រាជធានីភ្នំពេញ ៖ បុរស២នាក់បានរងរបួសធ្ងន់ត្រូវបានរថយន្តសាមុយដឹកបញ្ចូនទៅកាន់មន្ទីពេទ្យភ្លាមៗ និងមនុស្ស៥នាក់ទៀតបានរងរបួសស្រាល បន្ទាប់ពីពួកគេធ្វើដំណើរដោយរថយន្តកូរ៉េមួយគ្រឿងបានរេចង្កូតទៅបុកកៀររបាំងថ្មពុះចែកទ្រូងផ្លូវ បណ្ដាលឲ្យបាក់អស់៣កង់ ហើយក្រឡាប់ផ្ងារជើងម្ខាង ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង៨និង៤០នាទីយប់ ថ្ងៃទី៤…
រាជធានីភ្នំពេញ ៖ បុរស២នាក់បានរងរបួសធ្ងន់ត្រូវបានរថយន្តសាមុយដឹកបញ្ចូនទៅកាន់មន្ទីពេទ្យភ្លាមៗ និងមនុស្ស៥នាក់ទៀតបានរងរបួសស្រាល បន្ទាប់ពីពួកគេធ្វើដំណើរដោយរថយន្តកូរ៉េមួយគ្រឿងបានរេចង្កូតទៅបុកកៀររបាំងថ្មពុះចែកទ្រូងផ្លូវ បណ្ដាលឲ្យបាក់អស់៣កង់ ហើយក្រឡាប់ផ្ងារជើងម្ខាង ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង៨និង៤០នាទីយប់ ថ្ងៃទី៤ ខែតុលា ឆ្នាំ២០១៨ នៅតាមបណ្ដោយផ្លូវ៥០ម៉ែត្រ ក្នុងសង្កាត់ជើងឯក ខណ្ឌដង្កោ ។
ប្រភពព័ត៌មានពីកន្លែងកើតហេតុបានឲ្យដឹងថា រថយន្តបង្កម៉ាកកូរ៉េមួយតោនកន្លះពណ៌ខៀវ ពាក់ស្លាកលេខស្វាយរៀង 2A-0419 មានមនុស្ស៧នាក់ របួសធ្ងន់២នាក់ស្រាល៥នាក់ ។
យោងតាមសម្ដីរបស់ជនរងគ្រោះម្នាក់ក្នុងចំណោមជនរងគ្រោះផ្សេងទៀតដែលធ្វើដំណើរក្នុងរថយន្តបង្កខាងលើបានប្រាប់ឲ្យដឹងថា នៅពេលកើតហេតុរូបគាត់បានធ្វើដំណើរតាមបណ្ដោយផ្លូវ៥០ម៉ែត្រទិសដៅពីកើតទៅលិច ខណៈមកដល់ចំណុចកើតហេតុមិនដឹងជាយ៉ាងម៉េចរថយន្តបានរេទៅបុករបាំងថ្មពុះចែកទ្រូងផ្លូវ បណ្ដាលឲ្យក្រឡាប់ផ្អៀងជើងម្ខាងតែម្ដងធ្វើឲ្យតៃកុង និងអ្នករួមដំណើរម្នាក់រងរបួសធ្ងន់ព្រមទាំងអ្នករួមដំណើរ៤នាក់ទាំងរូបគាត់ផ្ទាល់រងរបួសស្រាល ។
ក្រោយកើតហេតុជនរងគ្រោះ២នាក់ដែលរងរបួសធ្ងន់ត្រូវបានរថយន្តសង្គ្រោះបន្ទាន់របស់មន្ទីពេទ្យបង្អែកដង្កោដឹកយកទៅសង្គ្រោះភ្លាមៗ ។ ក្រោយមកសមត្ថកិច្ចមូលដ្ឋានបានចុះមកដល់កន្លែងកើតហេតុ ហើយទាក់ទងទៅជំនាញចរាចរណ៍ឲ្យចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញរង់ចាំដោះស្រាយតាមផ្លូវច្បាប់ ៕
ចែករំលែកព័តមាននេះ