តាមប្រភពព័ត៌មាន Goal បានឲ្យដឹងថា កីឡាករជម្រើសជាតិប្រេស៊ីល Philippe Coutinho ចង់យកឈ្នះលើក្រុមជម្រើសជាតិអាហ្សង់ទីននៅក្នុងការប្រកួតដែលនឹងធ្វើឡើងនៅថ្ងៃទី១៦ ខែតុលា ខាងមុខនេះមិនថា Messi លេងឬក៏អត់នោះទេ ។
Philippe Coutinho មិននិយាយជាមួយនឹងមិត្តរួមក្លិបរបស់ខ្លួន (Messi) ពីក្រុមជម្រើសជាតិឡើយ តែរូបគេពិតជាចង់យកឈ្នះការប្រកួតឲ្យបាន ព្រោះតែគេគិតថា វាពិតជាសំខាន់ណាស់ ។
Coutinho បាននិយាយប្រាប់ថា ៖«Messi និងខ្ញុំ មិននិយាយច្រើនពីក្រុមជម្រើសជាតិរបស់ពួកយើងទេ ។ បើទោះបីជាគាត់មិនលេងក៏ដោយ ការប្រកួតនៅថ្ងៃទី១៦ នៅតែជាការប្រកួតដ៏ធំមួយសម្រាប់ការប្រកួតអន្តរជាតិ» ។
កីឡាករប្រេស៊ីលរូបនេះបានបន្តថា ៖«ខ្ញុំចង់យកឈ្នះលើក្រុមអាហ្សង់ទីន បើទោះបីជា Messi លេងឬមិនលេងក៏ដោយ ។ អ្វីដែលសំខាន់បំផុតសម្រាប់ខ្ញុំ គឺលេងបានល្អ និង យកឈ្នះក្នុងការប្រកួត» ។
គួរបញ្ជាក់ផងដែរថា Messi មិនបានចូលលេងឲ្យក្រុមជម្រើសជាតិសោះតែម្តង តាំងពីក្រោយការប្រកួត World Cup នៅរុស្ស៊ីមក ។ រូបគេចង់ផ្តោតលើការប្រកួតសម្រាប់ក្លិប Barcelona និង ជីវិតឯកជន ។ គេនៅមិនទាន់ដឹងថា ពេលណាកីឡាកររូបនេះនឹងចូលលេងវិញ ឬក៏ គេអាចនឹងព្យួរស្បែកជើងនោះទេ ៕
ចែករំលែកព័តមាននេះ