រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពគាស់ផ្ទះមួយកន្លែងលួចយកកាបូបលុយ និងគ្រឿងអលង្ការបានសម្រេចបន្ទាប់មកបាននាំគ្នារត់គេចខ្លួន។ ប៉ុន្តែត្រូវបានម្ចាស់ផ្ទះទាន់ស្រែកឆោឡោ បង្កការភ្ញាក់ផ្អើល ភ្លាមៗនោះកម្លាំងសមត្ថកិច្ចនគរបាលខណ្ឌពោធិ៍សែនជ័យចេញអន្តរាគមន៍ចាប់ខ្លួនបានម្នាក់។ ចំណែកកម្លាំងកងរាជអាវុធហត្ថខណ្ឌពោធិ៍សែនជ័យចាប់ខ្លួនបានម្នាក់ដែរ ហើយដកហូតបានកាបូបលុយ និងគ្រឿងអលង្ការមកវិញ។ ហេតុការណ៍នោះបានកើតឡើង កាលពីវេលាម៉ោង៤ និង១៥នាទីរសៀល ថ្ងៃទី០៣ ខែតុលា ឆ្នាំ២០១៨ ស្ថិតនៅក្នុងភូមិក្បាលដំរី២ សង្កាត់កាកាប២ ខណ្ឌពោធិសែនជ័យ។
ចំណែកនៅក្នុងកាបូបដែលជនសង្ស័យលួចនោះមិនដឹងថាមានលុយប៉ុន្មាន និងគ្រឿងអលង្ការប៉ុន្មានឡើយ គ្រាន់តែដឹងថាជាកម្មសិទ្ធិរបស់ស្ត្រីម្នាក់ឈ្មោះ ព្រាប សុមាលា អាយុ៤៧ឆ្នាំ មានទីលំនៅផ្ទះកើតហេតុខាងលើ ។ ដោយឡែកជនសង្ស័យដែលត្រូវនគរបាលចាប់ខ្លួនឈ្មោះ យូ ចិត្ត្រា ហៅត្រា អាយុ២៥ឆ្នាំ មុខរបរមិនពិតប្រាកដ មានស្រុកកំណើតនៅខេត្តស្វាយរៀង ហើយសព្វថ្ងៃស្នាក់នៅក្នុងភូមិដំណាក់ធំ៣ សង្កាត់ស្ទឹងមានជ័យ៣ ខណ្ឌមានជ័យ។ រីឯបក្ខពួកម្នាក់ទៀតដែលត្រូវកងរាជអាវុធហត្ថឃាត់ខ្លួនបាននោះ មិនទាន់ត្រូវបានស្គាល់ឈ្មោះ នោះឡើយ ហើយជនទាំង២នាក់នេះជិះម៉ូតូម៉ាកស៊ុយហ្ស៊ុយគីលែត មួយគ្រឿង ពណ៌សលាយក្រហម ពាក់ស្លាកលេខ ភ្នំពេញ 1GR-6750។
តាមប្រភពព័ត៌មានបានឲ្យដឹងថា នៅមុនពេលកើតហេតុជនសង្ស័យ ទាំង២នាក់បានជិះម៉ូតូទៅធ្វើសកម្មភាព គាស់ទ្វារផ្ទះមួយកន្លែងដែលម្ចាស់មិននៅរួចចូលទៅធ្វើសកម្មភាព រើកកាយនៅក្នុងផ្ទះ ហើយលួចបានកាបូបលុយ និងគ្រឿងអលង្ការបានសម្រេច។ បន្ទាប់មកបានរត់គេចខ្លួន ប៉ុន្តែខណៈនោះម្ចាស់ទៅទាន់ ស្រែកឆោរឡោថាចោរៗបង្កការភ្ញាក់ផ្អើលដល់សមត្ថកិច្ចនគរបាល ដេញចាប់បានម្នាក់ ចំណែកកងរាជអាវុធហត្ថចាប់បានម្នាក់ និងយកបានកាបូបលុយមកវិញ។ ក្រោយមកនគរបាលបានប្រគល់ជនសង្ស័យម្នាក់ដែលចាប់បានទៅឲ្យកងរាជអាវុធហត្ថជាអ្នកសាកសួរ និងកសាងសំណុំរឿងចាត់ការតាមច្បាប់តែម្ដង៕
https://youtu.be/ORKSey5Twpk
ចែករំលែកព័តមាននេះ