រាជធានីភ្នំពេញ ៖ ក្នុងរយៈពេលចុងក្រោយ គេកត់សម្គាល់ថា សហព័ន្ធកីឡាបាល់ទះកម្ពុជាកាន់តែពង្រឹងសមត្ថភាពទ្វេដង ដោយក្រៅពីបានសម្រាំងរកកីឡាករជម្រើសជាតិឱ្យបានល្អ ក៏បានទទួលគ្រូបង្វឹកជំនាញម្នាក់មកពីក្រៅប្រទេសដើម្បីជួយផងដែរ។ សហព័ន្ធបានទាំងជំរុញឲ្យក្លិប និងសមាគមបាល់ទះទាំងអស់ ពង្រឹងសមត្ថភាពឱ្យបានខ្លាំងដើម្បីត្រៀមខ្លួនចូលរួមប្រកួតជាលក្ខណៈអន្តរជាតិ…
រាជធានីភ្នំពេញ ៖ ក្នុងរយៈពេលចុងក្រោយ គេកត់សម្គាល់ថា សហព័ន្ធកីឡាបាល់ទះកម្ពុជាកាន់តែពង្រឹងសមត្ថភាពទ្វេដង ដោយក្រៅពីបានសម្រាំងរកកីឡាករជម្រើសជាតិឱ្យបានល្អ ក៏បានទទួលគ្រូបង្វឹកជំនាញម្នាក់មកពីក្រៅប្រទេសដើម្បីជួយផងដែរ។
សហព័ន្ធបានទាំងជំរុញឲ្យក្លិប និងសមាគមបាល់ទះទាំងអស់ ពង្រឹងសមត្ថភាពឱ្យបានខ្លាំងដើម្បីត្រៀមខ្លួនចូលរួមប្រកួតជាលក្ខណៈអន្តរជាតិ និងការប្រកួតស៊ីហ្គេមលើកទី៣២ ដែលកម្ពុជានឹងធ្វើជាម្ចាស់ផ្ទះនៅពេលខាងមុខនោះផង ។ នេះបើយោងតាមសហព័ន្ធកីឡាបាល់ទះកម្ពុជាដែលបានប្រកាសឡើងជាប្រចាំ ដើម្បីអភិវឌ្ឍន៍សហព័ន្ធទាំងមូលឱ្យមានការរីកចម្រើន។
មន្ត្រីសហព័ន្ធបានអះអាងថា ដើម្បីធ្វើឱ្យវិស័យកីឡាបាល់ទះទទួលបានជោគជ័យជាជំហានតាមការចង់បាន បណ្ដាក្លិប និងសមាគមទាំងអស់ដែលបានឈរជើងនៅក្នុងប្រទេសកម្ពុជា ត្រូវតែខិតខំហ្វឹកហាត់ពង្រឹងសមត្ថភាពឱ្យបានល្អ ដោយសារតែក្នុងពេលខាងមុខសហព័ន្ធបាល់ទះទាំងខេត្ត និងក្រុងត្រូវមានភារកិច្ចច្រើនទៀតដើម្បីត្រៀមខ្លួនចូលរួមប្រកួតប្រជែងក្នុងទ្រង់ទ្រាយជាលក្ខណៈជាតិផង និងអន្តរជាតិផង ជាពិសេសគឺដើម្បីចូលរួមក្នុងកម្មវិធីស៊ីហ្គេមលើកទី៣២ដែលកម្ពុជានឹងធ្វើជាម្ចាស់ផ្ទះក្នុងឆ្នាំ២០២៣ខាងមុខ។
ក្នុងនោះសហព័ន្ធក៏ទទួលបានជោគជ័យក្នុងការប្រកួតដណ្ដើមពានរង្វាន់នានាផងដែរដូចជា ការប្រកួតដណ្តើមពានរង្វាន់ លោក នេត សាវឿន អគ្គស្នងការនគរបាលជាតិ ដែលធ្លាប់បានធ្វើកន្លងមក ដែលរាល់ការប្រកួតនីមួយៗ សហព័ន្ធរមែងទទួលបានកីឡាករល្អៗសម្រាប់បណ្ដុះជាជម្រើសជាតិលំដាប់ប្រទេសប្រចាំនៅក្នុងសហព័ន្ធ ។
ក្នុងនោះបណ្ដាក្លិប-សមាគមដែលជាសមាជិក ក៏មានចំនួនកើនឡើងគួរឱ្យកត់សម្គាល់នាពេលចុងក្រោយផងដែរ ដោយក្នុងនោះសូម្បីក្លិបបាល់ទះសហភាពសហព័ន្ធយុវជនខេត្ដព្រៃវែង, ក្លិបបាល់ទះក្រសួងមហាផ្ទៃ, ក្លិបបាល់ទះស្នងការដ្ឋាននគរបាលខេត្ដបាត់ដំបង, ក្លិបបាល់ទះខេត្ដកំពង់ចាម, ក្លិបបាល់ទះកងពលធំអន្ដរាគមន៍លេខ៣, ក្លិបបាល់ទះស្នងការដ្ឋាននគរបាលខេត្ដកំពង់ចាម, ក្លិបបាល់ទះបញ្ជាការដ្ឋានកងអង្គរក្ស និងក្លិបបាល់ទះកងពលតូចអន្ដរាគម៍លេខ៧ជាដើមក៏ពង្រឹងសមត្ថភាពបានល្អផងដែរ ។
