រាជធានីភ្នំពេញ ៖ ចោរ១ក្រុមបានធ្វើសកម្មភាពគាស់ទ្វារឃ្លាំងស្តុកម៉ាស៊ីនដេរមួយកន្លែង ចូលលួចយកអស់រាប់សិបគ្រឿង ក្នុងខណៈពេលដែលម្ចាស់មិននៅជាប់រវល់ទៅលេងស្រុកកំណើត នៅឯប្រទេសវៀតណាម ។ ឃ្លាំងស្តុកម៉ាស៊ីនដេរខាងលើ មានទីតាំងស្ថិតនៅតាមផ្លូវបេតុងខាងជើង មជ្ឈមណ្ឌលកុមារកំព្រា អ៊ិស្លាម ស្ថិតនៅក្នុងភូមិចាក់ជ្រូក សង្កាត់សំរោងក្រោម ជាប់ព្រំប្រទល់ភូមិត្រពាំងពោធិ៍ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ពុំមានប្រភពណាមួយបានដឹងថា ក្រុមចោរចូលទៅធ្វើសកម្មភាពតាំងពីពេលណានោះឡើយ ប៉ុន្តែរហូតដល់វេលាម៉ោង៧ព្រឹកថ្ងៃទី១១ ខែតុលា ឆ្នាំ២០១៨ ។ ទើបអ្នកជិតខាងឃើញទ្វារឃ្លាំងចំហរហើយ ម៉ាស៊ីនដេរនៅក្នុងនោះរាប់សិបគ្រឿងបាត់អស់គ្មានសល់ ។
អ្នកភូមិចាក់ជ្រូកបាននិយាយថា ម្ចាស់ឃ្លាំងខាងលើមិនត្រូវបានស្គាល់ឈ្មោះឡើយ គ្រាន់តែដឹងថា ជាជនជាតិវៀតណាមប៉ុណ្ណោះ ។ នៅក្នុងឃ្លាំងនោះមានម៉ាស៊ីនដេរ ម៉ាស៊ីនផុង ជាច្រើនគ្រឿង ដែលមានតម្លៃរាប់ម៉ឺនដុល្លារ ។ ចំណែកម្ចាស់ឃ្លាំងបានទៅលេងស្រុកកំណើតនៅឯប្រទេសវៀតណាម តាំងពីមុនថ្ងៃភ្ជុំបិណ្ឌមកម្ល៉េះ ដោយបានបិទទ្វារឃ្លាំងនោះចោល ហើយមិនមានសន្តិសុខយាមប្រចាំការនោះឡើយ ។
ប្រភពដដែលបានបន្តថា ក្រុមចោរបានគាស់ទ្វារចូលទៅលួចយកម៉ាស៊ីនដេរទាំងនោះដែលតាមការសន្និដ្ឋានបានបើករថយន្តចូលទៅដឹកចេញតែម្ដង ប៉ុន្តែមិនមាននរណាម្នាក់បានដឹងថា សកម្មភាពនោះកើតឡើងតាំងពីពេលណានោះឡើយ ។ លុះដល់វេលាម៉ោង៧ព្រឹក ថ្ងៃទី១១ ខែតុលា ទើបពួកគាត់ប្រទះឃើញទ្វារឃ្លាំងរបើក ហើយសម្ភារៈរប៉ាត់រប៉ាយ ចំណែកម៉ាស៊ីនដេរបាត់អស់ទើបមានការភ្ញាក់ផ្អើល ។ ខណៈនោះមិនមាននរណាបានដឹងថា ម៉ាស៊ីនដែលបាត់មានប៉ុន្មានគ្រឿង និងគិតជាទឹកប្រាក់មានតម្លៃប៉ុន្មានទេ ចំណែកម្ចាស់មិនទាន់ត្រឡប់មកពីប្រទេសវៀតណាមវិញនៅឡើយ ។
បុរសម្នាក់បាននិយាយថា នៅវេលាម៉ោងប្រមាណ១យប់រំលងអធ្រាត្រឈានចូលថ្ងៃទី១១ ខែតុលា គាត់បានឮសូរសម្លេងរថយន្តបើកទៅឈប់នៅទីនោះ និងឮស្នូរក្រកាកៗដែរ ។ ប៉ុន្តែពុំបានចាប់អារម្មណ៍ថា មានចោរគាស់ទ្វារនោះឡើយ ហើយក៏មិនបានចេញទៅមើលដែរ លុះព្រឹកឡើងក៏ស្រាប់តែប្រទះឃើញឃ្លាំងនោះត្រូវបានចោរគាស់យកម៉ាស៊ីនអស់បែបនេះបាត់ទៅហើយ ៕
ចែករំលែកព័តមាននេះ