រាជធានីភ្នំពេញ ៖ សម្តេក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតបានផ្តល់ថវិកា៥ម៉ឺនដុល្លារសហរដ្ឋអាមេរិកដល់កងកម្លាំងនគរបាល ដើម្បីលើកទឹកចិត្តចំពោះការបង្ក្រាបក្រុមប្រដាប់អាវុធអាណាធិបតេយ្យនាពេលថ្មីៗនេះ ។
យោងតាមគេហទំព័រហ្វេសប៊ុករបស់សម្តេច ស ខេងចេញផ្សាយកាលពីពេលថ្មី ៗកន្លងមកនេះបានឲ្យដឹងថា ការផ្តល់ថវិកានេះបន្ទាប់ពីរយៈពេលប៉ុន្មានថ្ងៃនេះកងកម្លាំងនគរបាលជាតិបានស្រាវជ្រាវ និងធ្វើការចាប់ខ្លួនសកម្មជន និងមេក្លោងចលនាប្រដាប់អាវុធខុសច្បាប់នៅទូទាំងប្រទេសចំនួន៩នាក់ ដោយរឹបអូសអាវុធវែង៣០ដើម អាវុធខ្លីមួយដើម និងឧបករណ៍សម្ភារៈផ្សំគ្រឿងផ្ទុះមួយចំនួនទៀត ។
លទ្ធផលនេះ គឺបានធ្វើឡើងក្រោមកិច្ចសហការរវាងកម្លាំងនគរបាលនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃអគ្គស្នងការដ្ឋាននគរបាលជាតិជាមួយកម្លាំងនគរបាលរាជធានីភ្នំពេញកម្លាំងនគរបាលខេត្តកំពត និងកម្លាំងនគរបាលខេត្តពោធិ៍សាត់ក្រោមការបញ្ជាផ្ទាល់ពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ និងក្រោមការសម្របសម្រួលនីតិវិធីរបស់ព្រះរាជអាជ្ញាព្រះរាជអាជ្ញារាជធានី-ខេត្តទាំង៣ ។ ប្រភពបានបញ្ជាក់ថា «នេះ គឺជាក្រុមប្រដាប់អាវុធអាណាធិបតេយ្យដែលត្រូវបានបង្ក្រាបបន្ទាប់ ពីការបង្កើតរាជរដ្ឋាភិបាលថ្មី ក្រោយការបោះឆ្នោត កាលពីខែកក្កដា ឆ្នាំ២០១៨នេះ » ។
សូមរំលឹកថា ក្នុងនាមគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតសម្តេចក្រឡាហោម ស ខេង តែងតែលើកទឹកចិត្ត និងថ្លែងអំណរគុណចំពោះកងកម្លាំងប្រដាប់អាវុធ និងសមត្ថកិច្ចពាក់ព័ន្ធគ្រប់លំដាប់ថ្នាក់ដែលបានខិតខំប្រឹងប្រែងចូលរួមយ៉ាងសកម្មក្នុងការថែរក្សាការពារសន្តិសុខ និងសណ្តាប់ធ្នាប់សារធារណៈបានយ៉ាងល្អប្រសើរនៅក្នុងដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ដែលប្រព្រឹត្តទៅប្រកបដោយសុវត្ថិភាព គ្មានអំពើហិង្សា ។
ជាមួយគ្នានេះសម្តេចក្រឡាហោមធ្លាប់បានបញ្ជាក់អះអាងដែរថា ការសម្រេចបាននូវជោគជ័យក្នុងភារកិច្ចដ៏ថ្លៃថ្លានេះក៏មិនអាចកាត់ផ្តាច់បានពីការចូលរួមចំណែកយ៉ាងសំខាន់ពីប្រជាពលរដ្ឋគ្រប់រូប និងគ្រប់គណបក្សនយោបាយដែលបានបង្ហាញពីភាពចាស់ ទុំខាងនយោបាយ និងភាពសុខដុមរមនាក្នុងសង្គម ព្រមទាំងកិត្យានុភាព ជាតិខ្មែរទាំងមូលទៅដល់សកលលោកបានឃើញច្បាស់នូវសមិទ្ធផល និងផ្លែផ្កានៃការអនុវត្តន៍យ៉ាងខ្ជាប់ខ្ជួននូវគោលការណ៍លទ្ធិប្រជាធិបតេយ្យសេរីពហុបក្សនៅកម្ពុជា ៕
ចែករំលែកព័តមាននេះ