រាជធានីភ្នំពេញ ៖ បច្ចុប្បន្ននេះ សហគ្រាសធុនតូច និងមធ្យម(SME)របស់កម្ពុជា មិនទាន់មានដំណោះស្រាយណាមួយសមស្របដើម្បីបង្កើនផលិតភាពនៅឡើយ ខណៈវិស័យនេះកំពុងតែប្រឈមនឹងការចំណាយថ្លៃដើមខ្ពស់ក្នុងការផលិត ។ ជាដំណោះស្រាយ មន្ត្រីជាន់ខ្ពស់នៃក្រសួងឧស្សាហកម្ម…
រាជធានីភ្នំពេញ ៖ បច្ចុប្បន្ននេះ សហគ្រាសធុនតូច និងមធ្យម(SME)របស់កម្ពុជា មិនទាន់មានដំណោះស្រាយណាមួយសមស្របដើម្បីបង្កើនផលិតភាពនៅឡើយ ខណៈវិស័យនេះកំពុងតែប្រឈមនឹងការចំណាយថ្លៃដើមខ្ពស់ក្នុងការផលិត ។
ជាដំណោះស្រាយ មន្ត្រីជាន់ខ្ពស់នៃក្រសួងឧស្សាហកម្ម និងសិប្បកម្ម បានស្នើនិងជំរុញឲ្យម្ចាស់សហគ្រិនទាំងអស់នៅកម្ពុជា ចងក្រងជាបណ្ដុំមួយ ដើម្បីងាយស្រួលគ្រប់គ្រង និងដោះស្រាយរាល់បញ្ហាដែលកើតមានឡើង ។
លោក គឹម ទូច រដ្ឋលេខាធិការក្រសួងឧស្សាហកម្ម និងសិប្បកម្មបានមានប្រសាសន៍ថា ដើម្បីឲ្យខ្សែសង្វាក់ផលិតកម្មរបស់វិស័យ SMEs នៅក្នុងប្រទេសកម្ពុជាកាន់តែប្រសើរឡើង មិនមែនមានតែក្រសួងមួយទេដែលត្រូវខិតខំនោះ តែត្រូវមានការចូលរួមពីគ្រប់ភាគីពាក់ព័ន្ធដូចជា ពីវិស័យឯកជន ជាពិសេសពីវិស័យ SMEsផ្ទាល់តែម្ដង ។ លោកបន្តថា វិស័យSMEs ប្រាកដជាពិបាករីកចម្រើនណាស់ បើមិនមានការលើកទឹកចិត្តពីសំណាក់រាជរដ្ឋាភិបាល និងដៃគូរពាក់ព័ន្ធនានាដូចជាពីវិស័យឯកជនផ្សេងៗ ហើយការចម្រើននោះទេ កំណើនសេដ្ឋកិច្ចរបស់កម្ពុជាក៏ពិបាកនឹងសម្រេចបានទៅតាមផែនការដែរ ដូចនេះហើយទើបរាជរដ្ឋាភិបាលដែលមានក្រសួងឧស្សាហកម្មនិងសិប្បកម្មតែងតែជំរុញ និងលើកទឹកចិត្តរាល់ការច្នៃប្រឌិតនានារបស់សហគ្រិនក្នុងវិស័យ SMEs ។ លោកមានប្រសាសន៍ថា ៖« វិស័យ SMEs មានសារសំខាន់ណាស់ នៅក្នុងប្រទេសនីមួយៗ ជាក់ស្ដែង វិស័យSMEsកម្ពុជា បានជួយផ្ដល់ការងារប្រមាណពី៤០ទៅ៥០ភាគរយនៃចំនួនអ្នកមានការងារសរុបនៅកម្ពុជា ដូចនេះមានន័យថាវាពិតជាបានផ្ដល់នូវប្រយោជន៍ខ្ពស់សម្រាប់សេដ្ឋកិច្ច »។
បើតាមលោកឧកញ៉ា តែ តាំងប៉រ ប្រធានសហព័ន្ធសមាគមសហគ្រាសខ្នាតតូចនិងមធ្យមនៅកម្ពុជា ក្នុងពេលបច្ចុប្បន្នគេមើលឃើញថា សហគ្រាសក្នុងវិស័យ SMEs ភាគច្រើននៅរប៉ាត់រប៉ាយជាលក្ខណៈតាមផ្ទះ និងនៅដាច់ឆ្ងាយពីគ្នា ដូចនេះ ក្នុងនាមជាប្រធានសហព័ន្ធសមាគមសហគ្រាសខ្នាតតូចនិងមធ្យមកម្ពុជា ចង់ឲ្យសហគ្រាសទាំងអស់ចងក្រងជាបណ្ដុំមួយ ដើម្បីងាយស្រួលក្នុងការដោះស្រាយជូន ជាក់ស្ដែងដូចជាតម្លៃភ្លើង តម្លៃទឹកជាដើម ព្រោះបើសិនជាពួកគាត់មកចូលរួមក្នុងបណ្ដុំតែមួយ នោះការស្នើសុំទៅរាជរដ្ឋាភិបាល ដើម្បីបញ្ចុះតម្លៃទឹកភ្លើងសម្រាប់ SMEs នឹងមានប្រសិទ្ធភាពជាង ការនៅដាច់ដោយឡែក ។
លោកបន្តថា ការចង់ក្រងជាបណ្ដុំសហគ្រាសនេះដែរ ក៏អាចជួយបង្កើនគុណភាពក្នុងការផលិតរបស់ម្ចាស់សហគ្រាសព្រោះធម្មតា នៅពេលចងក្រងជាបណ្ដុំនៅកន្លែងតែមួយ វាប្រាកដណាស់ នឹងមានអ្នកគ្រប់គ្រងច្បាស់លាស់ ហើយបើសិនជាម្ចាស់សហគ្រាសនោះ មានបញ្ហា អ្នកគ្រប់គ្រងនឹងដោះស្រាយជូនទៅតាមបញ្ហាជាក់ស្ដែង ៕
ចែករំលែកព័តមាននេះ