ខេត្តស្ទឹងត្រែង ៖ មន្ទីរទេសរណ៍ខេត្តស្ទឹងត្រែងបានដាក់វិធានការដល់វិស័យឯកជន ដើម្បីរួមគ្នាពង្រឹងសេវាកម្មទេសចរណ៍ឲ្យមានប្រសិទ្ធភាពក្នុងការទាក់ទាញភ្ញៀវជាតិ និងអន្តរជាតិគ្រាដំណើរកម្សាន្តទៅកាន់រមណីយដ្ឋាននានាក៏ដូចជា ការស្នាក់នៅនារដូវបុណ្យភ្ជុំបិណ្ឌនេះផងដែរ ។
លោក អ៊ន ប៉ោសឿន ប្រធានមន្ទីរទេសចរណ៍ខេត្តស្ទឹងត្រែងបានបញ្ជាក់ថា ផ្នែកឯកជនដែលធ្វើការលើវិស័យទេសចរណ៍ត្រូវតែរួមសហការគ្នាពង្រឹងសេវាកម្មទេសចរណ៍ឲ្យមានប្រសិទ្ធភាព ពិសេសការធ្វើបដិសណ្ឋារកិច្ចភាពរាក់ទាក់ ដើម្បីបង្កើនទំនុកចិត្តដល់ភ្ញៀវពេលមកលេងក្នុងឱកាសបុណ្យភ្ជុំបិណ្ឌនេះ ដើម្បីទាក់ទាញឲ្យមកបានកាន់តែច្រើន នៅពេលក្រោយៗទៀត ។ លោកបន្ថែមថា នេះជាមុខមាត់របស់ខេត្តយើងហើយក៏មានប្រយោជន៍សម្រាប់បងប្អូនប្រកបរបរអាជីវកម្មសណ្ឋាគារផ្ទះសំណាក់ អាហារដ្ឋាន ដូចនេះត្រូវរៀបចំឲ្យមានសោភណ្ឌភាព បរិស្ថានល្អ ម្ហូបអាហារប្រកបដោយអនាម័យ និងមិនតម្លើងតម្លៃម្ហូបអាហារ បន្ទប់ស្នាក់នៅជាដើម ហើយបើម្ចាស់អាជីវកម្មណាមួយអនុវត្តបានល្អ ទៅតាមស្តង់ដានឹងត្រូវបានលើទឹកចិត្តពីមន្ទីរទេសចរណ៍ផងដែរ ។
កញ្ញា និតប៊ុនដានី ម្ចាស់សណ្ឋាគារ រស្មី ពេជ្រ ស្ថិតនៅសង្កាត់ស្រះឬស្សី ក្រុងស្ទឹងត្រែងបានលើកឡើងថា កន្លងមកម្ចាស់ផ្ទះសំណាក់សណ្ឋាគារភោជនីយដ្ឋានបានអនុវត្តតាមការណែនាំរបស់មន្ទីរទេសចរណ៍រួចមកហើយ ព្រោះសេវាកម្មល្អទីក្រុងស្អាត គឺបានផ្ដើមចេញពីយើងទាំងអស់គ្នា ។ កញ្ញាអះអាងថា វិស័យឯកជនសព្វថ្ងៃក៏បានប្រឹងប្រែងរៀបចំសេវាកម្មបម្រើភ្ញៀវឲ្យបានល្អដែរ ព្រោះធ្លាប់ទទួលបានការបណ្តុះបណ្តាលពីមន្ទីរទេសចរណ៍ក្នុងការរៀបចំប្រព័ន្ធការងារល្អបម្រើទាំងផ្នែកស្នាក់នៅ និងមានកន្លែងអាហារដ្ឋានប្រកបដោយផាសុខភាព ។
លោកសាយ កុសល អភិបាលក្រុងបានគាំទ្រចំពោះការយល់ដឹងនេះ ព្រោះអាជ្ញាធរខេត្តបានប្រឹងប្រែងអភិវឌ្ឍន៍ទីក្រុងបានស្អាតក៏ចង់ទាក់ទាញភ្ញៀវទេសចរណ៍មកលេងច្រើនដែរ ។ លោកថា នៅរដូវបុណ្យភ្ជុំនេះអាជ្ញាធរបានបង្កើនការងាររៀបចំសណ្តាប់ធ្នាប់ការពារសន្តិសុខឱ្យមានភាពប្រសើឡើង ដើម្បីបង្កើនភាពកក់ក្តៅដល់ភ្ញៀវដែលបានមកដល់ខេត្តស្ទឹងត្រែងយើង ហើយឆ្នាំក្រោយៗនឹងមកម្តងទៀត ៕
ចែករំលែកព័តមាននេះ