រាជធានីភ្នំពេញ៖ ក្នុងរដូវបុណ្យភ្ជុំបិណ្ឌនេះតារាចម្រៀងលោកអ៊ីណូ ជួបរឿងមិនសប្បាយចិត្ត ដ្បិតលោកឳពុកឈឺធ្ងន់ ។ ក្នុងស្ថានភាពបែបនេះលោកបានតែងចម្រៀងរៀបរាប់ពីឪពុកខ្លួនយ៉ាងកម្សត់ ។ ការបង្ហាញបទចម្រៀងថ្មីនេះលោកអ៊ីណូមានបំណងចង់ឲ្យ កូនៗទូទៅសាងអំពើល្អស្តាបដំបូន្មាន់អ្នកមានគុណ និងធ្វើបុណ្យទាន់ឪពុកម្តាយនៅរស់ ។
បន្ទាប់ពីតារាចម្រៀងផលិតកម្មសាន់ដេលោកអ៊ីណូ បង្ហោះតាមយូធូបបទចម្រៀងក្រោមចំណងជើងថា «ពុកឈឺថ្ងៃភ្ជុំ» កាលពីពេល ថ្មីៗកន្លងមក ប្រភពពីផលិតកម្មសាន់ដេ អះអាងថា ជាបទដែលលោកតាក់តែងចេញពីរឿងពិតរបស់ខ្លួន ដោយអត្ថន័យពោរពេញដោយរសជីវិតគួរឲ្យចាប់អារម្មណ៍ ។
នេះជាបទចម្រៀងថ្មី ពាក់ព័ន្ធនឹងរដូវបុណ្យភ្ជុំលើកទី២ហើយ ដែលលោកអ៊ីណូបានបណ្ដែតនៅលើយូធូប បន្ទាប់ពីឆ្នាំមុន បទចម្រៀងមួយបទក្រោមចំណងជើងថា«ប្រយ័ត្នកើតប្រេត» ។ ចំពោះបទចម្រៀងលោក អុីណូ ដែលទើបបង្ហោះក្រោមចំណងជើងថា«ពុកឈឺថ្ងៃភ្ជុំ»មិនមែនគ្រាន់តែនិពន្ធដោយយករឿងពិតនៅក្នុងសង្គមប៉ុណ្ណោះទេ ប៉ុន្តែគឺជារឿងពិតរបស់ម្ចាស់សំឡេងរូបនេះតែម្ដង ដោយសារតែពេលនិពន្ធ និងថតបទចម្រៀង គឺឪពុករបស់លោកអ៊ីណូ មានជំងឺធ្ងន់ ។
ប្រភពដដែលនិយាយថា «ដោយសារតែឪពុកធ្លាក់ខ្លួនឈឺធ្ងន់ចំថ្ងៃដាក់បិណ្ឌ ទើបលោកសរសេរមួយបទនេះចេញ ហើយក្រោយចេញផលិតជាMV ក៏តាក់តែងសាច់រឿងឲ្យត្រូវនឹងអ្វីដែលលោកធ្លាប់បានធ្វើល្អ និងធ្វើមិនគប្បីចំពោះឪពុក ដើម្បីទុកក្រើនរំលឹកដល់កូនៗគ្រប់រូបតែម្ដង »។
ទោះជាយ៉ាងណាក៏ដោយ មកទល់ពេលនេះ ឪពុករបស់លោកអុីបានធូរស្រាលហើយ ទើបម្ចាស់បទចម្រៀងយល់ថាបទចម្រៀងមួយបទនេះមិនខុសពីកាដូជួយឲ្យឪពុកខ្លួនបានធូរស្រាលទេ ។
លោកអ៊ីណូ បានថ្លែងថា «ទាំងខ្លឹមសារ និងសាច់រឿងនៅក្នុងបទនេះ គឺពិតជាផុសចេញពីអារម្មណ៍ភិតភ័យក្នុងពេលឪពុកខ្ញុំឈឺធ្ងន់ប្រាកដមែន ។
ខ្ញុំរំពឹងយ៉ាងខ្លាំងថាបទចម្រៀងនេះ នឹងមានការគាំទ្រច្រើន ដោយសារតែបទចម្រៀងទាំងមូល គឺឆ្លុះបញ្ចាំងពីការខុសឆ្គងរបស់ កូនៗភាគច្រើន ដែលមើលស្រាលពីការប្រឹងប្រែងរបស់ឪពុក និងបង្ហាញឲ្យឃើញពីការលះបង់របស់ឪពុកឡើងអស់ពីកម្លាំងចិត្ត បើទោះជាកូន ម្នាក់ៗច្រើនធ្វើឲ្យលោកពិបាកចិត្តក្តី ។
បទចម្រៀងនេះមិនថាច្រៀង និងសម្ដែង គឺខ្ញុំផ្ទុះអារម្មណ៍ចង់យំតែម្ដង ជាពិសេសនៅពេលនឹកឃើញពេលឪពុកឈឺធ្ងន់ ដោយសារតែជំងឺចាស់ ដូចជាជំងឺលើសឈាមជាដើមនោះ។ មកទល់ពេលនេះ ឪពុកខ្ញុំមិនទាន់បានធូរស្រាលទាំងស្រុងទេ ប៉ុន្តែបើធៀបនឹងដំណាក់ធ្ងន់គឺមិនដូចមុនទេ»៕
ចែករំលែកព័តមាននេះ