ខេត្តសៀមរាប ៖ នៅនាយកដ្ឋានគាំពារ និងអភិរក្សសំណង់បុរាណហៅកាត់ថា អភិរក្សដ្ឋានអង្គរនៃក្រសួងវប្បធម៌ និងវិចិត្រសិល្បៈបានបើកទ្វារជូនសាធារណៈជនជាតិ និងអន្ដរជាតិបានចូលទស្សនានូវឃ្លាំងទុកវត្ថុបុរាណ និងសិល្បៈជាច្រើនដែលមានដាក់តាំងបង្ហាញនៅថ្ងៃទី២៩ ខែកញ្ញា ឆ្នាំ២០១៨ ដើម្បីចូលរួមអបអរទិវាខួបបេតិកភណ្ឌអឺរ៉ុបនៅក្នុងអភិរក្សអង្គរក្បែរមាត់ស្ទឹងពីខាងលិចស្ទឹងសៀមរាប ស្ថិតនៅក្នុងសង្កាត់ស្លក្រាម ក្រុង-ខេត្តសៀមរាប ។
គួរកត់សម្គាល់ផងដែរថា ក្នុងការចូលទស្សនា១ថ្ងៃ គឺថ្ងៃទី២៩ ខែកញ្ញា ឆ្នាំ២០១៨ នៃទិវាខួបបេតិកភណ្ឌអឺរ៉ុបនេះ គឺមានបងប្អូនប្រជាពលរដ្ឋមកពីទីជិតឆ្ងាយ ជាពិសេសពលរដ្ឋក្នុងក្រុងសៀមរាប និងភ្ញៀវអន្ដរជាតិរាប់ពាន់នាក់ មានភាពភ្ញាក់ផ្អើលទៅនឹងវត្ថុបុរាណដែលមាននៅក្នុងអភិរក្សដ្ឋានអង្គរ ក្រុងសៀមរាប ដែលកន្លងមកត្រូវបានការពារយ៉ាងតឹងរឹងបំផុតពីសំណាក់ជនអគតិមួយចំនួនព្រោះ បារម្ភពីហានិភ័យនានាកើតឡើង ហើយវត្ថុបុរាណទាំងនោះមានដូចជា ក្បាលនាគ ព្រះកេសពុទ្ធរូប រូបចម្លាក់ ផ្ទាំងសិលាចារឹក និងវត្ថុសិល្បៈធំតូចជាច្រើន ។
លោក គឹម សុធិន ប្រធានអភិរក្សដ្ឋានអង្គរបានប្រាប់ថា នេះជាលើកទី៣ ហើយដែលស្ថាប័នលោកបើកឱ្យមានការចូលទស្សនាដោយសេរី ឥត គិតលុយបែបនេះ ហើយរយៈពេល៣ឆ្នាំចុងក្រោយនេះ គឺតបទៅនឹងការស្នើសុំរបស់ស្ថានទូតបារាំងនៅកម្ពុជា ដើម្បីចូលរួមអបអរទិវាខួបបេតិកភណ្ឌអឺរ៉ុប២៩ កញ្ញាកន្លងទៅផងដែរ ។ លោកបានបញ្ជាក់ថា ចំពោះស្ថានទូតបារាំងចង់ឱ្យមានការផ្សព្វផ្សាយអំពីស្នាដៃជនជាតិបារាំងដែលបានខិតខំកន្លងមក ដើម្បីជួយប្រមូលវត្ថុបុរាណនៅតាមប្រាសាទនានាទូទាំងប្រទេសយកមករក្សាទុកនៅទីនេះ ។ ក្នុងនោះដើម្បីរម្លឹកពីការខិតខំប្រឹងប្រែងរបស់អាជ្ញាធរយើងក្នុងការទប់ស្កាត់នូវបទល្មើសជួញដូរវត្ថុបុរាណនាពេលកន្លងមកដែរ ។
សូមបញ្ជាក់ផងដែរថា អភរិក្សអង្គរ និងនាយកដ្ឋានគាំពារ និងអភិរក្សសំណង់បុរាណ គឺតែមួយដែលត្រូវបានបង្កើតឡើងនៅឆ្នាំ១៩០៨ នៅសម័យបារាំង ហើយនៅសម័យនោះប្រាសាទខ្មែររបស់យើងមានការបាក់បែកខ្លាំង ដោយសារសង្គ្រាម ហើយទីតាំងនេះ គឺជាឃ្លាំងសម្រាប់ទុកវត្ថុបុរាណនានាដែលប្រមូលបានមកពីតាមប្រាសាទទូទាំងប្រទេសផងដែរ ៕
ចែករំលែកព័តមាននេះ