រាជធានីភ្នំពេញ ៖ កាលពីថ្ងៃទី២៣ ឧសភា សម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា និងសម្តេចព្រះអភិសិរីសុគន្ធាមហាសង្ឃរាជាធិបតី បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយនៃព្រះរាជាណាចក្រកម្ពុជា បានយាងជាព្រះរាជអធិបតីភាពក្នុងពិធីចាប់ឆ្នោតកំណត់លំដាប់លេខរៀងគណបក្សនយោបាយទាំង៨លើសន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៥ឆ្នាំ២០១៣ ។
ក្នុងការចាប់ឆ្នោតនេះគណបក្សប្រជាជនកម្ពុជាបានលេខរៀងដូចឆ្នាំ២០០៨ដែលជាការបោះឆ្នោតអាណត្តិទី៤ដែរ គឺលេខរៀងទី៤លើសន្លឹកឆ្នោត ។ បើគិតពីយីអ៊ុនវិញគឺល្អ ដោយសារតែការបោះឆ្នោត កាលពីអាណត្តិទី៤គណបក្សប្រជាជនកម្ពុជាឈ្នះដាច់តែម្តង ដោយទទួលបានអាសនៈ៩០កៅអីក្នុងរដ្ឋសភា ។ ពិធីចាប់ឆ្នោតកំណត់លំដាប់លេខរៀងគណបក្សនយោបាយទាំង៨ លើសន្លឹកឆ្នោត សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៥នេះ បានប្រព្រឹត្តទៅនៅវេលាម៉ោង៩ព្រឹកថ្ងៃទី២៣ ឧសភា នៅទីស្តីការគណៈកម្មាធិការជាតិរៀបចំការបោះឆ្នោត(គ.ជ.ប.) ក្នុងបរិវេណក្រសួងមហាផ្ទៃ ។
គណបក្សនយោបាយទាំង៨ ដែលចូលរួមការបោះឆ្នោតជ្រើសតាំងតំណាងរាស្ត្រនីតិកាលទី៥ឆ្នាំ២០១៣ ត្រូវបានសម្តេចសង្ឃរាជទាំងពីរគណៈយាងចាប់ឆ្នោតដោយផ្ទាល់ព្រះហស្តម្តងមួយសន្លឹកៗ ។ បន្ទាប់មកមន្ត្រីគ.ជ.ប បានប្រកាសលេខរៀង ហើយតំណាងគណបក្សនយោបាយក៏បានចុះហត្ថលេខាទទួលស្គាល់ជាផ្លូវការផងដែរ ។ មន្ត្រីគ.ជ.ប បានឱ្យដឹងថា លំដាប់លេខរៀងគណបក្សនយោបាយទាំង៨នៅលើសន្លឹកឆ្នោតគឺ៖
១-គណបក្សសញ្ជាតិកម្ពុជា
២-គណបក្សហ្វុ៊នសិុនប៉ិច
៣-គណបក្សសាធារណរដ្ឋប្រជាធិបតេយ្យ
៤-គណបក្សប្រជាជនកម្ពុជា
៥-គណបក្សខ្មែរអភិវឌ្ឍន៍សេដ្ឋកិច្ច
៦-គណបក្សខ្មែរឈប់ក្រ
៧-គណបក្សសង្គ្រោះជាតិ
៨-គណបក្សសម្ព័ន្ធដើម្បីប្រជាធិបតេយ្យ
