ខេត្តស្ទឹងត្រែង ៖ បុរសពីរបានស្លាប់ភ្លាមៗនៅកន្លែងកើតហេតុ បន្ទាប់រថយន្តធុនធំមួយគ្រឿងបុកពេញទំហឹង ក្នុងទិសដៅស្របទិសគ្នាពីជើងទៅត្បូង ស្ថិតនៅចំណុចផ្លូវជាតិលេខ៧ ក្បែរផ្លូវបំបែកអូរពង់មាន់ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង កាលពីវេលាយប់ថ្ងៃទី៤តុលា ២០១៨។
នគរបាលចរាចរណ៍បានឲ្យដឹងថា ជនរងគ្រោះដែលបាត់បង់ជីវិតដោយសារគ្រោះថ្នាក់ចរាចរខាងលើទាំង២នាក់ ម្នាក់ឈ្មោះជួន សុខបូរ៉ា ភេទប្រុស អាយុ២៧ឆ្នាំ មានទីលំនៅក្នុងភូមិរាជានុកូលសង្កាត់ក្រុងស្ទឹងត្រែង ចំណែកម្នាក់ទៀតឈ្មោះពឿន សារ៉ាត់ ភេទប្រុស អាយុ៣៣ឆ្នាំ រស់នៅឃុំទួលសុភី ស្រុកអូររាំងឪ ខេត្តកំពង់ចាម។
ប្រភពព័ត៌មានអោយដឹងថា មុនពេលកើតហេតុ ក្រោយជួបជុំហូបអាហាពេលល្ងាចរួមគ្នាយុវជនទាំងពីរនាក់បានជិះម៉ូតូមួយគ្រឿងម៉ាកអិុចស៊ីនធ័រ ពណ៌ខ្មៅ គ្មានស្លាកលេខ ធ្វើដំណើរចេញពីខេត្តស្ទឹងត្រែងត្រឡប់មកផ្ទះក្នុងទិសដៅពីជើងទៅត្បូង លុះដល់ចំណុចកើតហេតុមានរថយន្តធុនធំមួយគ្រឿងមិនស្គាល់ម៉ាកបើកបរក្នុងល្បឿនលឿនបានបុកពីក្រោយផ្លោងទៅខាងឆ្វេងដៃនៃផ្លូវ បណ្តាលអោយជនរងគ្រោះទាំង២នាក់ស្លាប់ភ្លាមៗនៅនឹងកន្លែងកើតហេតុតែម្តង។
ចំណែកអ្នកបើកបរមិនត្រូវបានស្គាល់អត្តសញ្ញាណបានបើករថយន្តគេចបាត់ស្រមោល ដោយគ្រាន់តែបន្សល់ទុកតែកាងរថយន្តដែលធ្លាក់នៅចំណុចកើតហេតុប៉ុណ្ណោះ ទើបដាក់ការសង្ស័យថាជារថយន្តកូរ៉េ។
បច្ចុប្បន្នសពជនរងគ្រោះទាំង២នាក់ត្រូវបានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែករថយន្តបង្កសមត្ថកិច្ចកំពុងធ្វើការស្រាវជ្រាវរកអត្តសញ្ញាណដើម្បីឲ្យម្ចាស់ចូលខ្លួនមកដោះស្រាយតាមនីតិវិធី៕
ចែករំលែកព័តមាននេះ