ខេត្តត្បូងឃ្មុំ ៖ រថយន្តចំនួន០២គ្រឿង បានរងការខូចខាតកម្រិតធ្ងន់ នៅក្នុងហេតុការណ៍គ្រោះថ្នាក់ចរាចរណ៍ដែលបានកើតឡើងនៅលើផ្លូវជាតិលេខ៧៣ ស្ថិតនៅភូមស្វាយកាំបិត ឃុំសេដា ស្រុកតំបែរ កាលពីវេលាម៉ោង៤និង៥០នាទីល្ងាចថ្ងៃទី០៥ តុលា ២០១៨ ។ ប៉ុន្តែបែរជាមានមនុស្សម្នាក់ប៉ុណ្ណោះបានរងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ ។
លោកវរសេនីយ៍ឯក ប៉េង អេងហាក់ អធិការនគរបាលស្រុកតំបែរប្រាប់ឲ្យដឹងថា គ្រោះថ្នាក់ដែលបាន
កើតឡើងនោះរវាងរថយន្តហាយប្រ៊ីត ពណ៌ត្រាវ ពាក់ស្លាកលេខភ្នំពេញ 2N-1968 និងរថយន្តម៉ាកហ៊ីយ៉ានដាយ ពាក់ស្លាកលេខភ្នំពេញ 3B-6463 ចំណុះ២តោនកន្លះ បើកបរដោយជនមិនស្គាល់អត្តសញ្ញាណ ក្រោយកើតហេតុបានរត់គេចខ្លួនបាត់តែម្តង ។
អធិការនគរបាលស្រុកតំបែរប្រាប់បន្តថា រថយន្តហាយប្រ៊ីតបានបើកបរចេញពីរាជធានីភ្នំពេញទៅ
ខេត្តរតនៈគិរីក្នុងទិសដៅពីត្បូងទៅជើង ស្របពេលដែលបើកមកដល់ត្រង់ចំណុចកើតហេតុខាងលើ
បានបុកជាមួយនឹងរថយន្តហ៊ីយ៉ានដាយលាន់ដូចរន្ទះ ក្នុងទិសដៅផ្ទុយគ្នា ។
ក្រោយកើតហេតុរថយន្តហាយប្រ៊ីតបានរងការខូចខាតជាដំណំផ្នែកខាងឆ្វេងហើយក្នុងរថយន្តមានមនុស្សជិះចំនួន០៥នាក់ផងដែរ ។ ដោយឈ្មោះ ចាន់ តុលា ភេទប្រុស អាយុ២៥ឆ្នាំ មិនមានរបួសទេ ហើយមានអ្នករួមដំណើរជាមួយគ្នាឈ្មោះ ហ៊ង វណ្ណារ៉ុង ភេទប្រុស អាយុ២៣ឆ្នាំ រងរបួសធ្ងន់ រស់នៅស្រុកបានលុង ខេត្តរតនៈគិរីជាមួយនឹងអ្នកបើកបរដែរ ។ សមត្ថកិច្ចបានចុះមកដល់ដោយបានហៅរថយន្ត មកដឹកអ្នករងគ្រោះយកមកសង្គ្រោះនៅមន្ទីរពេទ្យ ហើយរថយន្តទាំង០២គ្រឿងត្រូវបានជំនាញចរាចរណ៍ស្រុកអូសនាំមករក្សាទុកនៅអធិការនគរបាលស្រុកតំបែរ ដើម្បីដោះស្រាយតាមច្បាប់ ចំណែកអ្នកបើកបររថយន្តធំបានរត់គេចខ្លួនបាត់ផងដែរ ។
លោកវរសេនីយ៍ត្រី ក្រាយ ណារុំ អធិការរងនគរបាលស្រុកតំបែរទទួលផែនសណ្តាប់ធ្នាប់ប្រាប់ថា
ត្រង់ចំណុចកន្លែងគ្រោះថ្នាក់ខាងលើនោះផ្លូវកោងដូចឥន្ទធនូ ហើយមូលហេតុដែលគ្រោះថ្នាក់ទាក់ទងទៅនឹងកត្តាល្បឿន ។ ជាមួយនោះកម្លាំងជំនាញចរាចរណ៍បានធ្វើការវាស់វែងរួចរាល់ហើយ ដោយបានដឹងថា រថយន្តខាងណាជាអ្នកខុសហើយដែរ ៕
ចែករំលែកព័តមាននេះ