ខេត្តកំពត ៖ តាមសេចក្តីរាយការពីសមត្ថកិច្ចនគរបាលចរាចរផ្លូវគោកនៃស្នងការដ្ឋាននគរបាលខេត្តបានឲ្យដឹងថា មានករណីគ្រោះថ្នាក់ចរាចរដ៏រន្ធត់មួយបានកើតឡើងកាលពីវេលាម៉ោង ១១និង១៥នាទីថ្ងៃត្រង់ ថ្ងៃទី៧ ខែតុលា ឆ្នាំ២០១៨ ដែលបង្កឡើងដោយយុវវ័យ៣ នាក់ជិះម៉ូតូម៉ាកសេ១២៥ ពណ៌ខ្មៅ ស៊េរីឆ្នាំ២០១៥ ពាក់ផ្លាកលេខ កំពត ១L-១៨៤៩ ឌុបគ្នាក្នុងល្បឿនលឿន រួចជ្រុលចង្កូតទៅបុកបង្កាន់ដៃស្ពានភ្លោះលើផ្លូវជាតិលេខ៤១ (អង្គឌួង)ចន្លោះគីឡូម៉ែត្រលេខ៥៥-៥៦ ត្រង់ចំណុចស្ពានភ្លោះ ស្ថិតក្នុងភូមិខ្ពបរុន ឃុំស្រែចែង ស្រុកជុំគីរី ខេត្តកំពត ។
ប្រភពបានបន្តថា ជនរងគ្រោះទាំង៣នាក់ជិះម៉ូតូមួយគ្រឿងឌុបគ្នាហើយបង្កគ្រោះថ្នាក់ដោយខ្លួនឯងខាងលើគឺម៉ូតូបើកក្នុងទិសដៅពីជើងទៅត្បូងអ្នកបើកបរមានឈ្មោះ ភាព ភេទប្រុស អាយុ១៧ឆ្នាំ មានទីលំនៅភូមិពងទឹក ឃុំស្រែចែង ស្រុកជុំគីរី ខេត្តកំពត រងរបួសធ្ងន់ត្រូវបានសាច់ញាតិដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗ ចំណែកអ្នករួមដំណើរ២នាក់ ទី១- ឈ្មោះ ហូ ថុល ភេទប្រុស អាយុ១៧ឆ្នាំ រស់នៅភូមិ-ឃុំជាមួយគ្នា (ស្លាប់) និងទី២-ឈ្មោះ ថន ង៉ែត ភេទប្រុស អាយុ១៣ឆ្នាំ រស់នៅភូមិ-ឃុំជាមួយគ្នាបានស្លាប់នៅនឹងកន្លែងកើតហេតុ ។
ប្រភពដដែលបានឲ្យថា ក្នុងករណីបង្កគ្រោះថ្នាក់ដោយខ្លួនឯងខាងលើបណ្តាលឲ្យយុវវ័យ២ នាក់ស្លាប់នៅកន្លែងកើតហេតុភ្លាមៗ និងម្នាក់រងរបួសធ្ងន់ត្រូវបានក្រុមគ្រួសារដឹកទៅសង្គ្រោះនៅមន្ទីរពេទ្យបង្អែកខេត្តភ្លាមៗ ចំណែកសពត្រូវបានសមត្ថកិច្ចទំនាក់ទំនងក្រុមគ្រួសារឲ្យមកដឹកទៅតាមគេហដ្ឋានដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