ខេត្តក្រចេះ ៖ អាជ្ញាធរខេត្តបានចុះអនុវត្តវិធានការក្តៅលើពលរដ្ឋមួយចំនួន ដែលមានចេតនាចូលទៅឈូសឆាយកាន់កាប់ដីទំហំជាង៨០ហិកតា នៅឃុំឃ្សឹម ស្រុកស្នួល ដោយអាជ្ញាធរអះអាងថា ដីដែលពលរដ្ឋទាំងនោះចូលកាន់កាប់ដោយខុសច្បាប់ សុទ្ធសឹងជាដីសម្បទានសង្គមកិច្ចដែលត្រូវបានអាជ្ញាធរបែងចែកជូនពលរដ្ឋដែលមានឈ្មោះទទួលមានចំនួនជាង៨០គ្រួសារ។
ការអនុវត្តវិធានការនេះ ក៏មានការប្រឈមមុខដាក់គ្នាដែរ រវាងអាជ្ញាធរមានសមត្ថកិច្ចខេត្ត និងស្រុក កាលពីថ្ងៃទី២ ខែតុលា និងពលរដ្ឋ១គ្រួសារដែលមានចេតនារំលោភយកដីទំហំជាង
៨០ហិកតានៅភូមិស្រែរនាម ឃុំឃ្សឹម ដែលពួកគេបានព្យាយាមក្លែងឯកសារកាន់កាប់ ។
ក្រោយពីមានការប្រឈមមុខដាក់គ្នា អាជ្ញាធរបានសម្រេចចុះបោះបង្គោលព្រំបែងចែកដីទំហំជាង៨០ហិកតា ជូនពលរដ្ឋ៨៦គ្រួសារដែលមានឈ្មោះទទួលបានដីសម្បទាននេះឲ្យបានចូលកាន់កាប់ដោយស្របច្បាប់ ។
អភិបាលស្រុកស្នួល លោក គង់ គឹមនី បានថ្លែងឲ្យដឹងថា ដីនៅតំបន់នោះជាដីសម្បទានសង្គមកិច្ច មានទំហំជិត៤០០ហិកតា ដែលអាជ្ញាធរបានរៀបចំបែងចែកជូនពលរដ្ឋចំនួន ២៣៦គ្រួសារ ។ ការបែងចែកគឺធ្វើឡើងតាំងពីឆ្នាំ២០១៤មកម្ល៉េះ ដោយក្នុង១គ្រួសារៗទទួល បានដីសង្គមកិច្ចទំហំ២០ម៉ែត្រគុណ៤០មែត្រ និងដីកសិកម្មទំហំ២ហិកតា ។
ប៉ុន្តែយ៉ាងណាក៏ដោយ មានដីទំហំជាង៨០ហិកតាស្មើនឹង៤១ឡូត៍ត្រូវបានពលរដ្ឋមួយចំនួនតូច ចូលរំលោភយកនិងក្លែងឯកសារកាន់កាប់ ។ ពលរដ្ឋមួយចំនួនតូចនោះ បានព្យាយាមយកគ្រឿងចក្រមកឈូសឆាយរុករានកាន់កាប់និងសាងសង់កូនខ្ទមជាបន្តបន្ទាប់ បើទោះបីជាអាជ្ញាធរបានព្យាយាមរារាំងយ៉ាងណាក៏ដោយ ។ មិនតែប៉ុណ្ណោះ ថែមទាំងបានកៀរគរមនុស្សមកពីតំបន់ផ្សេងទៀត ឲ្យមកចូលកាន់កាប់ដីនៅតំបន់នោះដោយខុសច្បាប់ទៀតផង ។
លោក គង់ គឹមនី បញ្ជាក់ថា ពលរដ្ឋចំនួន៨៦គ្រួសារដែលមានឈ្មោះទទួលបានដីសង្គមកិច្ច ដីកសិកម្ម និងដីលំនៅឋាន អស់រយៈពេលជាច្រើនឆ្នាំមកនេះ មិនអាចចូលទៅកាន់កាប់បានទេ ដោយសារតែមានការរារាំងពីជនមួយក្រុមដែលលួចចូលកាន់កាប់ដោយខុសច្បាប់នេះ ។
លោកថ្លែងថា អាជ្ញាធរស្រុកបានព្យាយាមសម្របសម្រួលអស់ពីលទ្ធភាព តែក្រុមពលរដ្ឋដែលចូលមកចាប់ដីនោះមិនទទួលយកដំណោះស្រាយណាមួយឡើយ ទើបអាជ្ញាធរប្រើវិធានការច្បាប់ដើម្បីចូលអនុវត្តការងារបោះបង្គោលព្រំបែងចែកដីសម្បទានមួយកន្លែងនេះតែម្តង ៕
ចែករំលែកព័តមាននេះ