រាជធានីភ្នំពេញ ៖ ដើម្បីបង្កើនផលិតភាពក្នុងស្រុកក្នុងវិស័យសហគ្រាសធុនតូច និងមធ្យមកម្ពុជា ក្រុមហ៊ុន World Bridge មានគម្រោងបង្កើតអោយមានចង្កោមសហគ្រាសធុនតូចនិងមធ្យម នៅទីតាំងតែមួយកន្លែង ដែលគម្រោងនេះ…
រាជធានីភ្នំពេញ ៖ ដើម្បីបង្កើនផលិតភាពក្នុងស្រុកក្នុងវិស័យសហគ្រាសធុនតូច និងមធ្យមកម្ពុជា ក្រុមហ៊ុន World Bridge មានគម្រោងបង្កើតអោយមានចង្កោមសហគ្រាសធុនតូចនិងមធ្យម នៅទីតាំងតែមួយកន្លែង ដែលគម្រោងនេះ មានការគាំទ្រពីស្ថាប័នអន្តរជាតិធំៗពីរគឺ UNIDO និង អង្គការ UNDP ព្រមទាំងមានការគាំទ្រពីក្រសួងឧស្សាហកម្មនិងសិប្បកម្មផងដែរ ។
ថ្លែងនៅក្នុងពិធីសិក្ខាសាលាការអភិវឌ្ឍចង្កោមសហគ្រាសធុនតូច និងមធ្យមថ្មី កាលពីពេលថ្មីៗនេះ លោកឧកញ៉ា សៀ ឬទ្ធី ប្រធានក្រុមប្រឹក្សាភិបាលនៃក្រុមហ៊ុន វើលដ៍ប្រ៊ីជ បានមានប្រសាសន៍ថា ដោយសារតែក្រុមហ៊ុនវើលដ៏ប្រ៊ីជមានចក្ខុវិស័យស្របគ្នានិងស៊ីសង្វាក់ជាមួយរដ្ឋាភិបាល លើគោលនយោបាយ និងទិសដៅអភិវឌ្ឍន៍ចង្កោមសហគ្រាសធុនតូច និងមធ្យម ទើបក្រុមការងារដែលមានសមត្ថភាពថ្នាក់ខ្ពស់ បានទៅពិគ្រោះប្តូរយោបល់អំពីអាទិភាព និងលទ្ធភាពក្នុងការអភិវឌ្ឍន៍ផែនការមួយនេះ អោយកាន់តែមានសក្ដានុពល មានការទទួលខុសត្រូវ និងការចូលរួមទ្រទ្រង់ជាលក្ខណៈស្តង់ដាអន្តរជាតិ ពីអង្គការកម្មវិធីអភិវឌ្ឍន៍របស់អង្គការសហប្រជាជាតិ UNDP និងអង្គការ សហប្រជាតិដើម្បីអភិវឌ្ឍន៍ឧស្សាហកម្ម UNIDO ហើយអង្គការទាំងពីរនេះ បានសម្រេចចុះហត្ថលេខាលើអនុស្សរណៈយោគយល់គ្នា ជាមួយក្រុមហ៊ុនវើលដ៏ប្រ៊ីជ ដើម្បីចូលរួមផ្ដល់ជាទំនុកចិត្តនិងផ្សាភ្ជាប់កិច្ចសហប្រតិបត្តិការរវាងក្រុមហ៊ុនវើលដ៏ប្រ៊ីជ ជាមួយ UNDP និង ជាមួយ UNIDO ដល់កម្មវិធីនេះ រួចរាល់ផងដេរ ។
ឧកញ៉ា មានប្រសាសន៍ថា ស្របគ្នាជាមួយនឹងកិច្ចសហប្រតិបត្តិការដូចបានរៀបរាប់ យើងសង្ឃឹមថា កិច្ចសហប្រតិបត្តិការដ៏ល្អប្រពៃរវាងក្រសួងឧស្សាហកម្ម និងសិប្បកម្ម ជាមួយក្រុមហ៊ុនវើលដ៏ប្រ៊ីជ តាមរយៈការប្តូរយោបល់ក្នុងសិក្ខាសាលា វានឹងក្លាយជាកញ្ចក់ឆ្លុះបញ្ចាំងសម្រាប់ជាជំនួយស្មារតីក្នុងការអភិវឌ្ឍន៍ផង ហើយអាចសម្រេចបាននូវសមិទ្ធផលដ៏មានសារសំខាន់ ថែមទាំងអាចផ្ដល់ការចូលរួមផ្សព្វផ្សាយ និងលើកស្ទួយដល់ពលរដ្ឋដទៃទៀត នៅទូទាំងប្រទេសកម្ពុជា អោយយល់ដឹងបន្ថែម និងរៀនសូត្រពីគ្នាទៅវិញទៅមកអោយបានកាន់តែប្រសើរថែមទៀត ពីគោលនយោបាយ និងទិសដៅអភិវឌ្ឍន៍ចង្កោមសហគ្រាសធុនតូច និងមធ្យម របស់រាជរដ្ឋាភិបាល ។
