ពាក្យព្រះអរហន្តនេះប្រហែលជាសាធុជនធ្លាប់ដឹង ធ្លាប់ឮដែរហើយ តែក៏ប្រហែលជាមិនស្គាល់ព្រះអរហន្តនោះជាអ្នកណាឱ្យពិតប្រាកដទេ។ អ្នកខ្លះប្រឹងបន់ព្រះសំពះទេវតា ខំស្វែងរកព្រះដើម្បីគោរពថ្វាយបង្គំ និងបូជាទេយ្យទានដើម្បីយកបុណ្យកុសល តែបែរជាដើរហួសរំលង មិនស្គាល់ព្រះអរហន្តដែលកំពុងរស់នៅក្នុងផ្ទះ ហើយថែមទាំងមិនយកចិត្តគោរពបម្រើគាត់ទៀតផង នេះជាកំហុសធ្ងន់ណាស់។ តាមពិត បើសិនជាគ្មានព្រះអរហន្តពិតៗនេះទេ យើងក៏គ្មានថ្ងៃឃើញព្រះនៅខាងក្រៅដែរ ។
កុំបាច់ឆ្ងល់ថា ព្រះអរហន្តនោះជាអ្នកណា ព្រះអរហន្តគឺជាឪពុកម្តាយហ្នឹងឯង ដែលជានាមរបស់ព្រះបរមសាស្តាទ្រង់ប្រទានឱ្យពិតៗថា អាហុនេយ្យបុគ្គលគឺបុគ្គលគួរបូជា បុគ្គលគួរទទួលយកវត្ថុដែលគេនាំមកបូជាហើយ ពោលគឺពាក្យអាហុនេយ្យបុគ្គលនេះស្មើនឹងពាក្យព្រះអរហន្ត ឬព្រះពុទ្ធហ្នឹងឯង ។
នៅក្នុងមង្គលសូត្រ៣៨ប្រការក៏ព្រះអង្គទ្រង់ត្រាស់សរសើរនូវបុគ្គលដែលបម្រើមាតាបិតាថា កិរិយាបម្រើមាតា១ កិរិយាបម្រើបិតា១ ពោលគឺការទំនុកបម្រុងចិញ្ចឹមលោកដោយបាយ ទឹក នំ ចំណី ត្រី សាច់សម្លៀកបំពាក់ ប្រាក់កាក់សម្រាប់ចាយវាយ ពិសេសទំនុកបម្រុងក្នុងរដូវបុណ្យភ្ជុំបិណ្ឌនេះជាដើម ចាត់ថាជាមង្គលដ៏ឧត្តម ។
ចែករំលែកព័តមាននេះ