ខេត្តកំពង់ឆ្នាំង ៖ អ្នកធ្វើដំណើរជាច្រើននាក់បានភ័យស្លន់ស្លោរដោយសារតែក្បាលរថភ្លើងរួមនឹងទូរ រថភ្លើងចំនួន2ទៀតបានធ្លាក់ចេញពីផ្លូវដែកបណ្ដាលអោយមានការភ្ញាក់ផ្អើល ។ ហេតុការណ៍នេះបានកើតឡើងនៅវេលាម៉ោង 8និង00នាទីយប់ ថ្ងៃទី 9 ខែតុលា…
ខេត្តកំពង់ឆ្នាំង ៖ អ្នកធ្វើដំណើរជាច្រើននាក់បានភ័យស្លន់ស្លោរដោយសារតែក្បាលរថភ្លើងរួមនឹងទូរ រថភ្លើងចំនួន2ទៀតបានធ្លាក់ចេញពីផ្លូវដែកបណ្ដាលអោយមានការភ្ញាក់ផ្អើល ។ ហេតុការណ៍នេះបានកើតឡើងនៅវេលាម៉ោង 8និង00នាទីយប់ ថ្ងៃទី 9 ខែតុលា ឆ្នាំ2018 នៅចំណុចស្ថានីយ៍រថភ្លើងត្បែងខ្ពស់ស្ថិតនៅក្នុងភូមិត្បែងខ្ពស់ ឃុំត្បែងខ្ពស់ ស្រុកសាមគ្គីមានជ័យ ។
តាមប្រភពពីលោក ដួង ហុង អធិការនគរបាលស្រុកសាមគ្គីមានជ័យបានឲ្យដឹងថា រថភ្លើងជួបហេតុ ការណ៍គ្រោះថ្នាក់ចរាចរណ៍ខាងលើនេះគឺបានដឹកអ្នកដំណើរពីខេត្តបាត់ដំបងឆ្ពោះទៅរាជធានីភ្នំពេញ លុះមកដល់ចំណុចកើតហេតុក៏ស្រាប់តែក្បាលរថភ្លើងបានរត់ខុសចេញពីផ្លូវបណ្ដាលឱ្យធ្លាក់ចេញពីផ្លូវដែក ប៉ុន្តែសំណាងល្អ មិនមានគ្រោះថ្នាក់ដល់មនុស្សនោះទេ គ្រាន់តែរងរបួសស្រាលៗតែប៉ុណ្ណោះ ។
លោកបានបញ្ជាក់ថា ក្រោយពេលកើតហេតុក៏មានរថភ្លើងមកពីរាជធានីភ្នំពេញមកទទួលយកអ្នកដំណើរទាំងអស់នោះបន្តដំណើរទៅមុខទៀត ហើយនៅព្រឹកថ្ងៃទី 10 ខែតុលា នេះមានរថភ្លើងស្ទូចបានមកស្ទួចរថភ្លើងគ្រោះថ្នាក់ខាងលើដើម្បីតម្រង់ដាក់លើផ្លូវ និងបន្តដំណើរទៅមុខទៀតដែរ ។
លោកបានបញ្ជាក់ថា មូលហេតុដែលបណ្ដាលអោយមានគ្រោះថ្នាក់ចរាចរខាងលើគឺដោយសារតែងីបនៃផ្លូវដែកចំណុចស្ថានីយ៍កាច់ខុសគោលដៅទើបបណ្តាលអោយក្បាលរថភ្លើងរត់ខុសផ្លូវ បណ្ដាលឱ្យក្បាលរថភ្លើងរួមទាំងទូររថភ្លើងចំនួន2ទៀតធ្លាក់ចេញពីផ្លូវបែបនេះ ។
លោកបានបញ្ជាក់ថា សំណាងហើយរថភ្លើងមកដល់ស្ថានីយ៍បានបង្អង់ល្បឿនដើម្បីឈប់ហើយក៏ជួបហេតុការណ៍គ្រោះថ្នាក់ចរាចរណ៍បែបនេះប្រសិនបើរថភ្លើងដែលកំពុងមានល្បឿនលឿនវិញ អាចនឹងមានគ្រោះថ្នាក់ដល់មនុស្សធ្ងន់ធ្ងរជាពុំខានមិនចាន ។
គួរបញ្ជាក់ដែរថា បន្ទាប់ពីមានអនុសាសន៍របស់សម្ដេចនាយករដ្ឋមន្ត្រីហ៊ុនសែនដែលដាក់ឲ្យដំណើរការរថយន្តដឹកអ្នកដំណើរដោយមិនគិតថ្លៃក្នុងឱកាសបុណ្យភ្ជុំបិណ្ឌនេះ ក្នុងនោះអយស្ម័យយានកម្ពុជាក៏បានដាក់ឲ្យដំណើរការរថភ្លើងដឹកអ្នកដំណើរផងដែរក្នុងនោះរថភ្លើងដែលដឹកអ្នកដំណើរត្រឡប់ពីបាត់ដំបងវិ ក៏បានជួបហេតុការណ៍ដ៏រន្ធត់នេះ ។
នេះជាលើកទី 1ហើយបន្ទាប់ពីរថភ្លើងទាំងពីរខ្សែរបស់ប្រទេសកម្ពុជា បានធ្វើដំណើរ ឡើងវិញបន្ទាប់ពីអាក់ខានជាង 30 ឆ្នាំ ហើយបានជួបហេតុការណ៍គ្រោះថ្នាក់ចរាចរណ៍បែបនេះ ៕
ចែករំលែកព័តមាននេះ