អាមេរិក ៖ តាមប្រភពព័ត៌មាន Metro បានឲ្យដឹងថា លោកតាម្នាក់អាយុ៨១ឆ្នាំ ត្រូវបានប៉ូលិសចាប់ខ្លួនបាន ក្រោយពីសួរថ្លៃចង់ទិញក្មេងស្រីអាយុ៨ឆ្នាំក្នុងតម្លៃ២០ម៉ឺនដុល្លារ នៅផ្សារទំនើប Walmart។
កាលពីថ្ងៃសុក្រសប្តាហ៍មុន គេបានឃើញតាចាស់ឈ្មោះ Hellmuth Kolb ចាប់ដៃរបស់ក្មេងស្រីម្នាក់ រួចយកមកថើបនៅមុខម្តាយរបស់នាងដែលកំពុងតែអង្គុយនៅលើបង់ក្នុងហាង Port Orange។
គាត់បានសួរសំនួរជាច្រើនទៅកាន់ម្តាយរបស់ក្មេងស្រី ដែលមានឈ្មោះថា Tracy Nigh។ ដំបូងឡើយ គាត់សួរថា នាងរៀបការហើយឬនៅ? ក្រោយមកក៏សួរនាំចង់ទិញកូនរបស់នាង។ ដោយសារតែចម្លែកពេក Nigh ក៏សម្រេចចិត្តដើរចេញ តែត្រូវបាន Kolb ចាប់ដៃរបស់កូនស្រីនាងជាប់ ហើយថើបភ្លាមតែម្តង។
ដោយទ្រាំមិនបាន Nigh ក៏ទៅប្រាប់សន្តិសុខផ្សារពីអ្វីដែលបានកើតឡើង ខណៈដែលតាចាស់សំបូរតណ្ហារកផ្លូវរត់ចេញយករួចខ្លួន។ Nigh ក៏បានសរសេរសារបង្ហោះចូលក្នុងបណ្តាញសង្គមហ្វេសប៊ុក ពីរឿងរ៉ាវទាំងអស់ ដែលនាងជួបប្រទះនៅក្នុងផ្សារទំនើប Walmart។
ក្រោយមកប៉ូលិសក៏បានប្រើប្រាស់វីដេអូ ដែលថតបានតាមកាមេរ៉ាសុវត្ថិភាពក្នុងផ្សារ និង កំណត់ត្រាការចាយប្រាក់ Credit Card របស់តា Kolb ដើម្បីស្វែងរកយកមកចាប់ខ្លួនសួរចម្លើយ។
ខណៈនេះ តាចាស់ស្រលាញ់ក្មេងត្រូវបានចោទប្រកាន់ពីបទរារាំងមនុស្ស និងបទប៉ះពាល់រាងកាយរបស់អ្នកដទៃដោយគ្មានការយល់ព្រម។ ប៉ូលិសក៏បានធ្វើការស៊ើបអង្កេតបន្ថែម ក្រោយពីលឺដំណឹងថា ករណីនេះធ្លាប់កើតឡើងលើជនរងគ្រោះម្នាក់ទៀតនាពេលកន្លងមក៕ វីដេអូឃ្លីបដកស្រង់ចេញពី ៖ ABC13 Houston
ចែករំលែកព័តមាននេះ