ខេត្តពោធិ៍សាត់ ៖ ក្មេងស្រីម្នាក់អាយុ១៧ឆ្នាំ បានត្រូវឪពុកចុងចាប់រំលោភរហូតបានសម្រេច ខណៈបញ្ឆោតនាងឲ្យទៅមើលចម្ការល្ងក្នុងព្រៃជើងភ្នំចេក ស្ថិតក្នុងឃុំអន្សារចំបក់ស្រុកក្រគរ កាលពីថ្ងៃទី១ ខែតុលា វេលាម៉ោង២ និង២០នាទីរសៀល ។
លោកវរសេនីយ៍ឯក ឯម រុន អធិការនគរបាលស្រុកក្រគរ បានឲ្យដឹងថា ជនសង្ស័យឈ្មោះ ចេន អង់ អាយុ៣៩ឆ្នាំ បច្ចុប្បន្នរស់នៅក្នុងឃុំខាងលើ ។ ទាក់ទិននឹងករណីរំលោភសេពសន្ថវៈនេះ លោកអធិការបានសាកសួរសាមីខ្លួនប្រាប់ថា នៅថ្ងៃនោះឪពុកចុងឈ្មោះ ចេន អង់ បានបបួលនិងឌុបនាងទៅមើលចម្ការល្ងនៅចំណុចខាងលើ ។ ប៉ុន្តែនៅពេលទៅដល់ គាត់មិនបានមើលចម្ការទេ បែរជានាំនាងឡើងទៅលើខ្នងភ្នំដោយប្រាប់ថា ដើររកថ្នាំរួច ក៏ចុះមកក្រោមវិញ ។
លុះមកដល់ជើងភ្នំមានអូរមួយ ឪពុកចុងរូបនេះបានចាប់នាងរំលោភរហូតបានសម្រេចទោះបីនាងខំរើបម្រះ និងអង្វរយ៉ាងណាក៏ដោយ ។ ពេលចាប់រំលោភរួច ឪពុកចុងរូបនេះបានឌុបនាងមកផ្ទះវិញ ហើយឲ្យលុយនាងចំនួន៣០.០០០រៀល ជាថ្នូរកុំឲ្យនិយាយប្រាប់ម្ដាយនិងសាច់ញាតិ ។ យ៉ាងណាក៏ដោយ នាងនៅតែប្រាប់ម្ដាយ តែដោយម្តាយមិនអើពើក៏ទៅប្រាប់ជីតា ទើបបែកការណ៍តែម្ដង ។
នៅចំពោះមុខសមត្ថកិច្ច ជនសង្ស័យឈ្មោះ ចេន អង់ បានឆ្លើយថា ខ្លួនមិនបានរំលោភទេគ្រាន់តែចាប់នាងឱបថើបប៉ុណ្ណោះ ។ ទោះបីមានការឆ្លើយបែបនេះក្តី ក៏សមត្ថកិច្ចនៅតែកសាងសំណុំរឿងបញ្ជូនទៅសាលាដំបូង ដើម្បីចាត់ការបន្ត ៕
ចែករំលែកព័តមាននេះ