ខេត្តបាត់ដំបង ៖ នាយទាហានចំនួន២២១នាក់ មកពីតាមបណ្តាអង្គភាពចំណុះយោធភូមិភាគទី៥ បានចូលរួមបើកវគ្គហ្វឹកហ្វឺនបំប៉នជំនាញការិយាល័យទី៣ ក្រោមអធិបតីភាពលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ វេលាព្រឹកថ្ងៃទី០២ ខែតុលា ឆ្នាំ២០១៨ នៅក្នុងទីបញ្ជាការយោធភូមិភាគទី៥ ក្រុងបាត់ដំបង។
លោកវរៈសេនីយ៍ឯក គឹម រដ្ឋមុន្នី នាយការិយាល័យហ្វឹកហ្វឺនយោធភូមិភាគ បានមានមតិស្វាគមន៍ និងបញ្ជាក់ពីគោលបំណងនៃខ្លឹមសារ មេរៀនការហ្វឹកហ្វឺន គឺពង្រឹងបន្ថែមតួនាទី ភារកិច្ច និងរចនាសម្ព័ន្ធចាត់តាំងការិយាល័យទី៣, របៀបធ្វើការងារថ្នាក់កងអនុសេនាធំ,វរៈសេនាតូច,កសាងផែនការ,សរសេររបាយការណ៍, ផែនការណ៍ស្តីពីកសាងអង្គភាពរឹងមាំលើគ្រប់វិស័យ,ឋានលេខា,សញ្ញាសម្គាល់យោធា,បទបញ្ញតិទូទៅ ពេលកសាងឯកសារសេនាធិការប្រយុទ្ធ,អប់រំចិត្តសាស្ត្រ,ព័ត៌មានវិទ្យា, និងធ្វើទស្សនកិច្ចសិក្សាតាម អង្គភាព ដែលពេលសិក្សាមានរយៈពេល៨៨ថ្ងៃ។
លោកឧត្តមសេនីយ៍ឯក ប៊ុន សេង បានផ្តាំផ្ញើថា នេះជាជំនាញមួយ ដែលត្រូវមានតួនាទីប្រមូលផ្តុំព័ត៌មាន ចុះដោយផ្ទាល់តាមទីកន្លែងដើម្បីទទួលការពិត ចៀសវាងការទទួលតាមរបាយការណ៍ដែលបញ្ជូនមកជួនកាលមានលក្ខណៈមិនគ្រប់គ្រាន់ ដែលនាំឲ្យយើងរៀបចំផែនការ វាយតម្លៃខុស។ សំខាន់សម័យឥឡូវនៅលើប្រព័ន្ធផ្សព្វផ្សាយជា សាធារណៈ (Facebook,Page) ដែលជួនកាលនាំឲ្យអ្នកទទួលបានព័ត៌មានខុសពីការពិត ហើយនាំឲ្យប៉ះពាល់ដល់បទបញ្ជាផ្ទៃក្នុងរបស់អង្គភាព។
លោកឧត្តមសេនីយ៍ឯកបានផ្តោតសំខាន់ លើនាយទាហានបន្តវេន ដែលទទួលបានតែទ្រឹស្តីចេញពីសាលាជាន់ខ្ពស់មកនោះ មិនប្រាកដថា អាចសម្រេចកិច្ចការបានដោយជោគជ័យបានឡើយ ទើបពេលនេះរាល់ការងារត្រូវនៅលាយឡំ ជាមួយនាយទាហានចាស់ៗ ដើម្បីជួយផ្តល់បទពិសោធន៍បន្ថែមទៀត។ ហើយសុំឲ្យមានការឯកភាពគ្នា រវាងគ្រូ និងសិស្ស អ្នកចាស់ និងអ្នកថ្មី ទើបលទ្ធផលនៃការងារផ្តល់ត្រឡប់មកវិញទទួលបាន លទ្ធផលល្អប្រសើរទៅថ្ងៃក្រោយ។ បន្ទាប់ពីតំណាងសិក្ខាកាមបានឡើងធ្វើការប្តេជ្ញាចិត្តរួចមក លោកឧតត្តមសេនីយ៍ឯក បានជួយផ្តល់ថវិកាជួយឧបត្ថម្ភក្នុងកម្មវិធីចំនួន២លានរៀលផងដែរ៕
ចែករំលែកព័តមាននេះ