រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលចម្រុះចំនួន២ខណ្ឌ មាននគរបាលប៉ុស្តិ៍ ស្ទឹងមានជ័យទី១ នគរបាលព្រហ្មទណ្ឌខណ្ឌមានជ័យ និងកម្លាំងនគរបាលចំណុះខណ្ឌដង្កោ បានពង្រាយកម្លាំងដេញស្ទាក់តាមចាប់ខ្លួន បន្ទាប់ពីរូបគេ ធ្វើសកម្មភាពលួចយករថយន្តពី…
រាជធានីភ្នំពេញ ៖ ជនសង្ស័យម្នាក់ត្រូវបានកម្លាំងនគរបាលចម្រុះចំនួន២ខណ្ឌ មាននគរបាលប៉ុស្តិ៍ ស្ទឹងមានជ័យទី១ នគរបាលព្រហ្មទណ្ឌខណ្ឌមានជ័យ និងកម្លាំងនគរបាលចំណុះខណ្ឌដង្កោ បានពង្រាយកម្លាំងដេញស្ទាក់តាមចាប់ខ្លួន បន្ទាប់ពីរូបគេ ធ្វើសកម្មភាពលួចយករថយន្តពី ប្រជាពលរដ្ឋម្នាក់ នៅចំណុចក្នុងផ្ទះលេខ១៦អឺ ផ្លូវលំ ក្រុមទី៤ ភូមិទ្រា២ សង្កាត់ស្ទឹងមានជ័យទី១ ខណ្ឌមានជ័យ ហើយព្យាយាមជិះរត់គេចតាំងពីខណ្ឌមានជ័យ រហូតដល់ស្រុកកណ្តាលស្ទឹង បង្កឲ្យមានការភ្ញាក់ផ្អើលកាលពីវេលាម៉ោង៨ និង៤០នាទីយប់ ថ្ងៃទី០៩ ខែតុលា ឆ្នាំ២០១៨។
ជនសង្ស័យមានឈ្មោះ ឈៀក ពៅ ភេទប្រុស អាយុ៣៣ឆ្នាំ មុខរបរមិនពិតប្រាកដ មានទីលំនៅផ្ទះជួល ផ្លូវលំ ភូមិទ្រា២ សង្កាត់ស្ទឹងមានជ័យទី១ ខណ្ឌមានជ័យ។ ចំណែកជនរងគ្រោះឈ្មោះ សេង ស្រស់ ភេទប្រុស អាយុ៥៩ឆ្នាំ មុខរបរជាយោធា មានទីលំនៅចំណុចកើតហេតុ។ ដោយឡែករថយន្ត ជនរងគ្រោះម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ 2Y-8904។ តាមប្រភពព័ត៌មានបាន ឲ្យដឹងថា នៅវេលាកើតហេតុ គឺជនរងគ្រោះទើបតែត្រឡប់មកពីស្រុកកំណើតវិញ ដោយពេលនោះ រូបគេបានបើករថយន្តចូលដល់ក្នុងរបងផ្ទះ តែមិនបានបិទទ្វាររបងវិញឡើយ ហើយពេលនោះជនរងគ្រោះ បានទុកសោឡានចោលជាប់នឹងរថយន្ត ដោយពេលនោះរូបគេកំពុងជាប់លើកអីវ៉ាន់ចូលទៅក្នុងផ្ទះ។
