រាជធានីភ្នំពេញ ៖ សមាជិកព្រឹទ្ធសភានៃព្រះរាជណាចក្រកម្ពុជាចំនួន៥៨រូប នៅព្រឹកថ្ងៃទី១១ ខែតុលានេះបានបោះឆ្នោតផ្តល់សេចក្តីទុកចិត្តចំពោះលោក ស៊ឹមកា ធ្វើជាអនុប្រធានទី១ ព្រឹទ្ធសភាជំនួសកៅអីលោក នៃ បេណា ដែលទទួលមរណភាព កាលពីពេលថ្មីកន្លងមកនេះ ។
ការបោះឆ្នោតផ្តល់សេចក្តីទុកចិត្តធ្វើឡើងក្នុងសម័យប្រជុំវិសាមញ្ញព្រឹទ្ធសភា លើកទី៤ ក្រោមអធិបតីភាពសម្តេចវិបុលសេនាភក្តីសាយ ឈុំ ប្រធានព្រឹទ្ធសភា ដោយលើកយករបៀបវារៈចំនួនពីរគឺ ៖១- ប្រកាសទទួលស្គាល់សមាជិកព្រឹទ្ធសភាថ្មីនីតិកាលទី៤ ។ ២- បោះឆ្នោតជ្រើ សរើសអនុប្រធានទី១ ព្រឹទ្ធសភា នីតិកាលទី៤ ។ សមាជិកព្រឹទ្ធសភាដែលចូលរួមប្រជុំចំនួន៥៨រូប នៃចំនួនសមាជិកព្រឹទ្ធសភាសរុបចំនួន៦២រូប បានបោះឆ្នោតមួយសន្លឹកម្តងៗដោយលទ្ធផលលោកស៊ឹម កា ទទួលបានគាំទ្រ៥៨សម្លេងតែម្តង ចំណែកលោកស្រីកង សៅរ៍ធន ត្រូវបានតែងតាំងជាសមាជិកព្រឹទ្ធសភាថ្មីប្រចាំភូមិភាគ៥ ។
សូមជម្រាបថា ការបើកសម័យប្រជុំពេញអង្គព្រឹទ្ធសភានេះ បន្ទាប់ពីគណៈកម្មាធិការអចិន្ត្រៃយ៍ព្រឹទ្ធសភា កាលពីថ្ងៃទី៥ ខែតុលា បានបើកកិច្ចប្រជុំក្រោមអធិបតីភាពលោក ទេព ងន ប្រធាន ស្តីទីព្រឹទ្ធសភា ដោយមានរបៀបវារៈដូចខាងក្រោម៖១- ពិនិត្យ និងសម្រេចសំណើររបស់គ ណបក្សប្រជាជនកម្ពុជាលេខ០៤៨/១៨ និងលេខ០៤៩/១៨ លគ.គក ចុះថ្ងៃទី០៣ និងថ្ងៃទី០៤ ខែតុលា ឆ្នាំ២០១៨ ស្តីអំពីសំណើរសុំផ្លាស់ប្តូរសមាជិកព្រឹទ្ធសភានៅមណ្ឌលភូមិភាគទី៥ និងសំណើរសុំជ្រើសតាំងអនុប្រធានទី១ ព្រឹទ្ធសភាថ្មី ជំនួសលោក នៃ ប៉េណា ដែលបានទទួលមរណភាព កាលពីថ្ងៃទី២៩ ខែកញ្ញា ឆ្នាំ២០១៨ ។
២- ពិនិត្យ និងសម្រេចលើសំណើរបស់សមាជិកព្រឹទ្ធសភា ចុះថ្ងៃទី០៤ ខែតុលា ឆ្នាំ២០១៨ ស្នើសុំព្រឹទ្ធសភាកោះប្រជុំជាវិសាមញ្ញ ។ ៣- កំណត់របៀបវារៈកាលបរិច្ឆេទ និងសមាសភាពលេខាធិការប្រជុំវិសាមញ្ញព្រឹទ្ធសភានីតិកាលទី៤ ៕
ចែករំលែកព័តមាននេះ