតិខ្មែរម្ចាស់ស្រុក ស្រាប់តែកាលពីថ្ងៃទី៩ ខែតុលាកន្លងទៅ សំរាមកំប្លោកដ៏មហាសាលបានរសាត់តាមរលកសមុទ្រ មកទើរលើឆ្នេរអូរឈើទាល ដែលជាទីពេញនិយមសម្រាប់ការមុជទឹកកម្សាន្ត ធ្វើឱ្យបាត់បង់សោភ័ណភាពទាំងស្រុង ។
ព្រឹកថ្ងៃទី១១ ខែតុលា មេបញ្ជាការរងយោធភូមិភាគទី៣ និងមេបញ្ជាការតំបន់ប្រតិបត្តិការសឹករងព្រះសីហនុ បានដឹកនាំនាយទាហាន នាយទាហានរង និងពលទាហានតំបន់ប្រតិបត្តិការសឹករងរាប់សិបនាក់ ចុះជួយសម្អាតឆ្នេរសមុទ្រ ចំណុចឆ្នេរអូរឈើទាលប្រវែងរាប់រយម៉ែត្រ ដែលមានសំរាមរលួយទើរពេញលើឆ្នេរ និងអណ្តែតរាយប៉ាយលើផ្ទៃទឹក ។ ជាមួយគ្នានេះ អាជ្ញាធរខេត្ត ដឹកនាំដោយលោក យន្ត មីន អភិបាលខេត្ត រួមទាំងលោកនាយឧត្តមសេនីយ៍ ប៉ុល សារឿន តំណាងរាស្ត្រមណ្ឌលព្រះសីហនុ ក៏បានដឹកនាំកម្លាំងចុះសម្អាតកំប្លោក ដែលហូរមកពីប្រទេសជិតខាងមិនធ្លាប់មាននេះដែរ ។
ជាមួយគ្នានេះ សាលាខេត្តបានចេញផ្សាយសេចក្តីប្រកាសព័ត៌មានឱ្យដឹងថា ចាប់ពីថ្ងៃទី៩ ខែតុលា រហូតមកដល់ថ្ងៃទី១១ ខែតុលា មានកំប្លោក ដែលមានប្រភពពីសមុទ្រប្រទេសជិតខាង បានហូរអណ្តែតរសាត់លើផ្ទៃសមុទ្រ និងមកទើរនៅលើឆ្នេរសមុទ្ រក្នុងខេត្តព្រះសីហនុហើយបញ្ហានេះ ក្រុមការងាររដ្ឋបាលខេត្ត កង
កម្លាំង រដ្ឋបាលក្រុង មន្ទីរអង្គភាពពាក់ព័ន្ធ កំពុងចុះសម្អាតតាមបណ្តាឆ្នេរក្នុងក្រុងព្រះសីហនុ ។
អាជ្ញាធរខេត្ត ក៏បានប្រកាសដល់សាធារណជនទាំងអស់ សូមកុំមានការព្រួយបារម្ភ ព្រោះបញ្ហានេះ មិនបានធ្វើឲ្យខូចគុណភាពទឹកសមុទ្រ ឬឆ្នេរខ្សាច់នោះទេ គ្រាន់តែធ្វើឲ្យបាត់បង់សោភ័ណភាពឆ្នេរមួយរយៈពេលខ្លីប៉ុណ្ណោះ ក្រោយពីការសម្អាតរួចរាល់ ឆ្នេរខ្សាច់នឹងមានសភាពស្រស់ស្អាតដូចដើមវិញ ។ ដើម្បីពន្លឿនការសម្អាតកំប្លោកនៅតាមឆ្នេរ រដ្ឋបាលខេត្តស្នើដល់បងប្អូនអាជីវករ ដែលកំពុងប្រកបអាជីវកម្មតាមឆ្នេរ
ចូលរួមសម្អាតឆ្នេរ ដែលមានកំប្លោកនៅមុខទីតាំងអាជីវកម្មរបស់ខ្លួនឲ្យបានស្អាតល្អ ។
ចែករំលែកព័តមាននេះ