ប្រទេសឥណ្ឌូណេស៊ី ៖ មនុស្សយ៉ាងតិច៣នាក់ស្លាប់ ដោយសារការរញ្ជួយដីថ្មីនៅឥណ្ឌូណេស៊ី បន្ទាប់មកនៅប៉ាពូអាស៊ីនូវែលហ្គីណេ ជិតខាងចន្លោះពេលគ្នាត្រឹមតែ២ម៉ោងប៉ុណ្ណោះ ដោយការរញ្ជួយដីមួយមានកម្លាំង៦រីស្ទ័រ ហើយមួយទៀតមានកម្លាំង៧រីស្ទ័រ។
ដំបូងក្នុងដែនទឹកនៃប្រជុំកោះជ្វា និងកោះបាលីឥណ្ឌូណេស៊ី ដែលដីបានរញ្ជួយនាពេលយប់។ នាព្រឹកថ្ងៃទី១១ តុលា អ្នកនាំពាក្យម្នាក់នៃទីភ្នាក់ងារជាតិគ្រប់គ្រងគ្រោះមហន្តរាយឥណ្ឌួណេស៊ី លោក SUTOPO PURWO NUGROHO រៀបរាប់ពីមនុស្ស៣នាក់់ស្លាប់។
លោកថា មនុស្សទាំង៣នាក់នោះស្លាប់ដោយការបាក់ផ្ទះរបស់ពួកគេសង្កត់ ក្នុងស្រុកស៊ូមីណេប ភាគខាងកើតកោះជ្វា។ ទោះបីការរញ្ជួយដីនេះការខូចខាតមានកម្រិតក្ដី តែវាវាយប្រហារភ្លាមៗដែលពួកគេពុំមានពេលរត់គេចចេញទាន់ពេលវេលា។
ការរញ្ជួយដីនេះកើតមាននាវេលាម៉ោង១៨និង៤៤នាទីម៉ោងសកល នៅភាគឦសានចុងខាងកើតនៃកោះជ្វា ក្នុងជម្រៅ១០,៣គីឡូម៉ែត្រ។ វាបណ្ដាលឲ្យមានការញ័ររង្គើដល់ក្រុង DENPASAR ទីប្រជុំជននៃកោះបាលី។ ការរញ្ជួយដីនេះញ៉ាំងឲ្យប្រជាជនជាច្រើនរត់ចេញពីផ្ទះ។ វាក៏បណ្ដាលឲ្យមានការញ័ររង្គើ រហូតដល់ទីក្រុងស៊ូរ៉ាបាយ៉ា ទីប្រជុំជននៃខេត្តជ្វាខាងកើត ស្ថិតនៅចម្ងាយប្រមាណជា២០០គីឡូម៉ែត្រពីក្រុងស៊ីតូបុនដូ ជាទីក្រុងស្ថិតនៅក្បែរចំណុចកណ្ដាលនៃការរញ្ជួយដីនោះ។
កាលពីថ្ងៃទី២៨ កញ្ញា ការរញ្ជួយដីមួយកម្លាំង៧,៥រីស្ទ័រដែលបណ្ដាលឲ្យមានស៊ូណាមី បានបំផ្លាញផ្នែកយ៉ាងធំនៃប្រជុំកោះសេឡែបឥណ្ឌូណេស៊ី ដោយតុល្យការនៅតែបណ្ដោះអាសន្ននៅឡើយចំនួនអ្នកស្លាប់ឡើងដល់ប្រមាណជាង២០០០នាក់។ ក្រុមអ្នកជួយសង្គ្រោះឥណ្ឌូណេស៊ី នាថ្ងៃទី១១ តុលា បន្តគាស់កកាយគំនរបាក់បែកនៃអគារទាំងឡាយលើកោះសេឡែប សម្រាប់ថ្ងៃចុងក្រោយនៃការតាមរុករកសាកសពជនរងគ្រោះ ដែលតាមតុល្យការបណ្ដោះអាសន្ន មកទល់ពេលនេះអ្នកស្លាប់ឡើងដល់២.០៤៥នាក់ហើយអ្នករបួសមានជាង១០.០០០នាក់។
នៅប៉ាពូអាស៊ីនូវែលហ្គីណេការរញ្ជួយដីកើតមាននាព្រឹកព្រហាម ដោយចំណុចកណ្ដាលរបស់វា ស្ថិតក្នុងជម្រៅជិត៤០គីឡូម៉ែត្រចម្ងាយ១២៥គីឡូម៉ែត្រខាងកើតទីក្រុង KIMBE។ ការរញ្ជួយដីនៅក្នុងប្រទេសនេះពុំទាន់មានសេចក្ដីរាយការណ៍ពីជនរងគ្រោះឬការខូចខាតនៅឡើយ៕
ចែករំលែកព័តមាននេះ