រាជធានីភ្នំពេញ ៖ រដ្ឋបាលរាជធានីភ្នំពេញបានអំពាវនាវដល់បងប្អូនប្រជាពលរដ្ឋទាំងអស់សូមទុកដាក់សំរាមឲ្យបានត្រឹមត្រូវនៅក្នុងថ្ងៃបុណ្យភ្ជុំបិណ្ឌប្រពៃណីខ្មែរ ដើម្បីធានាឲ្យទីក្រុងនេះនៅតែរក្សាសោភ័ណភាព និងបរិយាកាសល្អ គ្មានសំរាមគរនៅតាមផ្លូវជាដើម។
អ្នកនាំពាក្យសាលារាជធានីភ្នំពេញប្រកាសថា ក្រុមហ៊ុនស៊ិនទ្រីនឹងផ្អាកប្រតិបត្តិការប្រមូល និងការដឹកជញ្ជូនសំរាមក្នុងរាជធានីភ្នំពេញចំនួន៦ថ្ងៃ ដោយសារតែកម្លាំងកម្មករត្រូវឈប់សម្រាកទៅលេងស្រុកកំណើតនាឱកាសបុណ្យភ្ជុំបិណ្ឌចាប់ពីថ្ងៃទី៦ដល់ថ្ងៃទី១១ ខែតុលា។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានឱ្យដឹងថា ខណៈដែលក្រុមហ៊ុនស៊ិនទ្រីផ្អាកប្រតិបត្តិការប្រមូលសំរាមនេះ ប្រជាពលរដ្ឋត្រូវទុកដាក់សំរាមឲ្យមានសណ្តាប់ធ្នាប់ដាក់នៅក្នុងធុងសំរាម ឬទុកដាក់នៅក្នុងផ្ទះមួយរយៈសិន ហើយក្រុមអាជីវករលក់ដូរនៅតាមទីសាធារណៈត្រូវមានធុងសំរាមឬថង់ដាក់សំរាមដោយខ្លួនឯង ដើម្បីចៀសវាងការបោះចោលសំរាមគ្មានសណ្តាប់ធ្នាប់ក្នុងរាជធានីភ្នំពេញ ។
លោកបន្តថា ការចូលរួមរបស់ប្រជាពលរដ្ឋតាមសេចក្តីអំពាវនាវនេះ ដើម្បីកុំឲ្យកក់ស្ទះសំរាមឬមានគំនរសំរាមនៅតាមដងផ្លូវដែលធ្វើឲ្យប៉ៈពាល់ដល់សោភ័ណភាព សណ្តាប់ធ្នាប់ អនាម័យ និងបរិស្ថានសាធារណៈក្នុងរាជធានីភ្នំពេញ។
លោកបញ្ជាក់ថា ពាក់ព័ន្ធជាមួយនិងបញ្ហាអនាម័យបរិស្ថានសូមយោគយល់វេចខ្ចប់ទុលដាក់សំរាមអោយបានត្រឹមត្រូវក្នុងលំនៅដ្ឋានរៀងៗខ្លួននៅក្នុងរយៈពេលបុណ្យភ្ជុំបិណ្ឌនេះមួយរយៈសិន ហើយពេលចប់ពិធីបុណ្យភ្ជុំ បងប្អូនកម្មករកម្មការិនីជាអ្នកប្រមូលសំរាមត្រឡប់ពីស្រុកកំណើតមកវិញ ចាំបងប្អូនបញ្ជេញសំរាម ហើយកម្មករនឹងយកទៅចោលនៅតាមទីលានចាក់សំរាម និងធ្វើអោយទីក្រុងរបស់យើងមានសោ
ភ័ណភាពល្អទាំងមុនពេលរដូវបុណ្យភ្ជុំ និងក្រោយពេលរដូវបុណ្យភ្ជុំ។
សូមបញ្ជាក់ថា យោងតាមរបាយការណ៍របស់អាជ្ញាធររាជធានីភ្នំពេញ បានប៉ាន់ប្រមាណថា ក្នុងមួយថ្ងៃៗក្នុងរាជធានីភ្នំពេញមានសំរាមជាង៣ពាន់តោន ដែលត្រូវដឹកទៅកាន់ទីលានចាក់សំរាមដង្កោ ៕
ចែករំលែកព័តមាននេះ