រាជធានីភ្នំពេញ ៖ លោកនុត ពុធដារ៉ា អភិបាលខណ្ឌដង្កោបានថ្លែងណែនាំ និងជំរុញដល់លោក លោកស្រី ដែលជាអភិបាលរងខណ្ឌដង្កោ ព្រមទាំងមន្ត្រីការិយាល័យជុំវិញខណ្ឌទាំងអស់ ត្រូវតែរត់ប្រណាំង…
រាជធានីភ្នំពេញ ៖ លោកនុត ពុធដារ៉ា អភិបាលខណ្ឌដង្កោបានថ្លែងណែនាំ និងជំរុញដល់លោក លោកស្រី ដែលជាអភិបាលរងខណ្ឌដង្កោ ព្រមទាំងមន្ត្រីការិយាល័យជុំវិញខណ្ឌទាំងអស់ ត្រូវតែរត់ប្រណាំង លើការងារឲ្យបានអស់ពីកម្លាំងកាយចិត្ត ក្នុងការបម្រើប្រជាពលរដ្ឋ ។
ត្រូវតែមើលកាងារនៅក្នុងខណ្ឌឲ្យបានសព្វជ្រុងជ្រោយតាំងពីផ្លូវជង្ហុកសម្បុកមាន់ ទឹកលិចផ្ទះប្រជាពលរដ្ឋ ដីហុយ ភក់ជ្រាំ ជាពិសេសបញ្ហាបរិស្ថាន និងការងារជាច្រើនផ្សេងៗទៀតមិនត្រូវបន្ធូរដៃឡើយ ។ ចំណែកការការប្រឡងប្រណាំងការងារនេះអ្នកជាប់ចំណាត់ថ្នាក់ និងទទួលបានជ័យលាភី និងបានរង្វាន់ព្រមទាំងបានប័ណ្ណសសើរ តែបើធ្លាក់វិញ និងត្រូវខ្មាសគេ ។ លោកអភិបាលខណ្ឌថ្លែងបែបនេះ នៅក្នុងពិធីជួបសំណេះសំណាលជាមួយលោក លោកស្រី ដែលជាអភិបាលរងខណ្ឌ ព្រមទាំងមន្ត្រីរាជការការិយាល័យជុំវិញខណ្ឌ នាឱកាសបុណ្យភ្ជុំបិណ្យ នាវេលាម៉ោង២និង៣០នាទីរសៀលថ្ងៃទី៥ ខែតុលា ឆ្នាំ២០១៨ នៅសាលប្រជុំគណៈបក្សប្រជាជនកម្ពុជាខណ្ឌដង្កោ ។
នៅក្នុងខណៈនោះលោកនុត ពុធដារ៉ា បានថ្លែងបន្តទៀតថា ចាប់ពីពេលនេះតទៅយើងត្រូវប្រឹងប្រែង ជាពិសេសការិយាល័យអន្តរវិស័យ ការិយាល័យច្រកចេញចូលតែមួយ និងការិយាល័យបរិស្ថានខណ្ឌ ត្រូវតែខិតខំប្រឹងប្រែងទាំងអស់គ្នា ។ លោកបានណែនាំឲ្យបង្កើតក្រុមបដិសណ្ឋារកិច្ច នៅតាមបណ្ដាសង្កាត់ ដើម្បីបម្រើសេវាសាធារណៈឲ្យបានល្អប្រសើរជូនដល់ប្រជាពលរដ្ឋ ។
ជាចុងក្រោយលោកបានកោតសសើរ និងអរគុណដល់ក្រុមសណ្ដាប់ធ្នាប់ខណ្ឌដែលបានបំពេញភារកិច្ចរក្សាសន្តិសុខជូនប្រជាពលរដ្ឋ និងសម្រួលចរាចរណ៍ព្រមទាំងកើបដីសម្អាតតាមដងផ្លូវផងដែរ ។ ទន្ទឹមនឹងនេះលោកបានបញ្ជាឲ្យក្រុមសន្តិសុខពិនិត្យមើល និងឃាត់រថយន្តធំៗដែលចតចោលតាមផ្លូវ និងបើកបញ្ច្រាស់ទិសត្រូវតែឃាត់ភ្លាម ហើយកុំខ្លាចបើគេរករឿងត្រូវប្រាប់ថា លោកជាអ្នកបញ្ជាព្រោះ រថយន្តទាំងនោះ គឺបង្កការកកស្ទះចរាចរណ៍ ។ ជាពិសេសរថយន្តដឹកខ្សាច់ហូរធ្លាក់លើផ្លូវ បង្កឲ្យប្រឡាក់ ហើយបើចាប់បានកុំផាកយកលុយត្រូវឲ្យអ្នកទទួលខុសត្រូវឡានទាំងនោះលាងចម្ងាយផ្លូវ១គីឡូម៉ែត្រ និងត្រូវពិនិត្យមើលឲ្យច្បាស់តើគាត់លាងមែន ឬមិនមែន ។
លោកសំណូមពរសុំឲ្យមានអ្នកប្រចាំការថ្ងៃភ្ជុំ ជាពិសេសក្រុមពន្លត់អគ្គីភ័យ ក្រុមសន្តិសុខសាលាខណ្ឌ ។ បន្ទាប់លោកបានលោកបានឧបត្ថម្ភដល់មន្ត្រីទាំងអស់ម្នាក់ៗស្រាបៀរ១កេស ,ទឹកក្រូច១កេស , ថវិកា១០ម៉ឺនរៀល ព្រមទាំងប្រេងសាំង ដែលសរុបប្រេងសាំងសម្រាប់ខែ ជូននាពេលនោះមានចំនួន២៦០០លីត្រ ៕
ចែករំលែកព័តមាននេះ