ខេត្តបាត់ដំបង ៖ កិច្ចប្រជុំបូកសរុបលទ្ធផលការងារយោធាសន្តិសុខ ខែកញ្ញា និងផែនការខែតុលា ឆ្នាំ២០១៨ របស់យោធភូមិភាគទី៥បានធ្វើឡើងវេលាព្រឹកថ្ងៃទី០៤ ខែតុលា ឆ្នាំ២០១៨ ក្រោមអធិបតីភាពលោកឧត្តមសេនីយ៍ឯក…
ខេត្តបាត់ដំបង ៖ កិច្ចប្រជុំបូកសរុបលទ្ធផលការងារយោធាសន្តិសុខ ខែកញ្ញា និងផែនការខែតុលា ឆ្នាំ២០១៨ របស់យោធភូមិភាគទី៥បានធ្វើឡើងវេលាព្រឹកថ្ងៃទី០៤ ខែតុលា ឆ្នាំ២០១៨ ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជា ការយោធភូមិភាគទី៥, លោកឧត្តមសេនីយ៍ឯក ផាន់ សាមន្ថា នាយរងសេនាធិការចំរុះកងយោធ ពលខេមរៈភូមិន្ទ ដោយមានការចូលរួមពីលោកមេបញ្ជាការរង នាយសេនាធិការ សេនាធិការរងយោធភូមិភាគ មេបញ្ជាការតំបន់ប្រតិបត្តការសឹករង ពោធិសាត់បាត់ដំបង ប៉ៃលិន បន្ទាយមានជ័យ មេបញ្ជាការកងពល កងការពារព្រំដែននាយការិយាល័យចំណុះយោធភូមិភាគសរុប៥០នាក់បានប្រជុំក្នុងទីបញ្ជាការយោធភូមិភាគទី៥ ។
លោក មូល សុភី នាយរងសេនាធិការយោធភូមិភាគទី៥បានអានរបាយការណ៍ប្រចាំខែកញ្ញាកន្លងមកដោយផ្តោតលើបញ្ហាសន្តិសុខរួមក្នុងមូលដ្ឋាន និងតាមព្រំដែនរួមគ្នាទប់ស្កាត់រាល់បទល្មើស បង្កអសន្តិសុខដល់សង្គមជាតិជួយប្រជាពលរដ្ឋដែលជួបគ្រោះមហន្តរាយ ជំរុញវិស័យសេដ្ឋកិច្ចឲ្យកាន់តែមានការរីកចំរើន សំខាន់ការហ្វឹកហ្វឺន ការកសាងអង្គភាពរឹងមាំលើគ្រប់វិស័យ ដើម្បីធានាបាននូវជីវភាពរបស់កងទ័ព ។
ក្រោយពីមានមតិចូលរួមតាមបណ្តាអង្គភាពផ្សេងៗរួចមកលោកឧត្តមសេនីយ៍ឯក ប៊ុន សេង បានមានមតិថា យើងមានកម្មវិធីធំៗជាច្រើននៅចំពោះមុខដែលត្រូវធ្វើបន្ត សំខាន់រំលឹកខួបជាប្រវត្តិសាស្ត្រនៃនយោបាយ ឈ្នះ-ឈ្នះ ដែលត្រូវបានគំរប់ខួប២០ឆ្នាំ និងត្រូវសម្ភោធវិមាន ឈ្នះ-ឈ្នះ នៅពេលខាងមុខនេះ ជាការចងក្រងទុកជាភស្តុតាងប្រវត្តិសាស្ត្រក្នុងការរំដោះប្រទេសជាតិឲ្យបានរួចចាកផុតពីសង្គ្រាមផ្ទៃក្នុងកន្លងមកនោះ គឺមានការលំបាកណាស់ទម្រាំបានសុខសន្តិភាពដូចសព្វថ្ងៃនេះ ហើយសំខាន់តំបន់យោធភូមិភាគទី៥នេះ គឺជាតំបន់ក្តៅលើវិស័យសង្គ្រាម ហើយក៏ជាសកម្មភាពនាំមុខគេលើវិស័យការគ្រប់គ្រង ណែនាំកម្លាំងទ័ព នាំគ្នាមកបង្រួបបង្រួមជាតិ សាងសុខសន្តិភាព ។
លោកបានបន្តអំពីវត្ថុតាងក្នុងការធ្វើសង្គ្រាមពីសម័យនោះមក បើមានអង្គភាព ឬបុគ្គលណានៅសេសសល់ សូមរួមចំណែកយកមករៀបចំដាក់តាំងពិព័រណ នៅវិមានឈ្នះ-ឈ្នះ ដើម្បីតម្កល់ទុកជាវត្ថុតាងប្រវត្តិសាស្ត្រឲ្យកូនខ្មែរជំនាន់ក្រោយបន្តវេនបានយល់ដឹងផងដែរ ៕
ចែករំលែកព័តមាននេះ