រាជាធានីភ្នពេញ ៖ ប្តីចិនប្រពន្ធខ្មែរពីរនាក់ ត្រូវបានកម្លាំងសមត្ថកិច្ចនគរបាលនាយកដ្ឋនប្រឆាំងការជួញដូរមនុស្ស និងការពារនិតិជនក្រសួងមហាផ្ទៃ ចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ កាលពីព្រឹកថ្ងៃទី៤ តុលា ពាក់ព័ន្ធករណីនាំមនុស្សឆ្លងដែនទៅធ្វើការនៅប្រទេសចិន ដោយកេងប្រវ័ញ្ចកម្លាំងពលកម្មខុសច្បាប់។ បុរសជាប្តីឈ្មោះ ឈិន លាង អាយុ៣២ឆ្នាំ ជាជនជាតិចិន និងស្ត្រីជាប្រពន្ធឈ្មោះ អ៊ុក ចាន់ធូ អាយុ៣២ឆ្នាំ មានទីលំនៅផ្ទះលេខ៣៧ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។ ទាក់ទិននឹង ការបញ្ជូនខ្លួនជនសង្ស័យ២នាក់ប្តីប្រពន្ធទៅកាន់សាលាដំបូងរាជធានីភ្នំពេញនោះ ត្រូវបានមន្ត្រីនគរបាលឲ្យដឹងថា គឺជាការធ្វើឡើងតាមពាក្យបណ្តឹងរបស់ជនរងគ្រោះម្នាក់ ដែលត្រូវអាជ្ញាធរចិនបណ្តេញឲ្យមកស្រុកខ្មែរវិញ និង បណ្តឹងរបស់ជនរងគ្រោះ៦នាក់ទៀត ដែលខ្លះកំពុងជាប់ឃុំនៅប្រទេសចិននោះ។
ដើមចម នៃរឿងនេះ កាលពីចុងឆ្នាំ២០១៧ ជនសង្ស័យឈ្មោះ ឈិន លាង បានទទួលបញ្ជាពីឈ្មោះ អ៊ូ ភេទប្រុស អាយុ៥២ឆ្នាំ ជនជាតិចិន និងជាថៅកែកាស៊ីណូខុសច្បាប់នៅសង្កាត់ឃុនសាន ក្រុងស៊ូចូវ ខេត្តជាំងស៊ូ ប្រទេសចិន ឲ្យជួយរកមនុស្សពីស្រុកខ្មែរដើម្បីទៅធ្វើការនៅក្នុងកាស៊ីណូរបស់គេបើរកមនុស្សបានហើយ រាល់ការចំណាយផ្សេងៗ គឺគេ(អ៊ូ)ជាអ្នកចេញទាំងអស់។ បន្ទាប់ពីទទួលបានការណែនាំនេះ ឈ្មោះ ឈិន លាង បានប្រាប់ប្រពន្ធខ្មែរមានឈ្មោះ អ៊ុក ចាន់ធូ ឲ្យជួយផ្សព្វផ្សាយ និងជ្រើសរើសរកមនុស្សដើម្បីទៅធ្វើការនៅទីនោះ។ មន្ត្រីនគរបាលបន្តថា ពេលឈ្មោះ អ៊ុក ចាន់ធូ បានព័ត៌នេះពីប្តីហើយក៏ទាក់ទងឈ្មោះ ម៉ាទូ ភេទប្រុស អាយុ៣០ឆ្នាំ (មិនស្គាល់អាសយដ្ឋាន) ធ្លាប់ធ្វើការនៅកាស៊ីណូក្នុងស្រុកខ្មែរឲ្យជួយផ្សព្វផ្សាយបន្ត និង បានឲ្យលេខទូរស័ព្ទសម្រាប់ទាក់ទងពីខ្លឹមសារឃោសនា។
ក្រោយមកឈ្មោះ អ៊ុក ចាន់ធូ បានជ្រើសរើសរកមនុស្សបាន៧នាក់ មាន១.ឈ្មោះ ទូច ប៊ុនហេង ២.ឈ្មោះ សុខ ណារ៉ាយ ៣.ឈ្មោះ សៅ រស្មី ៤.ឈ្មោះ ហេង ឪទី ៥.ឈ្មោះ ជឺ ច័ន្ទណា ៦.ឈ្មោះ ទឹម ផាន់ណា និង៧.ឈ្មោះ សូ ឡេងស្រេង (ក្នុងនោះមានប្រុស៤ នាក់ ស្ត្រី៣នាក់)។ ជនសង្ស័យឈ្មោះ អ៊ុក ចាន់ធូ បាននិយាយបញ្ចុះបញ្ចូលទៅកាន់ មនុស្ស៧នាក់នោះថា គេយកទៅធ្វើការនៅកាស៊ីណូប្រទេសចិន ដោយសន្យាឲ្យប្រាក់ខែម្នាក់១ ២០០ដុល្លារអាមេរិកក្នុង១ខែ ហើយការចំណាយការផ្សេងៗ ដូចជាសំបុត្រយន្តហោះ និងលិខិតឆ្លងដែន ថៅកែកាស៊ីណូគេចេញទាំងអស់។
ផ្ទុយទៅវិញក្រោយពេលនាំជនរងគ្រោះទាំង៧នាក់ទៅដល់ស្រុកចិន ត្រូវបានគេបង្ខំឲ្យធ្វើការងារខុសគោលដៅ និងមិនបានប៉ុន្មានខែផងត្រូវបានអាជ្ញាធរចិនចាប់ដាក់គុក ពីបទស្នាក់នៅខុសច្បាប់អន្តោប្រវេសន៍។ ជាក់ស្តែងស្ត្រីម្នាក់ដែលត្រូវគេយកទៅលក់ឲ្យបម្រើផ្លូវភេទតៗ គ្នារហូតមានគ័ភ៌ក្នុងផ្ទៃ ហើយត្រូវបានអាជ្ញាធរចិនចាប់បញ្ជូនឲ្យត្រឡប់មកស្រុកខ្មែរវិញ នោះជាសំណាងដែលនាងមានផ្ទៃពោះ។ សំណុំរឿងជនសង្ស័យពីរនាក់ប្តីកំពុងស្ថិតនៅដំណាក់កាល តំណាងអយ្យការសាលាដំបូងធ្វើការសាកសួរ និងក្រោយពីសាកសួរចប់សព្វគ្រប់ ទើបចោទប្រកាន់ជាផ្លូវការណ៍ ដើម្បីចាត់បញ្ជូនទៅចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្ន រង់ចាំផ្តន្ទាទោសតាមច្បាប់ជាធរមាន៕
https://youtu.be/-N6SKB0XtqI
ចែករំលែកព័តមាននេះ