រាជធានីភ្នំពេញ ៖ ក្រសួងសាធារណការ និងដឹកជញ្ជូនបានប្រកាសថា ពង្រឹងបន្ថែមទៀតនូវសុវត្ថិភាពចរាចរណ៍ និងការចូលរួមថែរក្សាបរិស្ថាននៅកម្ពុជា ក្នុងខណៈដែលកម្ពុជាកំពុងប្រឈមនឹងបញ្ហាជាច្រើនដូចជា ការកកស្ទះចរាចរណ៍ និងគ្រោះថ្នាក់ចរាចរណ៍ជាដើម ។…
រាជធានីភ្នំពេញ ៖ ក្រសួងសាធារណការ និងដឹកជញ្ជូនបានប្រកាសថា ពង្រឹងបន្ថែមទៀតនូវសុវត្ថិភាពចរាចរណ៍ និងការចូលរួមថែរក្សាបរិស្ថាននៅកម្ពុជា ក្នុងខណៈដែលកម្ពុជាកំពុងប្រឈមនឹងបញ្ហាជាច្រើនដូចជា ការកកស្ទះចរាចរណ៍ និងគ្រោះថ្នាក់ចរាចរណ៍ជាដើម ។
លោកពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូនមានប្រសាសន៍ថា ការត្រួតពិនិត្យលក្ខណៈបច្ចេកទេសយានយន្តជាទៀងទាត់នឹងរក្សាសុវត្ថិភាពយានយន្ត និងជៀសវាងការបំពុលបរិស្ថាន ។ ជាមួយគ្នានេះនឹងកាត់បន្ថយចំនួនយានយន្តដែលពិបាកជួលជុល និងបណ្តាលឲ្យមានកការកកស្ទះចរាចរណ៍ និងគ្រោះថ្នាក់ចរាចរណ៍ ។ ថ្លែងក្នុងពិធីផ្សព្វផ្សាយពីប្រព័ន្ធស្វ័យប្រវត្តិកម្មចុះបញ្ជី និងត្រួតពិនិត្យលក្ខណៈបច្ចេកទេសយានយន្តនៅផ្សារទំនើបអ៊ីអន២ ខណ្ឌសែនសុខ រាជធានីភ្នំពេញ កាលពីថ្ងៃទី០៥ ខែតុលា លោកពៅ ម៉ាលី បានពន្យល់ថា អ្នកប្រើប្រាស់យានយន្តគ្រប់រូបមានកាតព្វកិច្ចយកយានយន្តទៅត្រួតពិនិត្យលក្ខណៈបច្ចេកទេសយានយន្ត ។
ប្រសិនបើអ្នកប្រើប្រាស់យានយន្តមិនបានត្រួតពិនិត្យលក្ខណៈបច្ចេកទេសបានត្រឹមត្រូវទេនោះ នគរបាលមានសមត្ថកិច្ចនឹងត្រួតពិនិត្យយ៉ាងតឹងរឹង ។ លោកបានឱ្យដឹងទៀតថា ក្រសួងសាធារណការ និងដឹកជញ្ជូនបានធ្វើការអភិវឌ្ឈន៍នូវប្រព័ន្ធចុះបញ្ជី និងត្រួតពិនិត្យលក្ខណៈបច្ចេកទេសយានយន្ត ដើម្បីធ្វើឲ្យប្រសើរឡើងនូវចំណុចមួយចំនួនដូចជា បញ្ហាសុវត្ថិភាពទិន្នន័យ មណ្ឌលផ្ទុកទិន្នន័យរួមជាមួយនឹងជំនួយផ្សេងៗបន្ថែមទៀត ដោយឆ្លើយតបទៅនឹង ការអភិវឌ្ឈលើប្រព័ន្ធព័ត៌មានវិទ្យាដែលមានមុខងារទាំងការទប់ស្កាត់ការប្រើប្រាស់ព័ត៌មានដែលគ្មានការអនុញ្ញាតិ និងការបង្កើនភាពងាយស្រួលផងដែរ ។
ក្រសួងសាធារណការ និងដឹងជញ្ជួនសហការជាមួយភ្នាក់ងារសហប្រតិបត្តិការអន្តរជាតិជប៉ុន ហៅកាត់ថា JICA រៀបចំកម្មវិធីផ្សព្វផ្សាយ និងអប់រំអំពីប្រព័ន្ធស្វ័យប្រវត្តិកម្មនៃការចុះបញ្ជី និងត្រួតពិនិត្យបច្ចេកទេសយានយន្ត ក្នុងរយៈពេល១សប្តាហ៍ ដោយចាប់ផ្តើមពីថ្ងៃទី១ ដល់ថ្ងៃទី៧ ខែតុលានេះ នៅទីតាំងផ្សារទំនើបអ៊ីអន២ ខណ្ឌសែនសុខ រាជធានីភ្នំពេញ ។ ប្រភពដដែលបានឱ្យដឹងទៀតថា កម្មវិធីនេះរៀបចំឡើងក្នុងគោលបំណងផ្សព្វផ្សាយឱ្យកាន់តែទូលំទូលាយអំពីការចុះបញ្ជីយានយន្ត និងត្រួតពិនិត្យលក្ខណៈបច្ចេកទេសយានយន្តទៅកាន់សាធារណៈជន៕
ចែករំលែកព័តមាននេះ