ខេត្តបាត់ដំបង៖ រថយន្ត និងក្រុមគ្រូពេទ្យស្ម័គ្រចិត្តរបស់មន្ទីរសុខាភិបាលខេត្តបាត់ដំបងបានចុះពិនិត្យជួយព្យាបាលជំងឺដល់កងកម្លាំងនគរបាលវរៈសេនាតូចការពារព្រំដែនគោកលេខ៨២៣ និងលេខ៣១០ ព្រមទាំងក្រុមគ្រួសារ តាមរយៈក្រុមគ្រូពេទ្យនៃស្នងការដ្ឋាននគរបាលខេត្តបាត់ដំបង ។
ដែលដឹកនាំដោយលោកឧត្តមសេនីយ៍ត្រី សឿម សារិទ្ធ ស្នងការរងទទួលបន្ទុកសុខាភិបាល តំណាងឲ្យលោកឧត្តមសេនីយ៍ទោ អ៊ុច សុខុន ស្នងការនគរបាលខេត្តបាត់ដំបង នៅក្នុងស្រុកសំឡូតខេត្តបាត់ដំបងវេលាព្រឹកថ្ងៃទី៤ ខែតុលា ឆ្នាំ២០១៨ តាមការមើលឃើញ និងគិតគូរពីសុខមាលភាពពីលោកឱសថការី វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង បាននាំយករថយន្ត (មន្ទីរពេទ្យ) របស់មន្ទីរសុខាភិបាលខេត្តចុះពិនិត្យសុខភាពកងកម្លាំង និងក្រុមគ្រួសារនគរបាលវរៈសេនាតូចនគរបាលការពារព្រំដែនកំពុងឈរជើងការពារបូរណភាពទឹកដី តាមខ្សែបន្ទាត់ព្រំដែន កម្ពុជា- ថៃ នៅស្រុកសំឡូត ខេត្តបាត់ដំបង ។
លោកយឹម វិចិត្រ មេបញ្ជាការវរៈសេនាតូចនគរបាលការពារព្រំដែនលេខ៨២៣ បានបញ្ជាក់ថា ដោយសារតំបន់នេះជាតំបន់ព្រៃភ្នំនៅតាមខ្សែបន្ទាត់ព្រំដែន មានកងកម្លាំងឈរជើងចំនួន៥ផ្នែក និង៤ប៉ុស្ត បានរួមរស់នៅជាមួយប្រជាពលរដ្ឋ ដែលកន្លែងខ្លះមិនអាចធ្វើស្រែបាន ហើយបានចេញចូលទៅធ្វើការនៅប្រទេសថៃ ដោយមានការត្រួតពិនិត្យតាមច្បាប់ត្រឹមត្រូវ តែចំពោះសុខភាព គឺងាយកើតមានជំងឺគ្រុនចាញ់ បើមិនបានប្រយ័ត្នការពារជាមុនទេនោះ ហើយពេលនេះជាឱកាសមួយដែលបងប្អូនទាំងអស់នៅទីនេះ អាចទទួលបានភាពកក់ក្តៅ ចំពោះគ្រូពេទ្យដែលបានចុះមកជួយពិនិត្យដោយផ្ទាល់ ។
លោកឧត្តមសេនីយ៍ត្រី សឿម សារិទ្ធ ស្នងការរងបានថ្លែងថា យើងនៅមានដំណើរចុះតាមកន្លែងផ្សេងៗជាបន្តទៅទៀត តាមខ្សែបន្ទាត់ព្រំដែន ដោយក្នុងរយៈពេល១ថ្ងៃនេះ គឺយើងទទួលបានការព្យាបាល និងផ្តល់ថ្នាំដល់គ្រួសារនគរបាលបានចំនួន៣៦៤នាក់ ក្នុងនោះប៉ូលិសចំនួន៩៦នាក់ និងប្រជាពលរដ្ឋចំនួន២៦៨នាក់ មកពីភូមិដាច់ស្រយាល មានភូមិស្រែននោង ភូមិឆករកា និងភូមិអូរច្រាប ដែលជាតំបន់មានលក្ខណៈភូមិសាស្ត្រឆ្លងកាត់អូរ និងព្រៃភ្នំច្រើនលំបាកក្នុងការធ្វើដំណើរ ។
លោកឈួម សុផាត គ្រូពេទ្យបច្ចេកទេសតំណាងលោកឱសថការី វឿន ប៊ុនរ៉េត ប្រធានមន្ទីរសុខាភិបាលខេត្តបាត់ដំបងបានបញ្ជាក់ផងដែរថា រថយន្តមួយគ្រឿងដែលជាអំណោយរបស់ប្រទេសចិន គឺអាចទទួលបានការត្រួតពិនិត្យបានចំនួន៧មុខ ដែលជាប្រភេទជំងឺទូទៅមានបំពាក់គ្រឿងឧបករណ៍ បរិក្ខាពេទ្យហើយស្រេច អាចថតឆ្លុះមានបន្ទប់ពិសោធន៍បន្ទប់វះកាត់ខ្នាតតូច បន្ទប់ពិនិត្យផ្នែករោគស្ត្រី និងបន្ទប់ពិនិត្យច្រមុះ បំពង់ក ដែលបានចុះតាមតំបន់ជនបទបានចំនួនជាង១០លើកមកហើយ ក្នុងខេត្តបាត់ដំបង ដើម្បីជួយសង្គ្រោះប្រជាពលរដ្ឋដែលជួបការលំបាក ហើយត្រៀមចុះជួយជាបន្តបន្ទាប់ទៅទៀត ។
ថ្លែងនៅចំពោះមុខកងកម្លាំងនគរបាលក៏ដូចជា ក្រុមគ្រួសារនគរបាល លោកឧត្តមសនីយ៍ត្រី សឿម សារិទ្ឋ តាមរយៈ លោកឧត្តមសេនីយ៍ទោ អ៊ុច សុខុន លោកនឹងបន្តសកម្មភាពចុះពិនិត្យ និងព្យាបាលដល់កងកម្លាំងនគរបានពិសេសនគរបាលការពារព្រំដែនឲ្យបានជាប់ជាប្រចាំ ធ្វើយ៉ាងណាឲ្យសុខភាពរបស់កងកម្លាំងនគរបាលកាន់តែល្អ ប្រសើរដើម្បីបម្រើជាតិ និងប្រជាពលរដ្ឋ ។
ជាមួយនេះលោកឧត្តមសេនីយ៍បានថ្លែងអំណរគុណយ៉ាងជ្រាលជ្រៅចំពោះ ការយកចិត្តទុកដាក់ចូលរួមរបស់លោកឱសថការី វឿង ប៊ុនរ៉េត ប្រធានមន្ទីរសុខាភិបាលខេត្តបាត់ដំបង ដែលបានផ្តល់នូវរថយន្ត (មន្ទីរពេទ្យ ) និងក្រុមគ្រូពេទ្យចូលរួមក្នុងសកម្មភាពពិនិត្យ និងព្យាបាលនៅពេលនេះ ៕
ចែករំលែកព័តមាននេះ