ខេត្តមណ្ឌលគិរី ៖ ដំណឹងស្តីពីគម្រោងសិក្សាបង្កើតខេត្តថ្មីនៅភូមិភាគឦសាន ដោយត្រូវកាត់ស្រុកកោះញែក ខេត្តមណ្ឌលគិរី និងស្រុកលំផាត់ ខេត្តរតនគិរី ធ្វើជាខេត្តថ្មីមួយ កំពុងធ្វើឲ្យក្រុមឈ្មួញ និងក្រុមឧក
ញ៉ាៗ ថៅកែអ្នកគួកជេដី សម្រុកនាំគ្នាទៅប្រមូលទិញដីទុកលក់បន្ត ដើម្បីចំណេញទៅថ្ងៃក្រោយយ៉ាងគគ្រឹកគគ្រេង ។ ចំណែកអ្នកស្រុកដែលជាម្ចាស់ទឹកដីក៏មិនបានបង្អែបង្អង់ដែរ គឺនាំគ្នាលក់ភ្លូកទឹកភ្លូកដី ព្រោះកន្លងមកលក់មិនដែលបានថ្លៃឡើយតើចាំអង្កាល់ទៀតម៉ាអាដីបានទទេៗ ។
សកម្មភាពទិញ-លក់ដីក្នុងតំបន់គ្រោងបង្កើតខេត្តថ្មីនេះ ពិតជាធ្វើឲ្យប្រជាពលរដ្ឋនៅទីនោះមានជីវភាពធូរធារជាងមុនពិតមែន ប៉ុន្តែបញ្ហាថ្មីក៏បានកើតមានឡើងដែរ រហូតដល់អាជ្ញាធរខេត្តមណ្ឌលគិរី ចេញសេចក្តីប្រកាសឲ្យប្រជាពលរដ្ឋបញ្ឈប់ការកាប់រានដីព្រៃជាបន្ទាន់ ដ្បិតកំពុងប៉ះពាល់ដល់តំបន់គម្របព្រៃឈើ និងដីព្រៃបម្រុងទុកជាអចិន្ត្រៃយ៍ ។លោក ស្វាយ សំអ៊ាង អភិបាលខេត្ត បានឲ្យដឹងថា «ដោយសារដំណឹងបង្កើតខេត្តថ្មី ធ្វើឲ្យមានសកម្មភាពកាប់ទន្ទ្រានដីព្រៃធ្វើជាកម្មសិទ្ធិផ្ទាល់ខ្លួនគគ្រឹកគគ្រេង…អាហ្នឹង!បើយើងមិនត្រួតពិនិត្យទេ ប្រហែលជាការកាប់ទន្ទ្រានហ្នឹងវាទៅហើយ…ហើយខ្ញុំក៏ឧស្សាហ៍ណែ
នាំមន្ត្រីជំនាញក៏ដូចជាអាជ្ញាធរ ឲ្យជួយត្រួតពិនិត្យនិងទប់ស្កាត់ពីបញ្ហានេះដែរ» ។
លោកអភិបាលខេត្តបន្តថា «ដោយសារតែព័ត៌មានបង្កើតខេត្តថ្មី ប្រជាពលរដ្ឋបានសម្រុកនាំគ្នាចាប់ដីព្រៃនិងកាប់ព្រៃឈើ ដែលធ្វើឲ្យបញ្ហាថ្មីបានលេចឡើង…តែអាជ្ញាធរក៏បានទប់ស្កាត់ទាន់ពេលវេលាខ្លះៗផងដែរ» ។តម្លៃដីបានហក់ឡើងភ្លាមៗ ក្រោយពីលិខិតរបស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ត្រូវបានគេបង្ហោះពេញបណ្តាញសង្គម កាលពីអំឡុងចុងខែសីហា ឆ្នាំ២០១៨ ដើម្បីស្នើដល់ប្រមុខរាជរដ្ឋាភិបាល សិក្សាបង្កើតខេត្តថ្មីលើទឹកដីស្រុកកោះញែក និងស្រុកលំផាត់ ។
