ខេត្តប៉ៃលិន ៖ បន្ទាប់ពីមានសេចក្តីណែនាំពីខាងក្រសួងទេសចរណ៍រហូតមកដល់ពេលនេះ មន្ទីរទេសចរណ៍ខេត្តប៉ៃលិនបានសហការជាមួយមន្ទីរជុំវិញខេត្ត ដើម្បីត្រៀមរៀបចំខ្លួនទទួល ភ្ញៀវទេសចរណ៍ដែលនឹងមកលេងកម្សាន្តនៅរមណីយដ្ឋាន៥កន្លែង ក្នុងចំណោម១៤កន្លែងទូទាំងខេត្តប៉ៃលិន ។
បើតាមប្រភពព័ត៌មានពីលោក លឹម វាសនា ប្រធានមន្ទីរទេសចរណ៍ដែលទើបនឹងតែងតាំងថ្មី បានឱ្យដឹងកាលពីព្រឹកថ្ងៃទី០៤ ខែតុលា ឆ្នាំ២០១៨នេះថា បន្ទាប់ពីមានសេចក្តីណែនាំពីខាងក្រសួងខាងមន្ទីររបស់លោកបានសហការជាមួយនឹងមន្ទីរជំនាញជុំវិញខេត្តធ្វើការរៀបចំសណ្តាប់ធ្នាប់នៅតាមរមណីយដ្ឋានទាំង១៤កន្លែង តែរមណីយដ្ឋានដែលមានការទាក់ទាញភ្ញៀវទេសចរណ៍ច្រើនជាងគេ មានតែចំនួន៥កន្លែងប៉ុណ្ណោះ គឺទី១- រមណីយដ្ឋានប្រវត្តិសាស្ត្រភ្នំយ៉ាត ទី២- រមណីយដ្ឋានអេកូទេសចរណ៍ទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ទី៣- រមណីយដ្ឋានកែច្នៃចម្ការខ្នុរ ទី៤- រមណីយដ្ឋានកែច្នៃភ្នំដំបង និងទី៥- រមណីយដ្ឋានកែច្នៃហ្លួងរតនៈ ។
លោកបន្តទៀតថា នៅរដូវបុណ្យភ្ជុំនាឆ្នាំ២០១៨នេះសង្ឃឹមថា នឹងមានភ្ញៀវទេសចរធ្វើដំណើរមកលេងកម្សាន្តច្រើនជាងឆ្នាំមុនៗព្រោះនៅតាមផ្លូវចូលទៅកន្លែងកម្សាន្តទាំងអស់កំពុងចាប់ផ្តើមឈូសឆាយជួសជុលជាបណ្តើរៗហើយ ដោយមិនធ្វើឱ្យភ្ញៀវទេសចរជាតិ និងអន្តរជាតិមានការខកចិត្តនោះទេ ។ លោកបញ្ជាក់ទៀតថា ចំណែករមណីយដ្ឋានតូចៗចំនួន៩កន្លែងទៀតក៏អាចនឹងមានភ្ញៀវចូលមកលេងកម្សាន្តកុះករផងដែរ ខណៈម្ចាស់កន្លែងក៏ដូចជា ខាងមន្ទីរកំពុងដុតដៃដុតជើងរៀបចំតុបតែងទីធ្លា និងស្វះស្វែងធ្វើម្ហូបអាហារឆ្ងាញ់ៗជូនភ្ញៀវដែលចូលទៅពិសារឱ្យបានឆ្ងាញ់ផងដែរ ។
លោកក៏បង្ហើបដែរថា នៅមានរមណីយដ្ឋានមួយចំនួនទៀតដូចជាទឹកធ្លាក់ក្បាលដំរី ទឹកធ្លាក់ អន្លង់ខៀវ ដែលមានចំងាយពីក្រុងប៉ៃលិនប្រមាណ៦ទៅ៧គីឡូម៉ែត្រ ស្ថិតនៅភាគខាងលិច ឈាងខាងត្បូងជាកន្លែងដែលមានទឹកធ្លាក់ច្រើន និងមានទេសភាពស្រស់ស្អាត គួរឱ្យចង់គយ គន់នោះខាងអាជ្ញាធរកំពុងតែស្វះស្វែងរកដៃគូ និងក្រុមហ៊ុនចូលទៅអភិវឌ្ឍន៍ ដើម្បីធ្វើឱ្យវិស័យទេសចរណ៍កាន់តែទាក់ទាញភ្ញៀវឱ្យចូលមកលេងខេត្តប៉ៃលិនកាន់តែច្រើនឡើងៗផងដែរ ។
ចំណែកប្រជាពលរដ្ឋ និងភ្ញៀវទេសចរបានលើកឡើងថា ខេត្តប៉ៃលិនបច្ចុប្បន្នមានការរីកចម្រើនជាងមុនឆ្ងាយដោយមានផ្លូវគ្រប់ច្រកល្ហក ជាពិសេសផ្លូវធ្វើដំណើរទៅលេងរមណីយដ្ឋានក៏បង្កភាពងាយស្រួលក្នុងការធ្វើដំណើរមិនលំបាកដូច កាលពីមុននោះទេ ហើយជាពិសេសអាជ្ញាធរខេត្តតែងតែយកចិត្តទុកដាក់ឈូសឆាយផ្លូវខូចខាត និងផ្លូវថ្មីៗថែមទៀត សម្រាប់បម្រើពលរដ្ឋផ្នែកវិស័យកសិកម្មក៏ដូចជា វិស័យទេសចរឱ្យកាន់តែរលូនទៅមុខ ៕
ចែករំលែកព័តមាននេះ