បុណ្យកុសលដែលសាធុជនបានបំពេញក្នុងអំឡុងបុណ្យភ្ជុំបិណ្ឌដែលទើបកន្លងផុតទៅនេះដូចជាប្រគេនចង្ហាន់ដល់ព្រះសង្ឃ ឧបត្ថម្ភទំនុកបម្រុងគោរពគុណមាតាបិតា ធ្វើទានដល់ក្រខ្សត់ជាដើមនេះ ចាត់ថាជាកំណប់ទ្រព្យដ៏ប្រពៃ ដែលកប់ទុកល្អហើយ គ្មាននរណាដែលមកបំផ្លាញបានឡើយ ជាកំណប់ទ្រព្យដែលជាប់តាមខ្លួនទៅជារៀងរហូត។ កាលបុគ្គលត្រូវលះលោកនេះទៅហើយ វិញ្ញាណរបស់យើងរមែងកាន់យកនូវកំណប់ទ្រព្យ គឺបុណ្យនោះទៅជាមួយដើម្បីជាទីពឹង ដឹកនាំបដិសន្ធិរបស់យើងទៅកាន់សុគតិភព ។
បើតាមព្រះបរមគ្រូជាម្ចាស់សាសនានៃយើងកំណប់ទ្រព្យគឺបុណ្យនេះមិនទូទៅដល់ពួកជនដទៃ
ទេ ជារបស់ដែលចោរលួចទៅមិនបាន ភ្លើងឆេះមិនរលាយ ត្រូវទឹកមិនរលួយ ។ កំណប់ទ្រព្យគឺបុណ្យណាជាប់តាមខ្លួនទៅបាន អ្នកមានបញ្ញាគួរសន្សំនូវកំណប់ទ្រព្យ គឺបុណ្យនោះដោយប្រពៃចុះ ។
កំណប់ទ្រព្យ គឺបុណ្យនោះឲ្យនូវសេចក្តីប្រាថ្នាគ្រប់យ៉ាងដល់ទេវតា និងមនុស្សទាំងឡាយ ពួកទេវតានិងមនុស្សទាំងឡាយប្រាថ្នានូវផលណាៗ ផលទាំងពួងនោះ រមែងសម្រេចដោយកំណប់ទ្រព្យ គឺបុណ្យនោះជាប្រាកដ ។
ភាពជាអ្នកមានសម្បុរផូរផង់ មានសំឡេងពីរោះ ទ្រង់ទ្រាយល្អ រូបល្អ ជាអធិបតី មានយសបរិវារ ផលទាំងអស់រមែងបានដោយកំណប់ទ្រព្យ គឺបុណ្យនោះឯង ។
បុញ្ញសម្បទាទាំងអស់នេះឲ្យសម្រេចប្រយោជន៍ដ៏ធំ ដោយប្រការដូច្នេះ ព្រោះហេតុនោះ អ្នកប្រាជ្ញទាំងឡាយ ទើបសរសើរនូវភាពនៃបុគ្គលជាអ្នកមានបុណ្យធ្វើទុកមកហើយ ។
ចែករំលែកព័តមាននេះ