រាជធានីភ្នំពេញ ៖ បុរសម្នាក់ដើរបណ្តើរលេងទូរស័ព្ទដៃបណ្តើរ ហើយក៏ត្រូវម៉ូតូមួយគ្រឿងធ្វើសកម្មភាពឆក់ តែមិនបានសម្រេច បណ្តាលឲ្យដួលម៉ូតូចាប់បានម្នាក់រត់រួចម្នាក់ ។ ហេតុការណ៍នេះបង្កឲ្យមានការភ្ញាក់ផ្អើលឡើង កាលពីវេលាម៉ោង៨និង៤០នាទីយប់ថ្ងៃទី១១ ខែតុលា ឆ្នាំ២០១៨ ត្រង់ចំណុចក្បែរផ្សារទួលគោក តាមបណ្តោយផ្លូវលេខ៣០៧កែង និងផ្លូវលេខ៥៨៤ ស្ថិតក្នុងសង្កាត់បឹងកក់ទី២ ខណ្ឌទួលគោក ។
ជនសង្ស័យខាងលើមានឈ្មោះ មាន សំបុត្រ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅម្តុំវត្តសំរោងអណ្ដែត ស្ថិតក្នុងសង្កាត់គោកឃ្លាង ខណ្ឌសែនសុខ ។
តាមសម្តីពីបុរសជាជនរងគ្រោះសូមមិនបញ្ចេញឈ្មោះ បានប្រាប់ឲ្យដឹងថា នៅមុនពេលកើតហេតុគាត់បានដើរតាមបណ្តោយផ្លូវ៣០៧ ក្នុងទិសដៅពីត្បូងទៅជើងដោយទើបតែយកម៉ូតូទៅផ្ញើនៅផ្សារទួលគោក បំណងដើរទៅបន្ទប់ជួលវិញ នៅក្បែរកន្លែងកើតហេតុ ។ ខណៈពេលដែលដើរតាមផ្លូវគាត់ក៏បានដកទូរស័ព្ទដៃមួយគ្រឿងម៉ាកអាយហ្វនស៊ិចភ្លើសយកមកចុចលេង ។ លុះមកដល់ចំណុចកើតហេតុក៏ស្រាប់តែលេចមុខជនសង្ស័យចំនួនពីរនាក់ជិះម៉ូតូមួយគ្រឿងម៉ាកស៊ុយស័រគីស្មាក់វី ពណ៌ខ្មៅ ពាក់ស្លាកលេខ ភ្នំពេញ1E-2736 ជិះមកពីក្រោយហើយក៏ធ្វើសកម្មភាពឆក់ទូរស័ព្ទដៃរបស់គាត់ តែមិនបានសម្រេចភ្លាមៗនោះគាត់ក៏បានប្រទាញជាមួយជនសង្ស័យបណ្តាលឲ្យម៉ូតូរបស់ជនសង្ស័យជ្រុលទៅបុកថូផ្កាដែលនៅខាងមុខផ្ទះ ប្រជាពលរដ្ឋបណ្តាលឲ្យដួល ហើយក៏ត្រូវបានប្រជាពលរដ្ឋធ្វើការឃាត់បានម្នាក់ ចំណែកឯបក្សពួកម្នាក់ទៀតបានរត់គេចខ្លួនបាត់ស្រមោល ។
ច្ចុប្បន្នជនសង្ស័យខាងលើរួមទាំងវត្ថុតាងត្រូវបានសមត្ថកិច្ចនាំខ្លួនយកទៅសាកសួរនាំនៅប៉ុស្តិ៍នគរបាលរដ្ឋបាលបឹងកក់ទី២ ដើម្បីកសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោករង់ចាំធ្វើការចាត់ការទៅតាមនីតិវិធី ៕
ចែករំលែកព័តមាននេះ