ក្រុមទាំងនេះត្រូវបានមហាជនផ្ដោតការចាប់អារម្មណ៍យ៉ាងខ្លាំងថាបានពង្រឹងសមត្ថភាព ដោយក្នុងចំណោមនោះកម្លាំងយុវជនដែលបានក្លាយខ្លួនជាធនធានមនុស្សក៏កាន់តែឆ្នើមជាងមុន ដែលធ្វើឱ្យសហព័ន្ធមានកម្លាំងជាងមុន និងមានការទទួលស្គាល់សមត្ថភាពជាងមុន។ យ៉ាងណាមិញ សហព័ន្ធទាំងមូលបានទទួលស្គាល់ថា នៅមិនទាន់មានឱកាសទទួលបានមេដាយមាសលើឆាកអន្តរជាតិនៅឡើយទេ ដោយសារតែការប្រកួតបាល់ទះគឺមានលក្ខណៈជាក្រុម កម្ពុជានៅមិនទាន់ទៅរួចទាំងស្រុងទេ ដោយសារតែករណីទី១នៅខ្វះបច្ចេកទេស និងទី២ ដោយសារតែកម្ពស់ និងមាឌរបស់កីឡាករកម្ពុជានៅមិនទាន់អាចប្រដូចនឹងកីឡាករបរទេសបាននៅឡើយ។
មន្ត្រីសហព័ន្ធបានបន្តបញ្ជាក់ថា សហព័ន្ធកីឡាបាល់ទះកាន់តែរំពឹងខ្លាំង ក្រោយពីប្រទេសចិនបានបញ្ជូនគ្រូបង្វឹកជំនាញម្នាក់មកពីខេត្តហ្វូជាន គឺ លោក Ji Jun ឱ្យមកជួយបង្វឹកដល់កីឡាករកម្ពុជា ខណៈដែលលោកគ្រូ JiJun ក៏ត្រូវគេកត់សម្គាល់ថា បានប្រឹងប្រែងបង្វឹកដល់ក្រុមបាល់ទះជម្រើសជាតិកម្ពុជា ដោយតាមគម្រោងលោកនឹងជួយបង្ហាត់កីឡាករកម្ពុជារយៈពេល៥ឆ្នាំចាប់ឆ្នាំ២០១៨នេះតទៅ ដើម្បីពង្រឹងឱ្យកីឡាករកម្ពុជាអាចឡើងសន្ទុះស្មើមុខស្មើមាត់លើឆាកអន្តរជាតិបាន ។ កម្ពុជាក៏បានប្រកាសថា នឹងរៀបចំជើងព្រួលឱ្យបានល្អ ក្នុងការប្រកួតកីឡាSEA GAMES ២០១៩ នៅក្នុងប្រទេសហ្វីលីពីននាពេលខាងមុខ។
លោក បឹង គឹមតោ អគ្គលេខាធិការសហព័ន្ធកីឡាបាល់ទះកម្ពុជា ធ្លាប់បានបញ្ជាក់ថា កីឡាករបាល់ទះកម្ពុជានៅក្នុងពេលនេះ មិនសូវពិបាកក្នុងស្វែងរកអ្នកមានសមត្ថភាពនោះទេ ដោយសារតែក្មេងសម័យក្រោយមានការចាប់អារម្មណ៍ចង់ក្លាយជាកីឡាករបាល់ទះច្រើនឡើង ដោយនៅតាមបណ្ដាសាលារដ្ឋ និងឯកជន ក៏មានបំផុសកីឡាមួយនេះខ្លាំងឡើង ដែលធ្វើឱ្យខាងសហព័ន្ធកើនឡើងកីឡាករល្អ ដែលក្នុងពេលខាងមុខគឺមិនយូរនោះទេ កម្ពុជានឹងអាចឈានឡើងលើឆាកអន្តរជាតិ ស្របគ្នាដែលក្នុងពេលនេះ ក៏បានពង្រឹងសមត្ថភាពធ្វើឱ្យអន្តរជាតិបានស្គាល់កាន់តែច្បាស់ពីសមត្ថភាពបាល់ទះរបស់កម្ពុជា ដែលមានន័យថា ខុសឆ្ងាយពីមុន បើធៀបនឹងពេលមុនដែលកីឡាករកម្ពុជាគឺទម្រាំតែរកបានអ្នកមានកាយសម្បទាល្អៗសម្រាប់កីឡាបាល់ទះគឺពិបាកនោះ។
លោកថា វត្តមានកីឡាករល្អ និងគ្រូបង្វឹកដែលមានបច្ចេកទេសមកពីប្រទេសចិន ទោះចង់មិនចង់ក៏មានការផ្លាស់ប្ដូរខ្លះដែរ ក្នុងពេលដែលក្រុមជម្រើសជាតិទាំងឈុតធំ និងឈុតតូចរបស់កីឡាបាល់ទះនៅក្នុងពេលនេះ គឺកាន់តែល្អ ដែលនាំឱ្យសហព័ន្ធមើលឃើញពីក្ដីសង្ឃឹម ។ យ៉ាងណាមិញ លោកថា ក្រុមកីឡាករជម្រើសជាតិកម្ពុជា ក៏ត្រូវការពេលវេលាដុសខាត់កីឡាករល្អក្នុងពេលកំណត់មួយបន្ថែមទៀត ដើម្បីធានាថា កម្ពុជាពិតជាមានសមត្ថភាពគ្រប់គ្រាន់នៅគ្រប់ការប្រកួតដែលបានធ្វើឡើង មិនថាក្នុងស្រុក ឬក្រៅស្រុកនោះទេ៕
ចែករំលែកព័តមាននេះ