ប្រទេសវៀតណាម ៖ អគ្គលេខាបក្សកុំមុយនីស្តវៀតណាមលោកង្វៀនភូជុង ជាអ្នកប្រកាន់មាគ៌ាតឹងត្រូវក្លាយនាពេលខាងមុខនេះជាប្រធានាធិបតីប្រទេសលោក បែបនោះនឹងនាំឲ្យលោកជាអ្នកកាន់តំណែងដឹកនាំទាំង២ បន្ទាប់ពីលោកប្រធានហូជីមិញបិតាឯករាជ្យជាតិមក។
លោកង្វៀន ភូជុង អាយុ៧៤ឆ្នាំ ត្រូវបានគេស្គាល់ថា ជាអ្នកអភិរក្សនិយមមួយរូបដែលរៀបចំការតស៊ូ ទាំងប្រឆាំងអំពើពុករលួយទាំងប្រឆាំងនឹងពួកសកម្មជនប្រឆាំង។ ក្នុងការប្រឆាំងអំពើពុករលួយរបស់លោកបាននាំទៅដល់ ការចាប់ដាក់គុកអតីតអ្នកទទួលខុសត្រូវនយោបាយ ធនាគារិក និងមន្ត្រីច្រើនសិបនាក់។ រូបលោកត្រូវបានថ្នាក់ដឹកនាំបក្សកុំមុយនីស្តវៀតណាមជ្រើសតាំងកាលពីថ្ងៃទី៣តុលា ជាបេក្ខជនតែម្នាក់គត់សម្រាប់តំណែងប្រមុខរដ្ឋ។
តាមបណ្ដាញអ៊ីនធើរណេតរបស់ខ្លួន បក្សកុំមុយនីស្តវៀតណាមឲ្យដឹងនាថ្ងៃទី៣ តុលាថា គណៈកម្មាធិការកណ្ដាលរបស់បក្សបានជ្រើសតាំងជាឯកច្ឆ័ន្ទ លោកង្វៀនភូជុងសម្រាប់កាន់តំណែងប្រធានាធិបតី ហើយរង់ចាំការអនុម័តរបស់សភាជាតិតែប៉ុណ្ណោះ។សភាត្រូវផ្ដល់សច្ចាប័នលើការតែងតាំងនោះនាឱកាសនៃកិច្ចប្រជុំរបស់ខ្លួនដែលបើកធ្វើនាថ្ងៃទី២២តុលាខាងមុខនេះ។
ការសម្រេចចិត្តនេះធ្វើឡើងបន្ទាប់ពីមរណភាពរបស់លោកត្រាន់ដាយក្វាង ដែលធ្វើប្រមុខរដ្ឋពីឆ្នាំ២០១៦មក កាលពីថ្ងៃទី២១កញ្ញាក្នុងជន្មាយុ៦១ឆ្នាំ ក្រោយពីលោកមានជំងឺអស់រយៈពេលយ៉ាងយូរមក។ក្រោមអាណត្តិរបស់លោករាល់សំឡេងប្រឆាំងត្រូវបានបង្រាបក្នុងប្រទេស ដែលមានអ្នកទោសនយោបាយច្រើនសិបនាក់។
លោកត្រាន់វូហៃ អ្នកជំនាញការម្នាក់ខាងវិទ្យាសាស្ត្រសង្គមនិយាយថា លោកង្វៀនភូជុង នឹងជាអ្នកមានអំណាចខ្លាំងបំផុតនៃប្រវត្តិសាស្ត្រ របស់វៀតណាម បន្ទាប់ពីលោកហូជីមិញ ដែលទទួលមរណភាពកាលពីឆ្នាំ១៩៦៩ និងអតីតប្រមុខបក្សពីឆ្នាំ១៩៦០រហូតដល់ស្លាប់ក្នុងឆ្នាំ១៩៨៦ លោកLE DUAN។ លោកភូជុងជាមួយអំណាចបែបនេះ អាចជម្រុញការអនុវត្តនូវអ្វីដែលលោកនិងបក្សចង់បាន។ មនុស្សមួយចំនួនយល់ថា ការប្រមូលផ្ដុំអំណាចនោះនឹងអាចធ្វើឲ្យរដ្ឋាភិបាលកាន់តែមានប្រសិទ្ធភាពថែមទៀត។
ពួកអ្នកសង្កេតការណ៍កត់សម្គាល់ថា ការប្រយុទ្ធរបស់លោកង្វៀនភូជុង ប្រឆាំងអំពើពុករលួយរហូតដល់បណ្ដាអ្នកមានឥទ្ធិពលខ្លាំងៗ គឺក្នុងបំណងតែមួយគត់ កែលម្អសភាពការណ៍ក្នុងប្រទេសអាស៊ីមួយ ដែលទទួលរងអម្រែកយ៉ាងធ្ងន់នោះ ប៉ុន្តែលោកក៏នឹងប្រើអំណាចដើម្បីកម្ចាត់ពួកប្រឆាំងខាងនយោបាយផងដែរ។
សក់ស្កូវលោកង្វៀនភូជុងត្រូវបានជ្រើសតាំងជាប្រមុខបក្សកុំមុយនីស្តវៀតណាមកាលពីឆ្នាំ២០១១ បន្ទាប់មកលោកបន្តកាន់តំណែងនេះនាឆ្នាំ២០១៦ទៀត៕
ចែករំលែកព័តមាននេះ