ប្រភពព័ត៌មានពីស្រុកកោះញែកបានឲ្យដឹងថា មុនដំណឹងពីការបង្កើតខេត្តត្រូវបែកធ្លាយ ដីនៅតាមបណ្តោយផ្លូវជាតិលេខ៧៦ ឬដីក្នុងផ្សារកោះញែក មានតម្លៃប្រមាណចាប់ពី១.០០០ដុល្លារទៅជាង២.០០០ដុល្លារប៉ុណ្ណោះក្នុងមួយម៉ែត្រ(ម៉ែត្រដើរ) ឬស្ថិតនៅកន្លែងត្រូវប៉ាន់ខ្លាំងអាចមានតម្លៃជាង៣.០០០ដុល្លារ ។ លុះចាប់ពីដើមខែកញ្ញា ឆ្នាំ២០១៨មក តម្លៃដីនៅស្រុកកោះញែកបានហក់ឡើងគុណនឹង២ទៅ៣ដង ដែលធ្វើឲ្យដីក្នុងតំបន់នេះសង្ស័យថារាជរដ្ឋាភិបាលបង្កើតជាទីរួមខេត្តថ្មី(រដ្ឋបាលខេត្ត) ព្រោះមាន
តម្លៃថ្លៃដូចមាសទៅហើយ ។
ទោះជាយ៉ាងណា ក្រុមអ្នកជំនាញវិស័យដីធ្លីបានក្រើនរំឭកដល់ប្រជាពលរដ្ឋ ត្រូវមានការប្រុងប្រយ័ត្នក្នុងការទិញដីនៅតំបន់ខាងលើ ព្រោះកាលណាយើងទិញដោយមិនមានដំណឹងច្បាស់លាស់ ប្រៀបបាននឹងយើងលេងល្បែងអុីចឹងដែរ ដ្បិតទិញដីត្រូវទីតាំងនឹងទទួលផលចំណេញភ្លាមៗ តែបើជាការទិញទាំងប្រថុយប្រថាន វាអាចនាំហានិភ័យនៅថ្ងៃក្រោយ ។ ប៉ុន្តែចំពោះអ្នកមានវិញ ទោះទិញខុសក៏មិនមានបញ្ហាដែរ ដោយសារគេសម្បូរលុយទៅហើយ ។
ចំណែកក្រុមអ្នកតាមដានលើបញ្ហាបរិស្ថានវិញបានកត់សម្គាល់ថា ក្នុងស្រុកកោះញែកសព្វថ្ងៃ កំពុងមានសកម្មភាពមនុស្សដើរបាញ់ថ្នាំពណ៌លើដើមឈើ កំណត់ជាព្រំដីរបស់ខ្លួនរាប់សិបកន្លែង ។ ព្រៃឈើខ្លះកំពុងរងនូវការកាប់ទន្ទ្រានជារៀងរាល់ថ្ងៃ ទោះជាមានបទបញ្ជារបស់អភិបាលខេត្ត ឲ្យទប់ស្តាត់ការកាប់រានព្រៃយកដីនោះក៏ដោយ ។ ព្រោះដឹងស្រាប់ហើយ មនុស្សនិងប្រាក់ដែលគេនិយាយជាទូទៅថា មានប្រាក់ទិញយក្សប្រើ ទិញយក្សជិះលេង ។
សេចក្តីរាយការណ៍ពីស្រុកកោះញែក ក៏បានបង្ហើបឲ្យដឹងថា «មានដីព្រៃជាច្រើនកន្លែងកំពុងជាប់ពាក់ព័ន្ធនឹងអ្នកមានអំណាច ប្រើប្រាស់កម្លាំងប្រជាពលរដ្ឋជាខែលដើម្បីវាតយកដីធ្វើជាកម្មសិទ្ធិ ក្នុងតំបន់ដែនជម្រកការពារសត្វព្រៃភ្នំព្រេច-លំផាត់ និងតំបន់ដែនជម្រកការពារសត្វព្រៃស្រែពក រាប់រយហិកតា ។
ទោះជាយ៉ាងណាក្តី ព័ត៌មាននេះ នៅមិនទាន់មានការអះអាងជាផ្លូវការរបស់អាជ្ញាធរ និងជំនាញពាក់ព័ន្ធនៅឡើយទេ គឺត្រឹមតែគេឮសុសសាយល្បីនៅពេញស្រុកកោះញែកប៉ុណ្ណោះ…»៕
ចែករំលែកព័តមាននេះ