ខេត្តកំពង់ធំ ៖ បុរសម្នាក់លង់ទឹកទន្លេស្លាប់បានបង្កឲ្យមានការភ្ញាក់ផ្អើលកាលពីម៉ោង៥និង៣០នាទីល្ងាចថ្ងៃទី៣ ខែតុលា ឆ្នាំ២០១៨ ស្ថិតនៅចំណុចភ្នំជីមូស ក្នុងភូមិសាស្ត្រ ឃុំចំណាក្រោម ស្រុកស្ទោង ខេត្តកំពង់ធំ ។
លោកវរសេនីយ៍ឯក យ៉ង សំ អធិការនគរបាលស្រុកស្ទោង បានឲ្យដឹងថា ជនរងគ្រោះដែលស្លាប់ឈ្មោះ ឡុង រិន ភេទប្រុស អាយុ៤១ឆ្នាំ មានមុខរបរនេសាទត្រី ។
យោងតាមការបំភ្លឺពីស្ត្រីឈ្មោះ ជិន និមល ដែលត្រូវជាប្រពន្ធរបស់ ជនរងគ្រោះបានបញ្ជាក់ថា រូបគាត់និង ប្តីបានទៅរកស៊ីដាក់មងនិងលក់ចាប់ហួយបន្តិចបន្តួចនៅឯជើងភ្នំជីមូស ហើយប្តីរបស់គាត់ជាមនុស្សស្រវឹងស្រាជាប្រចាំ ។
នៅមុនពេលកើតហេតុ កាលពីល្ងាចថ្ងៃទី២ ខែតុលា ប្តីរបស់គាត់ស្រវឹងស្រាបានដើរឡើងទៅលើភ្នំជីមូសតែម្នាក់ឯង រហូតម៉ោងប្រហែល១១យប់ រូបគាត់បានឮសម្លេងធ្លាក់ទឹកប្រូងដែរ តែគាត់ស្មានថាឆ្កែ ។
ដោយបាត់ប្តីយូរពេក គាត់បានអុំទូកទៅសួរអ្នកជិតខាងក្រែងមានអ្នកបានឃើញប្តីគាត់ តែអ្នកស្រុកប្រាប់ថា គ្មាននណាបានឃើញប្តីគាត់ឡើយ រហូតមកដល់រសៀល ថ្ងៃទី៣ ខែតុលា ឪពុករបស់គាត់ឈ្មោះអ៊ួន ជិន ដោយមានការសង្ស័យ ក៏បានអោយឈ្មោះ ចិត្ត ចុះមុជទឹករាវរកមើលនៅខាងក្រោមទូក ស្រាប់តែប្រទះឃើញប្តីគាត់ស្លាប់នៅក្នុងទឹកជំរៅជាងបីម៉ែត្រយ៉ាងអាណោចអាធ័មបាត់ទៅហើយ ហើយក៏ត្រូវបានសាច់ញាតិដឹកយកមកផ្ទះនៅភូមិស្ពានគ្រង ឃុំចំណាក្រោម ស្រុកស្ទោងទាំងយប់ ។
បន្ទាប់ពីទទួលព័ត៌មាននេះ សមត្ថកិច្ចជំនាញបានសហការជាមួយអាជ្ញាធរមូលដ្ឋានបានចុះទៅពិនិត្យសពឃើញថាពុំមានស្លាកស្នាមអ្វីឡើយ ជនរងគ្រោះគឺពិតជាស្រវឹងស្រា បណ្តាលឱ្យធ្លាក់ទឹកលង់ស្លាប់ប្រាកដមែន ហើយសពក៏ត្រូវបានប្រគល់ជូនសាច់ញាតិធ្វើបុណ្យតាមប្រពៃណី ៕
ចែករំលែកព័តមាននេះ