ភ្លាមៗនោះស្រាប់តែជនសង្ស័យខាងលើ បានចូលមកលបៗ ហើយបើកទ្វាររថយន្តចូលទៅខាងក្នុង រួចកាច់សោបញ្ឆេះរថយន្តបើករថយន្តថយក្រោយចេញពីផ្ទះជនរងគ្រោះ ហើយព្យាយាមបើករត់គេចតែម្តង ។ បន្ទាប់ពីឃើញជនសង្ស័យខាងលើបើករថយន្តរត់គេចហើយនោះ បុរសជាជនរងគ្រោះ បានឡើងជិះម៉ូតូ ដេញតាមពីក្រោយរថយន្តរហូត ពេលនោះជនរងគ្រោះ បានទូរស័ព្ទផ្តល់ដំណឹងទៅកាន់ នគរបាលប៉ុស្តិ៍ ស្ទឹងមានជ័យទី១ ជាហេតុធ្វើឲ្យកម្លាំងនគរបាល បានប្រកាសតាមវិទ្យុទាក់ទងឲ្យកម្លាំងនគរបាល ពាក់ព័ន្ធទាំងអស់មេត្តាជួយអន្តរាគមន៍ស្ទាក់ចាប់រថយន្តដែលមានភិនភាគដូចរថយន្តជនរងគ្រោះ។
ពេលនោះ កម្លាំងនគរបាលផ្នែកព្រហ្មទណ្ឌ នៃអធិការដ្ឋាននគរបាលខណ្ឌមានជ័យទាំងអស់ បានចេញកម្លាំងជិះម៉ូតូ និងរថយន្តដេញតាមចាប់ តែជនសង្ស័យបានបើករថយន្តចូលទឹកដី នៃខណ្ឌដង្កោ ជាហេតុធ្វើឲ្យកម្លាំងនគរបាលខណ្ឌដង្កោ បញ្ចេញកម្លាំងបន្ថែមក្នុងការដេញតាមចាប់ឃាត់ ។ អំឡុងពេលកម្លាំងនគរបាលជាច្រើនកំពុងដេញប៉ផាប់ចាប់ពភីង ជនសង្ស័យបានបើករថយន្តបុកម៉ូតូ ហុងដាឌ្រីមមួយគ្រឿង បណ្តាលឲ្យម៉ូតូត្រូវរងការខូចខាតទាំងស្រុង តែមិនមានមនុស្សរងរបួសឡើយ។
ភ្លាមៗនោះ រថយន្តមិនបានឈប់ឡើយ គឺព្យយាមបើករត់គេចរហូតដល់ចំណុចស្ពាន៧មករា ព្រំប្រទល់ភ្នំពេញជាមួយស្រុកកណ្តាលស្ទឹង ជនសង្ស័យក៏បួងចង្កួតជ្រុលបុកផ្ទប់នឹងរបងមូលដ្ឋាន អាវុធហត្ថ ស្រុកកណ្តាលស្ទឹង ទាំងកំរោលតែម្តង ជាហេតុធ្វើឲ្យរថយន្តត្រូវបែកកង់ និងផ្ទុះពោងសុវត្ថិភាព មិនអាចបន្តដំណើរទៅមុខទៀតបាន។
ក្រោយបង្កហេតុជនសង្ស័យត្រូវបានកម្លាំងកងរាជអាវុធហត្ថ ស្រុកកណ្តាលស្ទឹង ធ្វើការឃាត់ខ្លួនបានភ្លាមៗ ហើយពេលនោះកម្លាំងនគរបាល ជាច្រើនដែលបាន ដេញចាប់ ក៏បានចុះអន្តរាគមន៍ដល់ទីនោះភ្លាមៗដូចគ្នាផងដែរ។ យ៉ាងណាមិញ នៅយប់ថ្ងៃខែដដែល ជនសង្ស័យត្រូវឃាត់ខ្លួនបណ្តោះអាសន្ននៅមូលដ្ឋានអាវុធហត្ថស្រុក លុះដល់វេលាព្រឹកថ្ងៃទី១០ ខែឆ្នាំដដែល កម្លាំងអាវុធហត្ថសម្រេចប្រគល់ទាំងជនសង្ស័យ រួមជាមួយរថយន្តទៅឲ្យនគរបាល ខណ្ឌមានជ័យវិញ ដែលជាម្ចាស់ករណី ជាអ្នកចាត់ការតាមនីតិវិធីផ្លូវច្បាប់៕
https://youtu.be/b1aV0B_GBAc
ចែករំលែកព័តមាននេះ