ខេត្តកំពង់ឆ្នាំង ៖ ជុំវិញការធ្វើបំលាស់ទីផ្ទះបណ្តែតទឹក ឱ្យទៅតាំងទីលំនៅលើដីគោករបស់អាជ្ញាធរ
ខេត្ត បានជួបបញ្ហាខ្លះៗ សម្រាប់អ្នករស់នៅផ្ទះបណ្តែតទឹកក្នុងក្រុងកំពង់ឆ្នាំង ដោយសារតែពួកគាត់រួញ
រាទៅនៅកន្លែងឆ្ងាយពីទន្លេពេក និងម្យ៉ាងវិញទៀត ទីតាំងថ្មីនោះ គ្មានទឹក គ្មានភ្លើង និងមិនទាន់មានផ្លូវនៅឡើយ។
ដោយហេតុនេះហើយ ប្រជាពលរដ្ឋរស់នៅលើផ្ទះបណ្តែតទឹកក្នុងក្រុងកំពង់ឆ្នាំង បានសំណូមពរ នៅលើគោកចម្ងាយត្រឹម១០០ម៉ែត្រពីច្រាំងទន្លេប៉ុណ្ណោះ ហើយអាជ្ញាធរខេត្តបានទទួលយកសំណូមពរនេះហើយ តែសូមធ្វើលិខិតសុំស្នាក់នៅបណ្តោះអាសន្នលើដីចំណុចស្នើសុំឱ្យបានជាក់លាក់ ។
លោក ស៊ុន សុវណ្ណរិទ្ធ អភិបាលរងខេត្តទទួលបន្ទុករៀបចំបំលាស់ទីផ្ទះបណ្តែតទឹកនេះបានឱ្យដឹងនៅរសៀលថ្ងៃទី៤ ខែតុលាថា ប្រជាពលរដ្ឋរស់នៅលើផ្ទះបណ្តែតទឹកក្នុងក្រុងកំពង់ឆ្នាំង បានសំណូមមកអាជ្ញាធរខេត្ត ដោយសុំអូសផ្ទះបណ្តែតទឹកត្រឹមចំណុចផ្លូវដាច់ ភូមិចុងកោះ ដាក់លើគោកតាមបណ្តោយទន្លេ និងមានចម្ងាយ១០០ម៉ែត្រពីច្រាំងទន្លេ ។ សំណូមពររបស់ពួកគាត់នេះដោយហេតុផលថា សមាគមវៀតណាម ដែលទទួលបន្ទុកក្នុងការរៀបចំទីតាំងសម្រាប់អ្នករស់នៅលើផ្ទះបណ្តែតទឹកទៅរស់នៅ គឺមិនទាន់មានអ្វីនៅឡើយបានត្រឹមតែសន្យា ។
ការសន្យារបស់សមាគមវៀតណាមថា ទីតាំងថ្មីស្ថិតក្នុងឃុំស្វាយជ្រំ ស្រុករលាប្អៀរ ដែលនឹងត្រូវដាក់អ្នកបំលាស់ទីនោះ ត្រូវមានទឹកស្អាតមានភ្លើងអគ្គិសនី និងមានផ្លូវ តែនេះមិនទាន់មានអ្វីទាំងអស់ ហេតុនេះហើយទើបធ្វើឱ្យពួកគាត់មានការរារែក ។ លោកអភិបាលរងខេត្តបន្តថា អាជ្ញាធរខេត្តបានទទួលយកសំណើនេះ តែត្រូវធ្វើជាលាយល័ក្ខណ៍អក្សរ និងផ្តិតមេដៃឱ្យបានត្រឹមត្រូវ មិនអាចធ្វើតែមាត់បានទេ ព្រោះនេះគ្រាន់តែជាសំណូមពររស់នៅបណ្តោះអាសន្នចម្ងាយ១០០ម៉ែត្រពីច្រាំងទន្លេប៉ុណ្ណោះ ។ នៅពេលដែលខាងសមាគមវៀតណាមបានរៀបចំតាមការសន្យាហើយ ពួកគាត់ត្រូវតែទៅរស់នៅទីនោះជាដាច់ខាត ។ លោកក៏បានបញ្ជាក់ដែរថា ការរស់នៅតាមច្រាំងទន្លេ ក៏ត្រូវទាក់ទងជាមួយម្ចាស់ដីគេដែរ ព្រោះភាគច្រើនគឺជាដីចម្ការ ដែលសមាគមត្រូវជួលម្ចាស់ដីឱ្យពួកគាត់រស់នៅជាបណ្តោះអាសន្នរយៈពេលខ្លី ។
សូមបញ្ជាក់ថា បំលាស់ទីរបស់អ្នករស់នៅលើផ្ទះបណ្តែតទឹក គឺជាទិសដៅរបស់អាជ្ញាធរខេត្ត ក្នុងគោលបំណងធ្វើឱ្យទឹកទន្លេស្អាត មានបរិស្ថានល្អ ផ្តល់សុខភាពដល់មនុស្ស និងចង់ឱ្យច្រាំងទន្លេក្លាយជាតំបន់ទេសចរណ៍ផងដែរ ។ ឯការចំណាយជួលឬទិញដីនិងរៀបចំប្រព័ន្ធទឹកស្អាត ផ្លូវថ្នល់ និងអគ្គិសនីឱ្យប្រជាពលរដ្ឋ ទាំងនោះទៅរស់នៅ គឺជាបន្ទុករបស់សមាគមវៀតណាម ។ ទោះបីជាយ៉ាងណា គិតត្រឹមល្ងាចថ្ងៃ
ទី៤ ខែតុលា ការធ្វើបំលាស់ទីផ្ទះបានជាង៣០០ខ្នងហើយ នេះបើយោងតាមរបាយការណ៍របស់គណៈកម្មការរៀបចំបំលាស់ទីផ្ទះបណ្តែតទឹករបស់អាជ្ញាធរខេត្ត ៕
ចែករំលែកព័តមាននេះ