គួរកត់សម្គាល់ថា កាលពីអាណត្តិទី៤(២០០៨-២០១៣)មានគណបក្សចំនួន១១បានចូលរួមការបោះឆ្នោត ហើយមានតែគណបក្ស៥ប៉ុណ្ណោះបានទទួលការគាំទ្រពីប្រជាពលរដ្ឋជាម្ចាស់ឆ្នោតមានអាសនៈក្នុងសភា ។ លោក អ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត បានមានប្រសាសន៍ក្នុងពិធីចាប់លំដាប់លេខរៀងគណបក្សនយោបាយនៅលើសន្លឹកឆ្នោតថា ការបោះឆ្នោតជ្រើសតាំងតំណាងរាស្ត្រ នីតិកាលទី៥ នៅពេលខាងមុខនេះ គ.ជ.ប ត្រូវផលិតសន្លឹកឆ្នោតតាមមណ្ឌលនីមួយៗ សម្រាប់ប្រើប្រាស់ក្នុងការបោះឆ្នោតដែលមណ្ឌលទាំង២៤រាជធានី-ខេត្ត ត្រូវការលេខរៀង និងឈ្មោះគណបក្សនយោបាយដែលបានឈរឈ្មោះបោះឆ្នោត ។
លោកប្រធាន គ.ជ.ប បន្តថា លទ្ធផលនៃការចាប់យកលេខរៀងគណបក្សនយោបាយលើសន្លឹកឆ្នោតមានសារសំខាន់ណាស់សម្រាប់គណបក្សនយោបាយទាំងអស់ដែលបានឈរឈ្មោះបោះឆ្នោត ។ ការកំណត់លេខរៀងគណបក្សនយោបាយនីមួយៗលើសន្លឹកឆ្នោត នឹងជួយបង្កលក្ខណៈងាយស្រួលដល់គណបក្សនយោបាយក្នុងការឃោសនាបោះឆ្នោត ការបោះឆ្នោត និងជួយឱ្យអ្នកបោះឆ្នោត អាចស្គាល់បានដោយងាយស្រួលជ្រើសរើសនូវគណបក្សនយោបាយដែលពួកគាត់ស្រឡាញ់ និងពេញចិត្តនឹងផ្តល់ទំនុកចិត្តឱ្យដឹកនាំប្រទេស (២០១៣-២០១៨) ។ លោកប្រធាន គ.ជ.ប បានបញ្ជាក់ទៀតថា គិតចាប់តាំងពីឆ្នាំ១៩៤៦មក កម្ពុជាបានរៀបចំការបោះឆ្នោតចំនួន១៥លើករួចមកហើយ ។ ដោយឡែក គិតចាប់តាំងពីឆ្នាំ១៩៩៨ មក គ.ជ.ប បានរៀបចំការបោះឆ្នោតចំនួន៤ដងយ៉ាងទៀងទាត់ និងទទួលបានជោគជ័យទាំងការបោះឆ្នោតជាតិ និងការបោះឆ្នោតថ្នាក់ក្រោមជាតិ ។
ជាក់ស្តែង ក្រោយពីបញ្ចប់ដំណើរការបោះឆ្នោតនីមួយៗ ត្រូវបានមតិអន្តរជាតិវាយតម្លៃថា «ពីការបោះឆ្នោតមួយទៅការបោះឆ្នោតមួយ កាន់តែមានលក្ខណៈល្អប្រសើរ» ។ មន្ត្រី គ.ជ.ប បានអះអាងថា ដំណើរការនៃការបោះឆ្នោតជ្រើសតាំងតំណាងរាស្ត្រអាណត្តិទី៥ បាននិងកំពុងប្រព្រឹត្តទៅយ៉ាងសកម្មតាមផែនការ និងប្រតិទិន ដែលបានគ្រោងទុក ។ ក្នុងការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១២ សម្រាប់បម្រើការបោះឆ្នោតជ្រើសតាំងតំណាងរាស្ត្រអាណត្តិទី៥ ដែលបានបញ្ចប់កាលពីថ្ងៃទី៣១ ធ្នូ ឆ្នាំ២០១២ ត្រូវបានផ្តល់សុពលភាពជាផ្លូវការគឺអ្នកមានឈ្មោះក្នុងបញ្ជីបោះឆ្នោតសរុប៩.៦៧៥.៤៥៣នាក់ ក្នុងនោះស្ត្រីមានចំនួន៥.០៨១.៨៤៣នាក់ ស្មើនឹង៥២,៥% ៕
ចែករំលែកព័តមាននេះ