ខេត្តសៀមរាប ៖ នៅរសៀលថ្ងៃទី០៦ ខែតុលា ឆ្នាំ២០១៨ លោក ឃឹម ប៊ុនសុង អភិបាលនៃគណៈអភិបាលខេត្តសៀមរាប បានអញ្ជើញចុះត្រួតពិនិត្យការដ្ឋានរៀបចំក្រាលការ៉ូឡា ខាងក្រោយព្រះវិហារ ព្រះអង្គចេក ព្រះអង្គចម ដែលបានកំពុងដំណើរការរួចរាល់ហើយ ។
តាមការបញ្ជាក់របស់លោកអភិបាលខេត្តបានឲ្យដឹងថា ការរៀបចំទីធ្លាកម្សាន្តនេះ គឺបានផ្តល់អត្ថប្រយោជន៍ដល់បងប្អូនប្រជាពលរដ្ឋក្នុងក្រុងសៀមរាបក៏ដូចភ្ញៀវជាតិ និងអន្តរជាតិ ដោយខេត្តសៀមរាប ជាគោលដៅដ៏សំខាន់សម្រាប់ភ្ញៀវទេសចរណ៍លើពិភពលោក ដែលចូលមកទស្សនាកម្សាន្ត ដែលជាខេត្តសម្បូរទៅដោយសម្បត្តិវប្បធម៌ដ៏សម្បូរបែប និងរមណីយដ្ឋានធម្មជាតិ ភ្នំគូលែន បឹងទន្លសាប ។
លោកក៏បានគូសបញ្ជាក់ សមទ្ធិផលដែលយើងគ្រប់គ្នាទទួលបាននេះ គឺកើតចេញពីប្រទេសមានសន្តិភាព ក្រោមកិច្ចដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រី បានធ្វើឲ្យប្រទេសជាតិមានកិច្ចអភិវឌ្ឍន៍រីកចម្រើន ។
ម្យ៉ាងទៀង ក្នុងអណត្តិទី៦នេះ ដើម្បីបំពេញនូវមហិច្ឆតា នៃតម្រូវការរបស់ប្រជាពលរដ្ឋនៅក្រុងសៀមរាប អាជ្ញាធរ ខេត្ត បានណែនាំដល់មន្ទីរសាធារណការខេត្ត ធ្វើការកែសម្រួលសួនច្បារមុខព្រះរាជដំណាក់ ព្រមទាំងធ្វើការរៀបចំក្រាលការ៉ូឡាតាមផ្លូវដើរក្នុងសួន និង ធ្វើការដាំឡើងវិញ នូវផ្កាចម្រុះពណ៌ ដើម្បីលើកនូវសោភណ្ឌភាពមុខព្រះរាជដំណាក់ និង មុខទីកន្លែងទីសក្ការៈបូជា ព្រះវិហារព្រះអង្គចេក ព្រះអង្គចម និង ការទទួលស្វាគមន៍ភ្ញៀវជាតិអន្តរជាតិផងដែរ ។
ក្នុងនោះលោកក៏បានណែនាំដល់គណៈបញ្ជាការឯកភាពរដ្ឋបាលក្រុងសៀមរាប សូមឲ្យរៀបចំទីកន្លែងដាក់ផ្ញើម៉ូតូឲ្យមានសណ្តាប់ធ្នាប់ មិនត្រូវយកមកដាក់នៅ លើដងផ្លូវសាធារណៈឡើយ ព្រមទាំងហាមដាច់ខាតចំពោះរថយន្តដែលមកចតនៅតាមផ្លូវ មុខព្រះវិហារព្រះអង្គចេក ព្រះអង្គចម ដែលធ្វើឲ្យប៉ះពាល់ដល់ការកកស្ទះចរាចរណ៍ នៅមុខព្រះរាជដំណាក់ទៀតផង ។
ដើម្បីបំពេញនូវសេចក្តីតម្រូវការរបស់ប្រជាពលរដ្ឋ ភ្ញៀវជាតិ អន្តរជាតិ អាជ្ញាធរខេត្ត បានធ្វើការរៀបចំក្រាលនូវការ៉ូឡា នៅតាមដងមាត់ស្ទឹង និងដងផ្លូវ កាន់តែធ្វើឲ្យសោភណ្ឌភាពក្រុងបុរាណមួយនេះ រឹតតែមានសម្រស់ក្នុងការ ទាក់ទាញអារម្មណ៍ភ្ញៀវទេសចរណ៍ទៀតផង ។
ក្នុងនោះដែរលោកអភិបាលខេត្តក៏បានធ្វើការណែនាំដល់មេការ ដែលគ្រប់គ្រងការដ្ឋាន ត្រូវធ្វើការជម្រុញពន្លឿនក្រុមជាង ឲ្យយកចិត្តទុកដាក់ក្នុងការក្រាលការ៉ូឡា ធានាបានទាំងគុណភាព និង ឲ្យបានរួចរាល់នៅមុនព្រះរាជពិធីបុណ្យអុំទូកខាងមុខនេះ ។ តាមការបញ្ជាក់លោកមេការ គ្រប់គ្រងការដ្ឋានបានឲ្យដឹងថា ការដ្ឋានក្រាលការ៉ូឡូនេះ នឹងជម្រុញឲ្យចប់រួចរាល់នៅមុន បុណ្យអុំទូកចូលមកដល់ខាងមុខផងដែរ ៕
ចែករំលែកព័តមាននេះ