បុរស២នាក់បានប្រើកាំបិតសម្លាប់ទាហានអង់គ្លេសម្នាក់ទាំងកណ្តាលថ្ងៃ កាលពីថ្ងៃទី២២ ឧសភា នៅក្បែរបន្ទាយយោធាកងកាំភ្លើងធំនៅឯ WOOLWICH ជាសង្កាត់មួយនាភាគអាគ្នេយ៍ក្រុងឡុងដ៍ ។ បុរសទាំង២នាក់បានបញ្ចេញពាក្យបង្ហាញពីគំនិតអ៊ិស្លាមនិយមជ្រុលមុនពេលប៉ូលិសបាញ់ឱ្យពួកគេរបួស ហើយចាប់ខ្លួន ។
នាយករដ្ឋមន្ត្រីអង់គ្លេស លោកដាវីដ កាមីរ៉ូន ក្នុងសន្និសីទសារព័ត៌មានរួមមួយជាមួយប្រធានាធិបតីបារាំង លោកហ្វ្រង់ស្វ័រ ហូឡង់ នៅក្រុងប៉ារីស ហៅអំពើនោះថា ជាអំពើគួរឱ្យខ្ពើមរអើមបំផុត ដោយលោកបន្តថា នេះជាការវាយប្រហារបែបភេរវកម្មមួយ ។ ប្រទេសអង់គ្លេសដាច់ខាតនឹងមិនបិទបាំងចំពោះការវាយប្រហារទាំងឡាយដូចការវាយប្រហារនៅ WOOLWICH នេះឡើយ ។ ចំណែកប្រធានាធិបតីបារាំងវិញអះអាងពីសាមគ្គីភាពជាមួយអង់គ្លេសក្រោយការធ្វើឃាតទាហានអង់គ្លេសមា្នក់នោះមក ។
នាយករដ្ឋមន្ត្រីអង់គេ្លសបានស្នើម្យ៉ាងទៀតដល់រដ្ឋមន្ត្រីមហាផ្ទៃរបស់លោកឱ្យមានការកោះប្រជុំជាបន្ទាន់មួយរបស់បណ្តារដ្ឋមន្ត្រី និងបណ្តាអ្នកទទួលខុសត្រូវខាងសន្តិសុខ ។ លោកកាមីរូ៉នបានកាត់បន្ថយពេលទស្សនកិច្ចនៅបារាំងដើម្បីវិលត្រឡប់មកកាន់ទីក្រុងឡុងដ៍វិញក្នុងពេលដ៏ឆាប់ ៕
ចែករំលែកព័តមាននេះ