ខេត្តកំពង់ឆ្នាំង ៖ ជុំវិញការបំលាស់ទីផ្ទះបណ្តែតទឹកឲ្យទៅតាំងទីលំនៅលើដីគោករបស់អាជ្ញាធរខេត្តកំពង់ឆ្នាំងបានជួបបញ្ហាខ្លះ សម្រាប់អ្នករស់នៅផ្ទះបណ្តែតទឹក ក្នុងក្រុងកំពង់ឆ្នាំង ដោយសារតែពួកគាត់រុញរាទៅនៅទីតាំងឆ្ងាយពីទន្លេពេក និងម្យ៉ាងវិញទៀតទីតាំងថ្មីនោះគ្មានទឹកគ្មានភ្លើង និងមិនទាន់មានផ្លូវនៅឡើយ ។
ដោយហេតុនេះហើយប្រជាពលរដ្ឋរស់នៅលើផ្ទះបណ្តែតទឹក ក្នុងក្រុងកំពង់ឆ្នាំងបានសំណូមពរនៅលើគោកចម្ងាយត្រឹម១០០ម៉ែត្រពីច្រាំងទន្លេប៉ុណ្ណោះ ហើយអាជ្ញាធរខេត្តបានទទួលយកសំណូមពរនេះ ហើយតែសូមធ្វើលិខិតសុំស្នាក់នៅបណ្តោះអាសន្ន លើដីចំណុចស្នើសុំឲ្យបានជាក់លាក់ ។
លោក ស៊ុន សុវណ្ណរិទ្ឋ អភិបាលរងខេត្តកំពង់ឆ្នាំងដែលទទួលបន្ទុករៀបចំបំលាស់ទីផ្ទះបណ្តែតទឹកនេះបានឲ្យដឹងនៅរសៀលថ្ងៃទី០៤ ខែតុលានេះថា ប្រជាពលរដ្ឋរស់នៅលើផ្ទះបណ្តែតទឹក ក្នុងក្រុងកំពង់ឆ្នាំងបានសំណូមអាជ្ញាធរខេត្ត ដោយសុំអូសផ្ទះបណ្តែតទឹកត្រឹមចំណុចផ្លូវដាច់ភូមិចុងកោះដាក់លើគោកតាមបណ្តោយទន្លេ និងមានចម្ងាយ១០០ម៉ែត្រពីច្រាំងទន្លេ ។
ការសំណូមពររបស់ពួកគាត់នេះដោយហេតុផលថា សមាគមន៍វៀតណាមដែលទទួលបន្ទុកក្នុងការរៀបចំទីតាំងសម្រាប់អ្នករស់នៅលើផ្ទះបណ្តែតទឹកទៅរស់នៅ គឺមិនទាន់មានអ្វីនៅឡើយបានត្រឹមតែសន្យា ។ ការសន្យារបស់សមាគមន៍វៀតណាមថា ទីតាំងថ្មីស្ថិតក្នុងឃុំស្វាយជ្រុំ ស្រុករលាប្អៀរ ដែលនឹងត្រូវដាក់អ្នកបំលាស់ទីនោះត្រូវមានទឹកស្អាតមានភ្លើងអគ្គិសនី និងមានផ្លូវតែនេះមិនទាន់មានអ្វីទាំងអស់ហេតុនេះហើយធ្វើឲ្យពួកគាត់មានការរារែក ។ លោកបានបន្តថា អាជ្ញាធរខេត្តបានទទួលយកសំណើរនេះតែត្រូវធ្វើលាយលក្ខអក្សរ និងផ្តិតមេដៃឲ្យបានត្រឹមត្រូវមិនអាចធ្វើតែមាត់បានទេ ព្រោះនេះគ្រាន់តែជាសំណូមពររស់នៅបណ្តោះអាសន្នចម្ងាយ១០០ម៉ែត្រពីច្រាំងទន្លេតែប៉ុណ្ណោះ ។ នៅពេលដែលខាងសមាគមន៍វៀតណាមបានរៀបចំតាមការសន្យាហើយ ពួកគាត់ត្រូវតែទៅរស់នៅទីនោះជាដាច់ខាត ។ លោកក៏បានបញ្ជាក់ដែរថា ការរស់នៅតាមច្រាំងទន្លេក៏ត្រូវទាក់ទងជាមួយម្ចាស់ដីគេដែរ ព្រោះភាគច្រើន គឺជាដីចម្ការ ការងារនេះ សមាគម ត្រូវជួលម្ចាស់ដីឲ្យពួកគាត់រស់នៅជាបណ្តោះអាសន្ន រយៈពេលខ្លី ។
សូមបញ្ជាក់ដែរថា ការបន្លាស់ទីរបស់អ្នករស់នៅលើផ្ទះបណ្តែតទឹក គឺជាទិសដៅរបស់អាជ្ញាធរខេត្ត ក្នុងគោលបំណងធ្វើឲ្យទឹកទន្លេស្អាត មានបរិស្ថានល្អ ផ្តល់សុខភាពដល់មនុស្ស និងចង់ឲ្យច្រាំងទន្លេក្លាយជាតំបន់ទេសចរណ៍ផងដែរ ។ ឯការចំណាយជួល ឬទិញដី និងរៀបចំប្រព័ន្ធទឹកស្អាត ផ្លូវថ្នល់ និងអគ្គិសនីឲ្យប្រជាពលរដ្ឋទាំងនោះទៅរស់នៅ គឺជាបន្ទុករបស់សមាគមវៀតណាម ។ ទោះបីយ៉ាងណាគិតត្រឹមល្ងាចថ្ងៃទី៤ ខែតុលា ឆ្នាំ២០១៨នេះ ការបន្លាស់ទីរបស់ផ្ទះបានចំនួនជាង៣០០ខ្នងផ្ទះហើយ នេះបើយោងតាមរបាយការរបស់គណៈកម្មការរៀបចំបំលាស់ទីផ្ទះបណ្តែតទឹករបស់អាជ្ញាធរខេត្តកំពង់ឆ្នាំង ៕
ចែករំលែកព័តមាននេះ