ខេត្តព្រៃវែង ៖ ដើម្បីលើកកម្ពស់សុខមាលភាពរបស់បងប្អូនប្រជាពលរដ្ឋនៅក្នុងរដូវបុណ្យភ្ជំបិណ្ឌនេះ កាលពីព្រឹកថ្ងៃទី៣ តុលានេះមន្ត្រីជំនាញកាំកុងត្រូលសាខាខេត្តព្រៃវែងសហការជាមួយមន្ទីរពាណិកម្មខេត្ត និងអាជ្ញាធរដែនដីបានចុះត្រួតពិនិត្យទំនិញនៅក្នុងផ្សារឈើកាច់ ដែលស្ថិតនៅក្នុងទីរួមស្រុកបាភ្នំ ហើយបានរកឃើញចំណីអាហារប្រភេទសរសៃរគុយទាវ និងលតស្វិតជិត៧គីឡូក្រាម មានដាក់លាយសារធាតុគីមី ប៊ុយរ៉ាក់ ព្រមទាំងទំនិញខូចគុណភាព និងទំនិញហួសកាលបរិច្ឆេតមួយចំនូនផងដែរ ។
លោក អ៊ុត សុភាព ប្រធានសាខាកាំកុងត្រូលខេត្តព្រៃវែងបានមានប្រសាសន៍ថា ប៊ុយរ៉ាក់ គឺជាសារធាតុគីមីដែលច្បាប់ហាមឃាត់មិនឲ្យប្រើប្រាស់នៅក្នុងចំណីអាហារព្រោះ វាបង្កផលប៉ះពាល់ដល់សុខភាពអ្នកបរិភោគដោយធ្វើឲ្យពុលដល់ក្រលៀនរលាកក្រពះ និងពោះវៀនជាដើម ។ ហើយសម្រាប់សរសៃរគុយទាវ និងលតស្វិតដែលមន្ត្រីរបស់លោកបានរកឃើញមានដាក់ ប៊ុយរ៉ាក់ រួមជាមួយ និងទំនិញខូចគុណភាពទាំងនោះ គឺត្រូវបានដកហូតយកទាំងអស់ ដើម្បីយកទៅធ្វើពិធីដុតកម្ទេចចោលនៅពេលខាងមុខ ។
ចំណែកឯអាជីវករដែលដាក់លក់សរសៃរគុយទាវ និងលតស្វិតទាំងនោះក៏បានយល់ព្រមធ្វើកិច្ចសន្យាជាមួយមន្ត្រីជំនាញឈប់ដាក់លាយសារធាតុគីមី ប៊ុយរ៉ាក់ ទៀតដែរ ។ដោយឡែកបងប្អូនប្រជាពលរដ្ឋដែលចូលទៅរកទិញចំណីអាហារនៅក្នុងផ្សារឈើកាច់ក៏បានសម្តែងនូវការគាំទ្រយ៉ាងខ្លាំងផងដែរ ។
ចំណែកបងប្អូនក្រុមអាជីវករវិញក៏អះអាងដូចគ្នាដែរថា ពួកគាត់ចង់ឲ្យមន្ត្រីជំនាញចុះត្រួតពិនិត្យបែបនេះឲ្យបានញឹកញាប់ ហើយបើទោះបីជាពេលចុះពិនិត្យនេះមន្ត្រីជំនាញបានដកហូតយកទំនិញពួកគាត់ក៏ដោយក៏ពួកគាត់មិនខឹងមិនតូចចិត្តដែរ ។
លោក អ៊ុត សុភាព បានបញ្ជាក់ផងដែរថា នៅក្នុងពេលនេះ គឺជារដូវបុណ្យភ្ជំបិណ្ឌដែលបងប្អូនប្រជាពលរដ្ឋគ្រប់គ្នាបាននាំគ្នាមកកាន់ទីផ្សារ ដើម្បីទិញចំណីអាហារយកទៅបរិភោគផង និងយកទៅវត្តប្រគេនព្រះសង្ឃផងដូច្នេះការចុះត្រួតពិនិត្យក្នុងពេលនេះ គឺក្នុងន័យ ដើម្បីជួយការពារសុខភាពបងប្អូនប្រជាពលរដ្ឋផង និងការពារសុខភាពរបស់ព្រះសង្ឃផងដែរ ៕
ចែករំលែកព័តមាននេះ