រាជធានីភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងរដោយបាក់ជើងខាងស្តាំម្ខាងពេលគាត់កំពុងតែជិះម៉ូតូធំម៉ាកណៃហត ពាក់ស្លាកលេនគរបាលរបស់អង្គភាពមួយគ្រឿង ធ្វើដំណើរតែម្នាក់ឯង ហើយត្រូវបានរថយន្តម៉ាកហាយឡែនឌ័រ មួយគ្រឿង បុកពេញទំហឹង ។ ករណីគ្រោះថ្នាក់ចរាចរណ៍នេះបានកើតឡើងកាលពីវេលម៉ោង…
រាជធានីភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងរដោយបាក់ជើងខាងស្តាំម្ខាងពេលគាត់កំពុងតែជិះម៉ូតូធំម៉ាកណៃហត ពាក់ស្លាកលេនគរបាលរបស់អង្គភាពមួយគ្រឿង ធ្វើដំណើរតែម្នាក់ឯង ហើយត្រូវបានរថយន្តម៉ាកហាយឡែនឌ័រ មួយគ្រឿង បុកពេញទំហឹង ។
ករណីគ្រោះថ្នាក់ចរាចរណ៍នេះបានកើតឡើងកាលពីវេលម៉ោង ១១និង៣០នាទីព្រឹកថ្ងៃទី១១ ខែតុលា ឆ្នាំ ២០១៨ នៅចំណុចផ្លូវបំបែកជា៥ (ខាងមុខស្ថានីយ៍ប្រេងតូតាល់ ក្បែរផ្សារទួលទំពូង) ក្នុងសង្កាត់ទំនប់ទឹក ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា បុរសរងគ្រោះ ឈ្មោះ ហួត ផល្លី អាយុ ៤៥ឆ្នាំ ជាតម្រួតបទបញ្ជានៃអគ្គនគរបាលជាតិ មានស្រុកកំណើតនៅឯខេត្តព្រៃវែង ហើយសព្វថ្ងៃមានប្រពន្ធ ដែលមាន ផ្ទៃពោះជិតគ្រប់ខែទៅហើយ និងស្នាក់នៅក្នុងអង្គភាពរបស់ខ្លួន។
មុនពេលកើតហេតុ មន្ត្រីនគរបាលតម្រួតបទបញ្ជាដែលជាជនរងគ្រោះបានជិះម៉ូតូធំមួយគ្រឿងម៉ាកណៃហត ពណ៌ខ្មៅ ពាក់ស្លាកលេខ នគរបាល១-១៦៣៧ ធ្វើដំណើរតែម្នាក់ឯង ចុះពីផ្លូវ២៧១ បត់ឆ្វេងទៅតាមផ្លូវលេខ១៧៣។
តាមប្រភពដដែលបានប្រាប់បន្តទៀតថា លុះមកដល់ចំណុចកើតហេតុ ដែលជាចំណុចផ្លូវបំបែកជា៥នោះ ក៏ស្រាប់តែមានរថយន្តមួយគ្រឿងម៉ាកហាយឡែនឌ័រ ពណ៌ទឹកមាស ពាក់ស្លាកលេខ ភ្នំពេញ ២AA-៣៦៧៧ បើកបរដោយបុរសវ័យចំណាស់ម្នាក់ ដែលគេស្គាល់ថា «រូបគាត់ជាមន្ត្រីសុរិយោដីបម្រើការងារនៅក្រសួងរៀបចំដែនដីនគរូបនីយកម្ម និងសំណង់ម្នាក់»នោះ។
រថយន្តម៉ាកហាយឡែនឌ័របានបើកបរតាមបណ្តោយផ្លូវលេខ៤៣០ ក្នុងគោលបំណងបើកឆ្លងផ្លូវទំនងជាខ្វះការប្រុងប្រយ័ត្ន ទើបបានជាទៅបុកម៉ូតូធំម៉ាកណៃហត របស់មន្ត្រីនគរបាលម្នាក់ខាងលើចំពាក់កណ្តាល បណ្តាអោយដួល និងបាក់ត្រង់កជើងខាងស្តាំម្ខាងរងរបួសយ៉ាងធ្ងន់ធ្ងរតែម្តង។
ពាក់ព័ន្ធទៅនឹងករណីគ្រោះថ្នាក់ចរាចរណ៍រវាងរថយន្តម៉ាកហាយឡែនឌ័រមួយគ្រឿងខាងលើបុកជាមួយ
នឹងម៉ូតូធំម៉ាកណៃហតមួយគ្រឿង ដែលបណ្តាលឱ្យមន្ត្រីនគរបាលនៃតម្រួតបទបញ្ជាម្នាក់បាក់ជើងស្តាំម្ខាងនេះដែរ ត្រូវបានមន្ត្រីនគរបាលម្នាក់ដែលធ្វើការជាមួយគ្នារៀបរាប់ប្រាប់ថា «មន្ត្រីនគរបាលដែលជាជនរងគ្រោះខាងលើ គ្រួសាររបស់គាត់មានជីវភាពខ្សត់ខ្សោយណាស់ គ្មានផ្ទះគ្មានសម្បែង សព្វថ្ងៃនាំគ្នាស្នាក់នៅក្នុងអង្គភាព ហើយប្រពន្ធក៏មានផ្ទៃពោះជិតគ្រប់ខែឆ្លងទន្លេទៀត»។
ក្រោយពេលកើតហេតុ កម្លាំងនគរបាលមូលដ្ឋាននិងចរាចរណ៍ខណ្ឌចំការមនក៏បានចុះមកដល់កន្លែងកើតហេតុខាងលើ និងហៅរថយន្តសាមុយរបស់មន្ទីរពេទ្យមិត្តភាពខ្មែរ-សូវៀត មកដឹកយកទៅព្យាបាល ។
សមត្ថកិច្ចបានធ្វើការវាស់វែងនៅកន្លែងកើតហេតុ និងយករថយន្តម៉ាកហាឡែនឌ័រ និងម៉ូតូធំម៉ាកណៃហតយកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីរង់ចាំធ្វើការដោះស្រាយគ្នាជាក្រោយទៅទៀត៕
ចែករំលែកព័តមាននេះ