លោក គឹម ទូច រដ្ឋលេខាធិការក្រសួងឧស្សាហកម្មនិងសិប្បកម្ម បានមានប្រសាសន៍ថា ដើម្បីឲ្យខ្សែសង្វាក់ផលិតកម្មរបស់វិស័យ SMEs នៅក្នុងប្រទេសកម្ពុជាកាន់តែប្រសើរឡើង មិនមែនមានតែក្រសួងមួយទេដែលត្រូវខិតខំនោះ តែត្រូវមានការចូលរួមពីគ្រប់ភាគីពាក់ព័ន្ធដូចជា ពីវិស័យឯកជន ជាពិសេសពីវិស័យ SMEsផ្ទាល់តែម្ដង ។
លោកបន្តថា វិស័យ SMEs ប្រាកដជាពិបាករីកចម្រើនណាស់ បើមិនមានការលើកទឹកចិត្តពីសំណាក់រដ្ឋាភិបាលនិងដៃគូរពាក់ព័ន្ធនានា ដូចជាពីវិស័យឯកជនផ្សេងៗជាដើម ។ ហើយបើសិនជាវិស័យនេះមិនមានការរីកចម្រើននោះទេ កំនើនសេដ្ឋកិច្ចរបស់កម្ពុជាក៏ពិបាកនឹងសម្រេចបានទៅតាមផែនការនោះដែរ ដូចនេះហើយទើបរដ្ឋាភិបាលដែលមានក្រសួងឧស្សាហកម្មនិងសិប្បកម្មតែងតែជំរុញ និងលើកទឹកចិត្តរាល់ការច្នៃប្រឌិតនានារបស់សហគ្រិនក្នុងវិស័យ SMEs ។
លោកនិយាយថា « វិស័យ SMEs មានសារៈសំខាន់ណាស់ នៅក្នុងប្រទេសនីមួយៗ ជាក់ស្ដែង វិស័យ SMEsកម្ពុជា បានជួយផ្ដល់ការងារប្រមាណពី៤០ទៅ៥០ភាគរយនៃចំនួនអ្នកមានការងារសរុបនៅកម្ពុជា ដូចនេះមានន័យថាវាពិតជាបានផ្ដល់នូវប្រយោជន៍ខ្ពស់សម្រាប់សេដ្ឋកិច្ច » ។
លោកឧកញ៉ា តែ តាំងប៉រ ប្រធានសហព័ន្ធសមាគមសហគ្រាសខ្នាតតូចនិងមធ្យមនៅកម្ពុជា បានមានប្រសាសន៍ផងដែរថា បច្ចុប្បន្ននេះ SME នៅកម្ពុជាភាគច្រើនជាលក្ខណៈគ្រួសារហើយនៅរប៉ាត់រប៉ាយ មិនទាន់ប្រមូលផ្ដុំជាចង្កោម ដូចនេះហើយទើប យើងពិបាកដោះស្រាយជូនពួកគាត់នៅពេលមានបញ្ហាអ្វីមួយដែលពួកគាត់ចង់បាន ។ លោកថា៖«យើងចង់អោយ SME មានការចងក្រងជាបណ្ដុំ ដើម្បីសម្រួលដល់ការដោះស្រាយជូនពួកគាត់ ដូចជាបញ្ហាបច្ចេកទេស គុណភាព និងការបង្ហូរកាកសំណល់ចេញជាដើម » ។
គួរបញ្ជាក់ថា ក្រុមហ៊ុន World Bridge បាននិងកំពុងអភិវឌ្ឍន៍គម្រោងបីរួមមាន ដូចជាគម្រោងលំនៅឋានតម្លៃសមរម្យ ដែលនឹងសហការសិក្សារៀបចំអោយមានជម្រើសច្នៃប្រឌិតបន្ថែមក្នុងការផ្ដល់ហិរញ្ញប្បទានសមស្របសម្រាប់អ្នកទិញលំនៅឋាន ។ គម្រោងទី២ គឺ គម្រោងគ្រប់គ្រងកង រថយន្តដឹកជញ្ជូនបៃតង ដែលគម្រោងនេះនឹងជួយដោះស្រាយនូវបញ្ហាក្នុងវិស័យដឹកជញ្ជូន នៅកម្ពុជា ។
ចំណែកគម្រោងមួយទៀតនោះ គឺគម្រោងបណ្ដុំសហគ្រាសធុនតូច និងមធ្យម ដែលជំរុញអោយមានការអភិវឌ្ឍន៍ប្រកបដោយភាពច្នៃប្រឌិត សម្រាប់ SME ក្នុងបំណងបង្កើតនូវប្រព័ន្ធអេកូផលិតកម្ម តាមរយៈការបង្កើតអោយមានកម្មវិធី ស្រាវជ្រាវ អភិវឌ្ឍន៍ និងបណ្ដុះបណ្ដាលជំនាញដែលអាចប្រែក្លាយសហគ្រាសធុនតូច និងមធ្យមទាំងឡាយអោយទៅជា ចលករដ៏សំខាន់មួយសម្រាប់អភិវឌ្ឍសេដ្ឋកិច្ចប្រទេស ៕ ដោយសហការ
ចែករំលែកព័តមាននេះ