ថ្ងៃនេះជាថ្ងៃភ្ជុំបិណ្ឌធំ និងជាថ្ងៃបង្ហើយនៃពិធីបុណ្យដ៏ធំមួយនេះ សូមសាធុជនអញ្ជើញទៅបំពេញបុណ្យទានឱ្យបានច្រើនកុះករ និងដើម្បីឧទ្ទិសកុសលផលបុណ្យទៅបុព្វការីជនទាំងឡាយមានមាតាបិតាជាដើមដែលបានចែកឋានទៅហើយនោះ ដើម្បីឱ្យអស់លោកទាំងនោះទទួលមគ្គផលទៅតាមនិស្ស័យកម្មរបស់ខ្លួន និងបានទៅកាន់សុគតិភព។
យោងតាមគម្ពីរដែលទាក់ទងនឹងអានិសង្សបាយបិណ្ឌ បាយបិត្តបូរមានសេចក្តីថា ព្រះដ៏មានព្រះភាគទ្រង់ត្រាស់ ប្រារព្ធអនាថបិណ្ឌិកសេដ្ឋីថា ពួកញាតិទាំងឡាយមាន ម្តាយ ឪពុក ញាតកា បងប្អូនកូនចៅ របស់ជនទាំងឡាយ ដែលបានស្លាប់ទៅមុនៗនោះ ទោះទៅកើតនៅទីណាៗក្តី តែនៅពេលដល់រនោចខែភទ្របទដែលជារដូវភ្ជុំបិណ្ឌ អ្នកទាំងនោះតែងតែមកជួបជុំនៅអំឡុងពេលនេះ ដើម្បីទទួលយកអាហារដែលពួកញាតិឧទ្ទិសទៅ ។
ដោយសារតែតេជៈអានិសង្សនៃបុណ្យកុសល ដែលអស់ញាតិសន្តានបានធ្វើបាយបិណ្ឌ បាយបិត្តបូរ នាខែភទ្របទនេះ ហើយឧទ្ទិសផលជូនទៅនោះ ពួកគេក៏បានរំដោះ រួចអំពីនរក ប្រេត តិរច្ឆាន អសុរកាយនោះហោង។
រីឯសត្វនរកប្រេតទាំងឡាយ ដែលមកកាន់មនុស្សលោកក្នុងរដូវភ្ជុំបិណ្ឌនេះ ប្រេតខ្លះមកកើតជាចាប ជាកណ្តូបខ្មោច ទំយំនៅលើ ដំបូលផ្ទះ ខ្លះទំយំនៅចុងកាត់ផ្ទះ ធ្នឹមផ្ទះ មាត់ទ្វារផ្ទះ ជើងជណ្តើរ ដើមឈើក្បែរផ្ទះ។ ប្រេតខ្លះទៀតមកដល់ពាក់កណ្តាលផ្លូវ ខ្លះមកអើតមើលទៅវិញទៅមក។ ខ្លះបាំងដៃមើលមកពីចម្ងាយ ហើយគិតអាណិតអនិច្ចាខ្លួនថា ឱអញអើយ! អភ័ព្វអ្វីម្ល៉េះ មកកើតជាប្រេត នរក រងទុក្ខវេទនាយូរឆ្នាំណាស់មក ហើយ ស្រេកឃ្លានក្រៃពេក ។
កាលបើដល់ខែភ្ជុំបិណ្ដដែលជនទាំងឡាយ បានរៀបរណ្តាប់បាយបិណ្ឌ បាយបិត្តបូរ ឧទ្ទិសផលានិសង្សបញ្ជូនទៅឲ្យសត្វនរកប្រេតទាំងនោះ ក៏សឹងតែបានរួចរំដោះចាកទីដ៏ថោកទាប ទៅកាន់សុគតិភពអស់កាលជាអង្វែងទៅហោង ។
ចែករំលែកព័តមាននេះ